Ашукалі праз Viber

Штотыднёвыя навіны пра тое, як падманулі чарговага пенсіянера, на жаль, не дапамагаюць зменшыць колькасць занадта даверлівых людзей. Як паведамляе міліцыя, у Аршанскім раёне ў яшчэ адной пенсіянеркі выцягнулі грошы махлярскім спосабам.
Жанчыне патэлефанавалі на Viber. Мужчына па той бок слухаўкі назваўся «супрацоўнікам фінансавай міліцыі». Ён паведаміў, што нейкія махляры скарысталіся яе асабістымі звесткамі і аформілі заяўкі на крэдыты.
Каб самой не стаць фігуранткай крымінальнай справы і каб дапамагчы злавіць аферыстаў, мужчына сказаў, што жанчыне трэба надыктаваць свае банкаўскія рэквізіты і надаць доступ да мабільнага інтэрнэт-банкінгу. Жанчына не западозрыла яўнага ашуканства і назвала ўсе нумары і паролі. Ужо праз некалькі хвілін яе рахункі «абчысцілі». Яна страціла амаль 25 тысяч рублёў.