ПОЦ ҚИССА (1)

РАВӮНУМ WУЗ НУР ПЭ ПОЦ
Панҷ қатийум wуз андуйд,
Вазат мағъен фукатъ дъуйд,
Ху музайенум пинуйд,
Равӯнум wуз нур пэ поц.
Тухъам халтандэ чуд ҷам,
Халтайум wуз дъод пэ дам,
Ху чоқу ар ху зуғъ дъам,
Равӯнум вуз нур пэ поц.
Қишлоқ корен магам кэ,
Амро фукатъ қатир тэ,
Ху поц тэ мис магам вэ,
Равӯнум wуз нур пэ поц.
Фирипт дэ пухътатэ хир,
Дарав дивихът сут пэ тир,
Ат wуз ғалатъгайум гир,
Равӯнум вуз нур пэ поц.
Арцӯнд нафорт га мис мурд,
Арцӯнд савол цадъам хурд,
Арчиз ца лӯм гамис турд,
Равӯнум вуз нур пэ поц.
Йэлав фарбэ йэлав қоқ,
Йэлав йакҷо йэлав тоқ,
Вазен мағъен барост ноқ,
Равӯнум вуз нур пэ поц.
Садо магам баланд кэ,
Амро фукатъ қатир тэ,
Ху поц тэ мис магам вэ,
Равӯнум вуз нур пэ поц.
Пухъта са амро қатэ,
Тоқа ачатъ ту ма вэ,
Чойат гардъа га хурд зэ,
Равӯнум вуз нур пэ поц.
Помир куйен биланден,
Динйондэ дилписанден,
Тар ху ту вухъта банден,
Равӯнум вуз нур пэ поц.
Шоир ту сав пэ пухьта,
Нивишт ту кор фақат на?
Ху додард дъуст ту анҷа,
Равӯнум вуз нур пэ поц.
Ҳабиб Асадбек, Навобод
Май, 2018