“Міфалагічныя ўяўленні жыхароў Усходняга Палесся”

Палессе - загадкавы і таямнічы край, які пачаў вабіць даследчыкаў яшчэ ў ХІХ стагоддзі. І гэта невыпадкова: менавіта на Палессі захаваліся рэшткі традыцыйнай культуры і веды, якія сваімі каранямі паглыбляюцца ў далёкую старажытнасць. Сучасныя гісторыкі і этнографы таксама знаходзяць на Палессі шматлікі матэрыял для вывучэння.
9 верасня ў Мазыр завітаў вядомы даследчык беларускай міфалогіі, кандыдат гістарычных навук Зміцер Скварчэўскі. У музеі “Палеская веда” адбылася яго лекцыя “Міфалагічныя ўяўленні жыхароў Усходняга Палесся”, на якой даследчык пазнаёміў слухачоў з традыцыйнай карцінай свету беларусаў-палешукоў, падзяліўся сваімі меркаваннямі наконт таго, як нашы продкі ўяўлялі Сусвет і чалавека ў Сусвеце. Таксама прасачылі, як мянялася светаўспрыманне жыхароў гэтых мясцін на працягу некалькіх дзесяткаў тысяч гадоў: пачынаючы з каменнага веку і да нашых дзён. Удзельнікі мерапрыемства шмат новага даведаліся пра народную астраномію і касмалогію. Было цікава на знаёмыя з дзяцінства легенды і паданні, якія бытуюць на тэррыторыі Мазыршчыны, паглядзець вачамі навукоўца.
Наступным днём Зміцер Скварчэўскі сумесна з музейшчыкамі і ўдзельнікамі @streetartproject даследавалі міфалагічны ландшафт Мазыра: пабывалі на мясцовых могілках, Кімбараўцы, Чортавай гары, Даліне Анёлаў, Смертнай Даліне, альбо Кашмароўшчыне. Падчас гэтай невялікай экспедыцыі ўзнікла шмат пытанняў, на якія ўдзельнікі праекта імкнуліся знайсці адказы.
Шчырая ўдзячнасць Зміцеру Скварчэўскаму за лекцыю, за веды і думкі, якімі ён падзяліўся. Чакаем далейшых сустрэч!
Лекцыя і экспедыцыя адбыліся, дзякуючы сумесным намаганням @streetartproject і супрацоўнікаў музея “Палеская веда”. Вялікі дзякуй усім, хто прымаў удзел у гэтым праекце!