Дзіцячы садок пабудуюць у мікрараёне Цярэхіна-Златавустоўскага да 2020 году

Каля 300 жыхароў мікрараёна Цярэхіна-Златавустоўскага заяўляюць пра патрэбу ў такім сацыяльным аб’екце, як дзіцячы садок і школа. Тым больш, пры будаўніцтве раёну людзей запэўнівалі, што па цэнтру паўстане садок-школа з басейнам і бацькам не прыйдзецца шукаць месцы сваім дзецям у адукацыйных установах суседніх раёнаў. Сёння на вуліцах Цярэхіна і Златавустоўскага жыве каля 5000 чалавек, але ні садочка, ні школы там няма. Каб атрымаць адказ, калі абяцанні забудоўшчыка і чыноўнікаў здзейсняцца, людзі звярнуліся з калектыўным зваротам у гарвыканкам.
У адказ на калектыўны зварот да падпісантаў выехала цэлая камісія з прадстаўнікоў сферы архітэктуры, адукацыі і адміністрацыі раёну. На сходзе чыноўнікі запэўнівалі, што месца ў цэнтры мікрараёна сапраўды прызначана для сацыяльных аб’ектаў і будзе за імі заставацца, іншыя ўстановы тут не паўстануць. Папярэдне эксперты правялі аналіз дэмаграфічнай сітуацыі на мікрараёне і высветлілі, што на сённяшні дзень няма патрэбы будаваць тут школу. А вось дзіцячы садок актуальны, яго павінны пабудаваць да 2020 году і ён будзе разлічаны на 95 месцаў.
Сёння на месцы садка-школы у мікрараёне Цярэхіна-Златавустоўскага вялікі недобраўпарадкаваны пустыр. Жыхары гуляюць там з сабакамі, а дзяцей вымушаны вазіць ці вадзіць у садкі і школы суседніх раёнаў. Людзі звярталі ўвагу чыноўнікаў на вялікую колькасць першых класаў ва ўсіх суседніх школах. Але ў адказ чулі іншую статыстыку: што СШ №42 загружана толькі на 86%, а астатнія і таго меней – на 70%.
Выказваліся прэтэнзіі і да адсутнасці паліклінікі на мікрараёне. Жыхары вуліц Цярэхіна і Златавустоўскага вымушаны ездзіць з дзецьмі ў 8ую паліклініку на Сіманава. На што чыноўнікі адказалі, што ў людзей хутка знікне такая праблема, бо для паліклінікі ўжо ёсць будынак – аб’ект на ўзбярэжжы Дняпра, які першапачаткова будаваўся, як грабная база.
Хоць людзям і паабяцалі садок і паліклініку, яны засталіся незадаволены сустрэчай.
Источник: http://6tv.by/dzicyachy-sadok-pabuduyuc-u-mikrarayone-cyarexina-zlatavustoўskaga-da-2020-godu/