TƏBRİK KARDEDƏM!
Azər ən iminə çımı diovıj, hamsiyə əğıle. Çəvon kə bəçımı yolə pə kə ən nezə kə be. Əmənən ıştə yolə pə kədə moəmo bəmon, de bə 2-3-nə sinif vəyo yol bəmon, peşo co bəmon, kuç kardəmone bə tojə kə (penə kə). Azər çəmə Jinə kəy hamsiyə əğıl be. Əmə çı Jinə kəyku yəni Dədə-nənə kəyku coən bıbəmon, vəyo bə dınyo çaş okardero, vəyo ji qətero, tojə kəykuən bəmə ve Jinə kə ve dəçıki. Əve az əncəx bo hıtero bə penə kə əvoym, ve vaxt hejo jinə kədən bə şəv əmandim, Qulnənə vədə əhıtim, məktəbən i qəm ro be çəvra.
Bəbe ki vote həşi beşeku də bə həşi eşe so bədə, roədə, hiyədə Azəri əvindim. Az, Ruslan Vahabov (çımı rukə bo), Azər. İco hənək əkəymon, rəhmətşə Bali mamu, Soğərə vəvu boğ bo fındıx-viz dızdero, bə kanə məktəbi bo bo dambul-hulə çınero əşimon, rə-rəən peyərisimon. Az 4 sor Azəriku yol bero sığ-anquli canqədə odətən əçəy sə ve vaxt arşidəbe, bəmə tərəf əv əbi.
Dədəm vəy, nənəm vay, əçəy yolə nənə çoko əməsi ki qıniyəmon bəyəndı, de bə şəvi nimə çəmə yolon arədə bəyəndı do-dıjmoni marafon bino əbi. Nəyinki hamsiyon, hamsiyə diyovıjonən bı bepulə kənserti təmşo karde şansıjon əbi. Jıqo pepulə kənserton əncəx Azəri səy arışteyədə ni, bəyəndı hi, so-bə kaq-kijə, mol-mələ dərəxeydən rə-rə əbi. pisi-rısvo de bə xırtəçol... Əncəx çəmə vecisən nıbe. Çunki çoko ruj oəbi, ujən huranqone əğətimon, kulonkə, kəpronə qəve pəydo əkəyəmon, ləp hozı əkəymon, vədibol əkəymon. Çəmə panən sardonən bıbu, dıyəndı səlam-əleyki nəbırin.
Peşo zınəmone ki çəmə nənon arədə bə ım dave 30 sore şedə. Səveti vaxti 20 sor məhkəmonədə bən. Bo iyəndı xuni peşomero hozı bin çəmə yolon... Im məhkəmon predmeti mamuzoəm Rizvan Sixizade bəşımə edaştəje.. Jıqo koon əv diyə kardedə.
Bəle, zəmonə dəqiş bə, insonon arədə beməno intiğom, interğə, de nəsli dəvom kardə ğısos hejo dədə-bobonnə şe, çəvon devrədə mande.
Azər hejo aktiv bə di cıvonon dılədə. Bənə mı ıştəsə ve yol bə odəmon əşt-nıştıj kardə. Sosial şəbəkon tojə beşəyədə diədə 3 kəsi xəbə beyədə çəyku, çəvono dıkəs əmə bəmon. Az şeyir nıvışteyədə, meyxonə voteyədə iminə məsəkəsono qıləy Azər əbi. Çat okardəm be, vəyo cəmat dı kinə-minon oşnoəti məğsədi dəşeyədə, çəmə məğsəd çatədə tolışə zıvonədə qəp jəy təbliğ karde be. Peşo tələbə bemon, Bokuədən Azərinə ve ico fəoliyyətımon be. Azəri - Talış İctimai Birliyi (Azəri - Tolış İctimai İbemon)i ən aktivə cıvonon əmə bimon. Təşkiloti Cıvonon təşkilaton sədr az, maven Azər be. Dr.Hilal Məmmədovi iyən co beqınoə simon dı behtoni qətəbəpeştə bə məhkəmə bekardə beyədə, bə məhkəmon vaxti-vaxtədə omə, etiroz aksiyon umuj bə. Mitinqonədə ən daspoçənininoən qıləyni bə. Bokuədə bə polisi təğibon məruz mandeyədə Azər, hejo çəy dumo şəm, sağ-səlomət bəştə mənzıl rəsəbəpeşt azən rohət bə kə şəm. Azəri dınyovindemoni çanədə bəy imkon doəje, hejo dı şəri, dı nohəxi ıştə mıborizə bardəşe, bardedəyən...
Azərboyconədə bə ıştəni dərk kardə mıborizə insonon çı hıkməti ğeyri-insonə rəftoriro, bo rujqariro ım ruj vətəniku erəd eqıniyəmon, Azər Almaniyədə, az Miyonə Asiyədə, Ruslanən dı polisi şəri zindonədəy. Çand sore iyəndıku coən bıbəmon, bo iyəndı pəvuşi qəteyədə, idonədə, moəmobə rujonədə, vocib xəbon mızokirədə bəyəndı videozanq əjənimon... Çand manqe ımən dəparçiyə... Çımiyən səbəb ıme ki hay dıştə problemon ğale...
Azər, Moəmo bə rujı xose mıborəke. Çı çok ki hestij! Xıdo bətı xəşəconi, dırozəji, ovandi bıdə!
Ruji rujqomi Veriyədə dı yolə şoyvoy qırdə bıbəmon... Bəvədə çı ƏLİ NASİRi vəsiyonən bə vırə bərəse.. ĞOYM BIMAND!
Присоединяйтесь к ОК, чтобы подписаться на группу и комментировать публикации.
Нет комментариев