📰🍂Газетнан у номерыштыже лудаш темлена:

✅Шернур район Изи Торешкӱвар ялын старостыжо Владислав Смородинов кумло кок ий ялвуй сомылым шукта. Владислав Васильевич самырыкше годым водительлан тунем лектын, «Дружба» колхозышто шоферлан, вара пырчым эрыктен коштымо комплексыште машинистлан тыршен. Ик ганат ӧрдыж кундемыш илаш куснаш шонымашыже лийын огыл. Кумданрак - " Чолга еҥ чыла вере чолга" материалыште.
✅Кодшо кечылаште Йошкар-Олаште, республикысе Мер-политике рӱдерыште, Отечествын воинже-влакын ешыштын комитетшын регионысо отделенийже «Щит матери» фотопроектын презентацийжым эртарыш. Тудо шушаш Аван кечыжлан пӧлеклалтын. Мероприятий гыч репортажым "...А ынде аваштым аралат" материалыште лудаш темлена.
✅Специальный военный операцийыш Марий Эл гыч чӱчкыдынак гуманитар полышым колтат. Медведево район Пиясир селаште ӱдырамаш-шамыч пижерге-носким пидыт, маскироватлыме сетьым ыштен колтат. Нуно шке пашашт нерген "Патырлык" лаштыкыште каласкалат.
✅Йошкар-Оласе тӱвыра да каныме рӱдӧ парк эре гаяк оласе калыкын ик йӧратыме верже лийын. Пытартыш ийлаште чыла шотыштат койын сылнештеш. Мотор садер, тӱрлӧ семын каналташ йӧным пуышо аттракцион, шкем шуараш спорт, йоча площадке-влак, икмыняр шарныктыш мемориал, арт-объект-влак улыт. Парк мучко ынде кастенат мотор тротуар дене кошташ лӱдыкшӧ огыл. Олымбалат ситыше. Парк пашаеҥ-влаклан тауштымак шуэш, чылажат куандара. Ынде вич ий наре парк директорын сомылжым самырык да чолга пӧръеҥ Иван Конышев шукта. Таче тудо – «Вашмутланымаш» лаштыкнан унаже.
✅Тӱрлен, пидын, шке кид дене сӧрастарышым да молым ыштен моштымо мастарлыкым Юмо чыла айдемылан огеш пу. Да мастарлыкым веле огыл, эше тыршымашым, кугу чытышым. Санденак кидмастар-влакын яра жапышт нигунамат уке: тудыжым нуно шӱм-чоныштлан келшыше сомылыштлан пӧлеклат, а сулен налме канышыште улмышт годым тидын дене илат манын каласаш лиеш, очыни. Нине шомак-влак "Мастарлык" лаштыкнан унаже Людмила Черновалан лачак келшен толыт.