«Газетлан ӱшанле кодыт»

Тыге ойла Шернур район Кугэҥер связь отделенийым вуйлатыше Эльвира Милютина «Марий Эл» ден «Сурт-пече» газет-влакым эреак налын да лудын шогышо-влак нерген.
Кугэҥер велыш командировко дене мийымына годым связь отделенийыш пурен лекде ыжна керт. Чылт марий кундемыште кузерак шочмо йылме дене лекше газетым налын шогат, лудшо-влак ешаралтыт мо?
Отделений вуйлатыше Эльвира Милютина эн ончычак паша условий ятырлан саемме нерген куанен каласкалыш.
– Тиде оралтым 1978 ийыштак чоҥымо да вараже ачалымат огыл, – ойла Эльвира Милютина. – Телым юалге лийын, кермыч коҥга начарын ырыктен, тышке толшо-влакын кумылыштым савырен огыл. Кок ий ончыч республикысе моло районласе семынак мемнан оралтынамат программе почеш ачалышт, чылт у гайым ыштышт. Ик кеҥеж гоч ямде лие. Почто отделенийым вуйлатыше ончычсо самырык ӱдырамаш лачак тиде жапыште декретный отпускыш кайыш. Ачалыме пашам мучашлымек, мыланем тышке пашам ышташ толаш темлышт. Ынде кумшо ий тыршем.
Уэмдыме оралтыш пурыметак шуэш. Волгыдо, шокшо. Ырыкташ лӱмынак газ подым шынденыт, вӱдлан скважиным кӱнченыт, канализацийым келыштареныт. Калык тыште чыла тӱрлӧ услугым налын кертеш. Коммунал услугылан тӱлаш толшо Земфира Вершининан мутшо почеш, почтыш уло кумылын коштеш, тудым тыште пеш порын вашлийыт. Тышке компьютерым шынденыт, тудын дене кажне еҥ пайдаланен кертеш. Эшеже давленийым, пульсым, капын температуржым висаш лиеш. Тыгак тӱрлӧ сатум темлат. Милютинан мутшо почеш, ынде сатум шагалрак ужалаш пуат. Тыгак интернет-кевытын сатужымат тышкак кондат.
Ты кундемыште шочмо йылме дене лекше газетым куанен лудыт. «Марий Эл» ден «Сурт-пече» комплект латик суртыш толеш, ныл экземплярлан «Марий Элым» посна ыштеныт. А «Сурт-пече» поснаже латкум ешыш толеш. «Кугарня» газетлан эсогыл кумло шым еҥ возалтын.
– Ноябрь тӱҥалтыште эртыше подписке декаде годым шукын газетлан возалтыч, – ойла Эльвира Григорьева. – Почтышкына тыгак кум экземпляр «Марий Эл» толеш, тудым эреак налше-влак улыт. Тыгак «Сурт-печат» ок кий, толмо семынак налын пытарат. Почтальонкына-влак Любовь Пекпулатова ден Галина Бердникова лудшо-влак деке газетым жапыштыже намиен шуктат. Нуным яллаште уна семын вучат.
Вара Милютина «Марий Элым» эреак налше да возалтше-влакын лӱмышт дене палдарыш. Мутлан, Кугу Мушко гыч кандашле ийым эртыше Алевтина Пальцева, Кӱчыкэҥер гыч Зоя Мамаева, Койсола гыч Ангелина Ямбаршева, Галина Волкова, Надежда Пакеева йӧратыме газетыштлан кажне гана возалтыт. А Кугэҥер гыч Нина Эльтеровалан «Сурт-пече» газет келша. Тудо тушто тӱрлӧ ой-каҥашым куанен лудеш, пашаштыже кучылтеш. Мутлан, кочкышым ямдылыме нерген каласкалыше материал негызеш шкежат темлыме семын ямдылен онча. Вет Нина Прокопьевна кидмастар, марий вургемым урга, тӱрла. Газет тудын пашаштыже сай эҥертыш семын палдырна.
Снимкыште: Эльвира Милютина.
Вячеслав Смоленцевын фотожо.