28 ноябрьыште Калык тӱвыра пӧртыштӧ 10 шагатат 30 минутышто Кидпаша форум тӱҥалеш.

Республикысе кидмастар-влак тушко погынат. Искусствоведений науко доктор Владимир Кудрявцев калыкнан орнаментальный йӱлаж нерген каласкала. Марий Элын калык кидмастарже Ираида Степанова Марий тӱр рӱдерын пашажым почын пуа. Этнодизайнер Надежда Акиева курымла дене кучылтмо марий тӱрлан кызытсе жаплан келшыше шӱлышым пуаш, а вес этнодизайнер Евгения Кошкина шке ыштыш-кучышым воткыл лаштыкла полшымо дене ужалаш туныктат. Российысе дизайнер-влакын ушемыштын еҥже Елена Лемешева ургымо пашаште тӱрлӧ техникым кучылтмо нерген умылтара.