Толза, вучат

Йошкар-Олаште Ленин лӱмеш площадьыште 15, 22, 29 ноябрьыште ялозанлык ярмиҥга лиеш.
Ноябрь тылзе ярмиҥгалан поян. Тышке толыда гын, свежа да сай качестван кочкыш сатум налыда, тыгодым шкенан республикыште продукцийым ямдылыше предприятий да фермер озанлык-влаклан пайдам ыштеда.
Ярмиҥгаш Марий Элнан чыла луклаж гыч шылым, шӧрым, нуным кучылтын ямдылыме сатум, муным, мӱйым, мӱкшын пуымо моло продукцийым, колым, киндым, пакчасаскам, пареҥгым, чодыра сийым, кидмастар-влакын сувенирыштым да молымат ужалаш кондат.
Снимкыште: сатулан поян ярмиҥга.
Вячеслав Смоленцевын фотожо.