Каматса таӆ хащас, хун тамащ нётапса верса. Хащам кут эӆты ныӆа, хот омасты па ӆутты вер мет мосмаӊ. Тамащ нётапса вуты ураӊан, хуӆам па аршак няврэм тайман, вет па моӆтас таӆ округеван уӆты мосаӆ.
Тамхатӆ кеша хот омасты мув юкана ох вуты рахаӆ па тащ ӆэщатам хот ӆутты. Хой хоятат ӆутам хотэӆ сахат ипотека ох сохаптаӆат, нётапса охеӆ тохи сохаптаты верытӆэӆ. Веӆщи тащ верам хот ӆуттыйн, охӆаӆ оӆаӊ тэӆ юкана маты.
Там пуш хуӆам щёрас пеӆа катсот хоттэӆ хот омасты мув юкана ох ёша пайтсат. Мет ар щимащ семья Ноябрьск, Новый Уренгой вошатан па Ямальской районан уӆӆат.

Хот омасты нэпек шитам хоятат кутан Валентина Лаптандер Приуральской район эӆты. ӆув Денис икеӆ пиӆан ӆапат няврэм тайӆаӊан.
«Мин ийикем пиӆан ай тэӆан тата уӆӆаман, тащ хотан касаӆман яӊхӆаман. Няврэмӆаман тата сэма питсат. Кашӊ хоттэӆ атэӆ хот тайӆ ки, щит шеӊк ям. Воша ёхтыӆытыйн па хоятат хотан хойӆыты ищи рупатайӊ. Ешауӆ няврэмӆув энамӆат, вошан хот мосаӆ. Нётапса нэпекев хуват Охсар куртан тащ верам хот ӆутты нумасӆув. Там йисан хот тынӆаӆ па шеӊк тынаӊат. Округ кущайӆуван кушкепа тамащ нётапсайн маӆаюв. Ун пумащипа ясаӊ китӆув», -– Валентина Лаптандер ястас.
Округеван ӆапатхощъяӊ щёрас семья ар няврэм тайты хоттэӆа ӆуӊтасаӆ. Щиӆта кат щёрас пеӆа ӆапатсот хоттэӆ касаӆман яӊхаӆ.
Хоятата нётапса верат ӆэщатты департамент хуват хольмаӊ нётапса вер рупитаӆ. Хуӆмет шупаӆ ар няврэмаӊ хоттэӆат ураӊан ӆэщатман уӆ.
Ин рупитты нётапса верат «Семья» национальной проект хуват туӆайт.

Хор: ЯНАО губернатор пресс-служба, Вера Лонгортова