КУГАРНЯ газет

Йӱштӧ игече Российын уло касвел могыржым авалтен. Синоптик-влакын палемдымышт почеш, амалже – кумда высотный циклон. Тудо майын 20-шо числаже марте шуйна. Тугеже тунам веле игече левештымым вучыман. 9 майыште Марий Элыште пылан игечым сӧрат, коклан кече лекшаш, верын-верын йӱр йӧршан ночко лум лумшаш. Мардеж йӱдвел-касвелым, касвелым секундышто 9-14 метр писылык дене пуалеш. Южын температуржо йӱдым 0…+2 градус, южо вере -4 градус, кечывалым +3…+8 градус лийшаш. И.Речкинын фотожо.

ЗИЛОЛА – ОНЧЫКЫЛЫК ДИПЛОМАТ Кызыт Марий кугыжаныш университетыште йот элла гыч толшо 2,5 тӱжем утла ӱдыр-рвезе тунемеш. Иктыже – Индонезий Республик гыч Зилола Эргашева. Зилола Бандунг олаште кум шочшан ешыште шочын-кушкын. Ӱдыр – эн кугу йоча, тудын вич ияш шӱжарже да латвич ияш шольыжо улыт. Авашт сурт коклаште шогылтеш, ачашт туныктымо пашаште тырша. – Мемнан элыште тӱҥ йылмылан индонезийский йылме шотлалтеш. Но тыгак Индонезийыште илыше-влак 700 утла диалект йылме дене кутырат. Мемнан кугыжаныште школ системе кум ужашлан шелалтеш: тӱҥалтыш школ – куд класс, кыдалаш – кум класс, кугурак – кум класс. Умбакыже шинчымашым университетыште налаш лиеш. Школышто тунеммем годым географий предмет мыланем моткоч келшен. Сандене шке гыч сандалык, пӱртӱс, эл-влакын тӱҥ олашт нерген шуко лудынам, тыгак элна мучко тӱрлӧ олаш архитектур памятникым, тоштерым ончаш кудалыштынам. Кугурак класслаште тунеммем годым политик але дипломат профессийым налаш кумылаҥынам налынам. Школым тунем пытарымек, вес элысе университетыш тунемаш кайыме нерген шонаш тӱҥалынам. Россий тӱрлӧ нацийлан поян, тыгак тыште йолташем-влак тунемыт, нунак тиде кундем дене палымым ыштеныт. Тыште вияҥаш шуко йӧн уло, мыланем тысе тунемме системе лишыл. Ешем дене кутырымек, ача-авам мыйым колтеныт, – ойла Зилола.

Таче, 7 майыште, В.Путин Российын Президентше должностьыш визымше гана шогалын. Элнам вуйлатыше инаугураций годым еш поянлыкым, йӱлам аралаш, мер, религий ушем ден политический партий-шамычым ончыкыжымат ушаш полшаш тӱҥалме нерген кугу ӱшан дене ойлен. Ты пайремыште Марий Элым Вуйлатыше Ю.Зайцев лийын. Тудын мутшо почеш, лидерланна кӧра Российым кугу сеҥымаш-влак вучат. «Ме ончыко ӱшанлын ончена, ончыкылыкланна ятыр планым ыштена, шуко у проект ден программым ямлылена да илышыш шыҥдарена; нуно сомылнам эшеат вияҥдараш полшат. Ме икоян да виян калык улына, чыла чаракым пырля сеҥена, шонымынам илышыш пуртена. Пырля сеҥена!» – Россий Президентын шомакшым Ю.Зайцев цитироватлен. Инаугураций Кремльыште эртен. Тушко ятыр ӱжмӧ уна, мер организацийын да конфессийын еҥышт, шанче ден тӱвыра пашаеҥ-влак миеныт. Марий Элым Вуйлатышын пресс-службыжо.

ДАРТС таҥасымаш Районысо профсоюз ушем вуйлатыше В.С.Фёдоров у деч у вашталтышым пуртен шога. Морко районысо школлаште спорт шӱлышан пашаеҥ-влак коклаште тӱрлӧ таҥасымаш эртаралтеш. Шукерте огыл кыдалаш школ-шамыч коклаште волейбол дене таҥасымаш лийын гын, тӱҥ школ-влак дартсышке ушненыт. Дартс – спорт модыш кокла гыч иктыже. Таҥасымашын участникше-влак пырдыжышке лӱмын келыштарыме тыртышыш (мишень маналтеш) чурик вуян дротик-влакым кышкат да очком погат. Дартс таҥасымашынат шке правилже уло. Тудо шинча пӱсылыкым, чон куатым йодеш. Дартс ӱчашымаште Кожлаер, Купсола, Шӱргыял да Эҥерсола школ-влак поснак ойыртемалтыныт. Елена Григорьева, Морко районысо туныктымо аланысе профсоюз ушемысе президиумжын еҥже. Снимкыште: Морко районышто дартс дене таҥасымаште сеҥыше-влак.

Кужэҥер район Йӱледӱр школышто Йывансола клубын пашаеҥже-шамыч Кугече да Ташлама йӱмаш йӱлам ончыктеныт. Пура корка дене куштеныт.

❄ Марий гидрометеорологий рӱдер Марий Элыште арня мучкылан покшымым сӧра. ❄ 7-11 майыште йӱдым да эрдене 0 гыч -4 градус марте йӱштӧ лийшаш.

🎗«Георгиевский тасма» акций 20-шо гана эрта 24 апрель гыч 9 май марте Россий мучко тиде акций кая ❤ Георгиевский тасмам оҥышто шӱм пелен, вачыште але воротникыште нумалман. Тудым мардеж ынже лойгыкто манын, булавке дене пижыктыман, але шӱртӧ дене кылдыман. 🚫 Кынервуй деч ӱлыкӧ вургемыш, сумкашке, кӱзанӱштышкӧ, шагатышке, янлыклан але машинашке кылдыман огыл.

Парад лиеш‼ 6 майыште Йошкар-Олаште Кугу Отечественный сарыште сеҥымылан 79 ий темме лӱмеш парадын генеральный репетицийже лийын. Колоннышто Йошкар-Оласе гарнизонын, силовой структурын военнослужащийже ден кадет-влак ошкылыныт. Тыгак военный технике кудал эртен. Трибун гыч тидым Марий Элым Вуйлатыше Ю.Зайцев эскерен. 9 майыште Йошкар-Олаште Сеҥымаш кечым пайремлымаш 8 шагатлан Марково мемориал ден иза-шольо шӱгарлаште пеледышым пыштыме дене тӱҥалеш. Парад 11 шагатлан лиеш. «Курымашлык полк» онлайн эртаралтеш. 📷Д,Речкинын фотожо-влак / Марий Элым Вуйлатышын пресс-службыжо.

Историйым шымла, мура-кушта Оршанке район Кугунур селаште шочын-кушшо, Марий кугыжаныш университетыште 2-шо курсышто историй направлений дене тунемше Алина Смирнова – чолга, талантан ӱдыр. Поро да весела кумылжылан кӧра еҥ-шамыч дене кылым вашке муэш. Кугунур кыдалаш школышто тунеммыж годым Алина историй, обществознаний, ОБЖ да физкультур предметла дене районысо олимпиадылаште призовой верла дене палемдалтын. – 1-ше гыч 9-ше класс марте «Шонанпыл» образцовый фольклор ансамбльыш коштынам. Тушто ийгот шот дене кум состав лийын. Тӱҥалтыш класс – тӱҥалтыш состав, 5-7-ше классла – кыдалаш состав, 8-11-ше классла – кугурак состав. Ме ятыр конкурсышто, концертыште участвоватлена, «Михаил Мурашко йолташыже-влакым ӱжеш» фестиваль-конкурсыш кажне ийын ушнена, тыгак Эстонийыште тӱнямбал фольклор фестивальыште лийынна. Мыйын Захар лӱман шольым уло, тудо йочасадыш коштеш, тудат видеошто мыйын выступленийым ончен кушташ тунемеш. Шукерте огыл пӧръеҥ-шамычлан пӧлеклалтше концертыште Захарын куштымыжым йывыртен да кугешнен ончышым, – ойла А.Смирнова.