Предыдущая публикация
✒️ На нашем сайте запущен специальный раздел для старейшей ненецкой газеты «Няръяна Ӈэрм».
В нем публикуются новости на ненецком языке.👇️
❄️ Хайноԓьш нэхэԓма дяԓя
Чуки диԓи кашемдючимты дяԓяхана — ӈаԓка дяна чеԓ’’ хайноԓьш нэхэԓма дяԓя. Хэлаку’’ ԓуса’’ ӈаԓка дяна чеԓ’’ ԓусахана’’ хайноԓьш чепьмахана, шанат тэмс неша’’ хаймыхи’’ канаӈаш’’. Хайноԓма чет’ похона шаӈкмян неша’’ чок коӈаш’’.
Маня’’ Пуровский районхатна шича дёнаԓкат ва’та чет’ дю’’ неша’’ хайноԓьш кадяш’’. Чикидю’’ поӈкна ненэй неша’’, капи’’, вахандя’’, ӈысма’’ тадямэӈаш’’. Кукиты’’ шан’ мяктоӈ ниш’ ту’’. Куки хайноԓьш каймы неша’’ ӈамэхэна хинчумахаԓтатуӈ пунши. Чет’ хайноԓма пуӈ дямпан шича дю’’ мат’ миллионхат ӈука неша’’ катаԓамэт’’. Таԓям таньдёԓьшкай шеԓу’’ ӈаԓтана’’ ӈашки’’ чедимямаӈ мэт, маня’’ дяханана куԓкаԓи’’ таньдет ӈайта мероприятии’’ шеԓташту’’.
Шаӈкмян каԓват тахана хайноԓмы’’ дет тонԓюта памятник тадя’’. Таԓкахай стеллаӈ кявхана ӈайта доскахана шанат тэмс нешади’’ ним’ пыты’’. Хайноԓьш ниня каймы’’ неша’’ ӈупчики хайму’’ нятапёш дяԓитахана мансԓаштомай’’.
Пуровский районхана ты’’ падеԓьш мансԓанна’’, каԓитана’’ хайноԓьчи’’ нятапёш ӈука ӈайватам шеԓташтомай’’. Выӈкна диԓина’’, каԓтыхина колхозхана мансԓанна’’ неша’’ шанат тонна’’ ты ӈамши’’, каԓи’’ хайму’’ ӈамԓат ӈайтапташтомай’’. Хайноԓьчи’’ кынимтамаӈ тайхана мымай паныдю’’, пеми’’ хайташтомай’’, пяй ԓампи’’ мештомай’’. Каԓитана’’ дёԓеԓьш катамайтуӈ каԓитоӈ пяй бочкаха хыԓуташтомытуӈ. Каԓитуӈ пеԓь кастахадя, тухут туԓахадя паткохо’’ ӈомташтомытуӈ, тай’’ня чикитоӈ таԓям хаймыхи’’ ӈайтапташтомытуӈ. Нешади’’ мансԓавшат колхозы пу’’тахана детуӈ тасԓамы ӈамшитуӈ, каԓитуӈ планым чемнанта коштомытуӈ.
Наԓан март’ диԓихина 1944 похона Каԓпюԓ няна мансԓамы колхоз им. Сталина няӈта тасԓамы планамта мат’ тай’мана (на 635%) чемнанта комыта. Таньдёԓьшкана чики колхоз председательӈэ 1942 похот Ани Вэлло мансԓамай. Пыта колхоз’ мансдям хайноԓьш хитамантуӈ чеӈ минԓемыта. Хайму’’ нятапёш колхозхана мансԓанна’’ писамэй ӈайваштомай’’, куԓкаԓи’’ вайма нумкна: чешчахана, таньшеԓыхина, хаԓёхана пон мансԓаштомай’’. Катамайтуӈ каԓитуӈ, хайму’’ мэт шеԓтамайтуӈ ӈамыкутуӈ тыӈ канхана, пяй ӈанохана каԓват дёԓьшат тайвапёштомытуӈ. Таньше мансԓаш ӈука нэхэм мэштомай’’. Хайноԓьш хитамахататоӈ ӈука неша’’ хомана мансԓамантуӈ деэмня медалю’’ няамӈаш’’.
Автор: Лариса Айваседо патмы
Следующая публикация
Нет комментариев