Мацярынства і дзяцінства сталі асноўнымі тэмамі размовы на сустрэчы дэпутата Палаты прадстаўнікоў Нацыянальнага сходу Рэспублікі Беларусь Святланы Сянько з працоўным калектывам Капаткевіцкага сацыяльнага пансіяната "Палессе".

Абмяркоўваючы галоўную тэму, дэпутат адзначыла надзвычайную важнасць падтрымкі і папулярызацыі сямейных каштоўнасцей, у прыватнасці мацярынства.
- Наша дзяржава імкнецца ўсяляк садзейнічаць умацаванню рэпрадуктыўнага здароўя беларусаў, павышэнню нараджальнасці, стварэнню спрыяльных умоў для маладых сем'яў. На рэалізацыю гэтых мэт накіраваны шэраг нарматыўных дакументаў і дзяржпраграм. Пры гэтым вельмі важна, каб роля сям'і і жанчыны ў ёй былі ацэнены грамадствам па заслугах, - адзначыла парламентарый.
Працягвалася размова абмеркаваннем канкрэтных мер па сацыяльнай падтрымцы мацярынства і дзяцінства, а таксама абароне правоў і інтарэсаў дзяцей. Акрамя таго, удзельнікі сустрэчы змаглі задаць пытанні, якія іх цікавяць, па бягучым разглядзе законапраектаў.