Шчырай, сумленнай працай Шаркаўшчынскі раён услаўляюць людзі, шчыра ўлюбёныя ў родныя мясціны.

Таццяна Альшэўская (на здымку) нарадзілася і вырасла ў вёсцы Казакі. Пасля заканчэння мясцовай васьмігодкі паступіла ў Полацкі сельскагаспадарчы тэхнікум. А першым месцам працы маладога спецыяліста стала ўпраўленне сельскай гаспадаркі і харчавання Ліёзненскага райвыканкама.
— У маладосці была вялікая прага да далейшай вучобы, — успамінае Таццяна. — Без адрыву ад вытворчасці паступіла ў Беларускую сельскагаспадарчую акадэмію. У хуткім часе надарылася магчымасць вярнуцца ў родныя мясціны. Кіраўніцтва Шаркаўшчынскага райкама кампартыі прызначыла мяне на пасаду сакратара Валожынскага сельвыканкама.
Значным жыццёвым этапам у працоўнай дзейнасці Таццяны Альшэўскай была праца на пасадзе інспектара па закупках і якасці сельскагаспадарчай прадукцыі райсельгасхарчу. Да гэтага часу жанчына мела значны прафесійны вопыт, а спраўляцца са шматлікімі цяжкасцямі дапамагаў з’яднаны калектыў.
20 снежня 2017 года на пленуме раённага камітэта прафсаюза работнікаў аграпрамысловага комплексу Таццяна Альшэўская аднагалосна была выбрана старшынёй дадзенай грамадскай арганізацыі, дзе адпрацавала да выхаду на заслужаны адпачынак.
— Удзячна лёсу за тое, што ў маладосці вярнулася на малую радзіму, каб сваёй працай прыносіць ёй карысць, — кажа жанчына. — Удзячна калегам і ўсім добрым людзям, якія сустрэліся на жыццёвым шляху, дапамаглі, давалі слушныя парады.
З юбілейным днём нараджэння Таццяну Альшэўскую павіншаваў старшыня раённага Савета дэпутатаў Сяргей Арэшкаў. Па даручэнні кіраўніка раёна ён уручыў імянінніцы Падзяку старшыні райвыканкама, выказаў словы цёплых пажаданняў. Да віншаванняў далучыліся старшыня раённага Савета ветэранаў Ірына Міхалёнак, старшыня райкама прафсаюза работнікаў АПК Аляксандр Гернат, былыя калегі.