СЕЗИМ КОШТОГОН ЖҮРӨК

Толкуну күчтүү деңиздей болуп агылып,
Жөнөсө сезим өзүңдү көздөй ашыгып.
Ырдалып бүтпөс сүйүүнүн улуу дастаны,
Дем берип дайым жүрөктө турат жаңырып,
Дарактай болуп, сыдырым желге ыргалып,
Сүйүшкөн жандай бирине бири кыналып.
Ыр жазса сезим арзуудан алып саптарды,
А жүрөк ырдайт сүйүүдөн обон чыгарып.
Бириси жөлөк, а бири аны жетелеп,
Бийиктейт улам, асманды көздөй көкөлөп,
Көөнөрбөс дайым түбөлүк калчу сакталып,
Булактай таза жаратат сүйүү экөөлөп.
Келгенде эргүү көөдөнгө батпай топтолуп,
Мылтыктай болуп атууга даяр ок болуп,
Жеңилбейт жүрөк тагдырдан келген сыноого,
Ар убак турса таптаза сезим коштолуп.
От болуп турса алоолоп сезим жүрөктө,
Эч качан сүйүү өмүрдөн кетпейт жок болуп.
Жазган: Жыргалбек Усенов. 23.08.2025.
02:28 Москва