Благоверный князь Даниил Московский

Минея, 4 Марта.
Глас 5
Песнь 1
Ирмос: Коня́ и вса́дника в мо́ре Чермно́е/ сокруша́яй бра́ни мы́шцею высо́кою/ Христо́с истрясе́, Изра́иля же спасе́,/ побе́дную песнь пою́ща.
Припев: Святы́й благове́рный кня́же Дании́ле, моли́ Бо́га о на́с.
А́гнче непоро́чный, Иису́се Бо́же,/ в Твое́й си́ле кре́пкой победи́в душетли́тельныя стра́сти,/ блаже́нный уго́дник Твой оте́ц Дании́л,/ спа́сшеся же от грехопото́пнаго мо́ря,/ в Небе́сней су́ши ве́село пое́т Тебе́ песнь побе́дную.
Припев: Святы́й благове́рный кня́же Дании́ле, моли́ Бо́га о на́с.
Ревнова́в Богому́дрым отце́м в доброде́телех,/ Ева́нгельское се́мя – Бо́жия словеса́ кре́пце вперси́л еси́,/ преподо́бне о́тче Дании́ле,/ богоуго́ден Влады́це Христу́ быв, пое́ши песнь побе́дную.
Припев: Святы́й благове́рный кня́же Дании́ле, моли́ Бо́га о на́с.
Иерихо́н стра́стных помысло́в/ и вся́кое вра́жие кова́рство разори́в, о́тче всече́стне,/ немо́кренно жития́ сего́ волну́емое су́етное мо́ре проше́д,/ дости́гл еси́ тишины́ ве́чныя жи́зни,/ поя́ пе́сни побе́дныя.
Сла́ва Отцу́ и Сы́ну и Свято́му Ду́ху.
О Ца́рстве Небе́снем всегда́ помышля́я,/ все твое́ жела́ние воспери́л еси́ ко Христу́ Го́споду,/ непреста́нно в моли́тве, и посте́ и в вели́цем воздержа́нии/ вопия́ богоуго́дныя пе́сни.
И ны́не и при́сно и во ве́ки веко́в. Ами́нь.
Богородичен: Нетле́нная Отрокови́це, Богома́ти Влады́чице,/ при́зри на рабы́ Твоя́, притека́ющия под кров Твой,/ и от вся́ких бед изба́ви нас,/ да в благоду́шии Сы́ну Твоему́ и Бо́гу на́шему Иису́су/ благода́рныя пе́сни воспое́м.
Песнь 3
Ирмос: Над язы́ки Бог воцари́ся,/ Бог седи́т на Престо́ле Святе́м Свое́м,/ и пое́м Ему́ разу́мно,/ я́ко Царю́ и Бо́гу.
Припев: Святы́й благове́рный кня́же Дании́ле, моли́ Бо́га о на́с.
Име́ющему престо́л Не́бо,/ ты, о́тче всече́стне,/ себе́ сама́го в седе́ние царю́ющему все́ми Бо́гу предста́вил еси́,/ благоразу́мие угожда́я и при́сно поя́:/ свят еси́, Го́споди.
Припев: Святы́й благове́рный кня́же Дании́ле, моли́ Бо́га о на́с.
Щито́м облеки́йся ве́ры, благоче́стие содержа́в,/ был еси́, блаже́нне, о́браз лю́дем Госпо́дним/ в добронача́льстве княже́ния и в мона́шеском пребыва́нии,/ тем вси пою́т Царя́ и Бо́га.
Сла́ва Отцу́ и Сы́ну и Свято́му Ду́ху.
Иису́с, Бог воплоще́нный,/ ви́дя твое́, о́тче, благо́е произволе́ние и равноа́нгельное житие́,/ подаде́ тебе́ че́сть и сла́ву,/ на земли́ бо чудесы́, и в Не́бе пое́ши ро́ждшагося Царя́ и Бо́га.
И ны́не и при́сно и во ве́ки веко́в. Ами́нь.
Богородичен: Иму́щи, Всецари́це, Пречи́стая Де́во,/ дерзнове́ние ко Христу́ Го́споду,/ моли́ Его́, Человеколю́бца, ми́лостивно в нас ца́рствовати,/ да на земли́ и в Не́бе всежела́нне пое́м Его́, Царя́ и Бо́га.
Седален, глас 3
Вре́менное великонача́льство и бога́тство тле́нное/ и сла́ву мимотеку́щую оста́вив,/ Небе́сное бога́тство и сла́ву, и́стинно ве́чнующую,/ о́тче блаже́нне, восприя́л еси́./ Те́мже блажи́м свято́е твое́ успе́ние/ и, торжеству́юще в нем, вопие́м тебе́:/ помяни́ нас ко Го́споду, Дании́ле,/ спасти́ и в Не́бо всели́ти ду́ши на́ша.
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.
Богородичен: Арха́нгел Гаврии́л, красоте́ де́вства Твоего́ и пресве́тлой чистоте́ удиви́вся,/ Всенепоро́чная Де́во Мари́е, возопи́ ве́село:/ ра́дуйся, Благода́тная, Госпо́дь с Тобо́ю,/ из Тебе́ бо пло́ть прие́мшаго Емману́ила, Ипоста́сное Сло́во Бо́га Отца́,/ и Небе́сныя чи́ни узре́ша я́вственне./ Мы же, ве́дуще Тя и́стинную Богома́терь всежела́нне про́сим:/ зре́ния Иису́са Христа́ сподо́би рабы́ Твоя́ предста́тельством Твои́м.
Песнь 4
Ирмос: Дела́ смотре́ния Твоего́, Го́споди,/ ужаси́ша проро́ка Авваку́ма,/ изше́л бо еси́ на спасе́ние люде́й Твои́х,/ спасти́ пома́занныя Твоя́ прише́л еси́.
Припев: Святы́й благове́рный кня́же Дании́ле, моли́ Бо́га о на́с.
Моли́твенная твоя́ вопие́ния внидо́ша во у́ши Го́спода Савао́фа, о́тче досточу́дне,/ пома́заннаго бо тя благове́рнаго кня́зя/ смотри́тельне Госпо́дь спасти́ прише́л е́сть.
Припев: Святы́й благове́рный кня́же Дании́ле, моли́ Бо́га о на́с.
Огне́м любве́ Бо́жия непреста́нно содержа́вся,/ оста́вль мир, во оби́тели мона́шествовати изво́лил еси́, всече́стне./ Дарова́ньми бо Ду́ха Бо́жия пома́зався,/ чудоде́лием лю́ди спаса́еши.
Припев: Святы́й благове́рный кня́же Дании́ле, моли́ Бо́га о на́с.
На Христа́ Го́спода возложи́в наде́жду, Дании́ле о́тче,/ не убоя́лся еси́ вра́жиих наве́тов, отвсю́ду напа́дающих на тя:/ изше́л бо Христо́с и спасе́ние христиа́нскому ро́ду дарова́.
Сла́ва Отцу́ и Сы́ну и Свято́му Ду́ху.
А́лчуща и жа́ждуща Христа́ пра́вды,/ воспита́ тя Небе́сныя Трапе́зы Хле́бом/ и напои́ Пречи́стыя Кро́ве вино́м в та́инстве святе́м,/ в сем спа́сшеся, ве́чно ублажи́лся еси́.
И ны́не и при́сно и во ве́ки веко́в. Ами́нь.
Богородичен: Христа́ ро́ждшая, Де́во Влады́чице,/ смотре́нием Его́, по духопрови́дению проро́ка,/ моли́ Го́спода, да изы́дет спасти́ ны,/ де́ло рук Свои́х, Влады́ка Госпо́дь, я́коже благоизво́ли.
Песнь 5
Ирмос: Све́те И́стинный,/ Христе́ Бо́же,/ к Тебе́ у́тренюет дух мой от но́щи,/ яви́ на мя лице́ Твое́.
Припев: Святы́й благове́рный кня́же Дании́ле, моли́ Бо́га о на́с.
Свет Триипоста́снаго Божества́ осия́ тя, о́тче Дании́ле:/ у́треневав бо Богому́дрием, нощь грехо́в отгна́в,/ сподо́бился еси́ зре́ния лица́ Христо́ва.
Припев: Святы́й благове́рный кня́же Дании́ле, моли́ Бо́га о на́с.
Свет зако́на Бо́жия богомы́сленне прие́мь,/ испра́вил еси́, всече́стне, пути́ твоя́ пред Бо́гом./ Ему́же моли́ся, да освяти́т ны ми́лостивным явле́нием лица́ Своего́.
Сла́ва Отцу́ и Сы́ну и Свято́му Ду́ху.
Све́том озаре́нным бы́ти Богонача́лия Тро́ическаго/ испроси́ нам, Богоблаже́нне, у Христа́,/ да к Нему́ у́тренююще, безно́щие всера́достне восприи́мем.
И ны́не и при́сно и во ве́ки веко́в. Ами́нь.
Богородичен: Свет ро́ждшая – Иису́са Го́спода,/ просвеща́ющий вся́каго челове́ка, Де́во Богома́ти,/ вся пою́щия Тя изба́ви грехоно́шества/ и сподо́би ве́чныя све́тлости лица́ Его́.
Песнь 6
Ирмос: Я́коже проро́ка от зве́ря изба́вил еси́, Го́споди,/ и мене́ из глубины́ несодержи́мых страсте́й/ возведи́, молю́ся,/ да приложу́ призре́ти ми ко хра́му свято́му Твоему́.
Припев: Святы́й благове́рный кня́же Дании́ле, моли́ Бо́га о на́с.
Я́коже проро́к от тьмомра́чнаго зве́ря а́дскаго/ всемо́ществом Всетворца́ Бо́га изба́влься,/ невреди́вся бо глубиностра́стием, в небесора́йском хра́ме обита́еши,/ о́тче Дании́ле блаже́нне.
Припев: Святы́й благове́рный кня́же Дании́ле, моли́ Бо́га о на́с.
Возведи́, мо́лимся Тебе́, Вседержа́вный Го́споди,/ от душепотопля́ющаго мо́ря жития́,/ и в приста́нище небу́рное Небе́снаго Твоего́ хра́ма/ моли́твами досточу́днаго отца́ Дании́ла всели́ ны,/ и зре́ти Тя при́сно сотвори́.
Сла́ва Отцу́ и Сы́ну и Свято́му Ду́ху.
В духоправи́тельство Христа́ Го́спода/ вда́лся еси́ вози́тися во всей твое́й жи́зни, о́тче преподо́бне,/ те́мже волне́нии непра́вды боготво́рнаго тя корабля́ вся́чески не потопи́ша,/ в Небе́снем ны́не хра́ме моли́ Го́спода ви́дети нам.
И ны́не и при́сно и во ве́ки веко́в. Ами́нь.
Богородичен: Храм Богоприя́тный Ты еси́, Пречи́стая Богома́ти,/ изба́ви нас от трегла́внаго вредоно́сных страсте́й потопле́ния,/ созерца́ти же храм святы́й приложи́ нам/ и наслади́тися в нем Боже́ственныя ра́дости да́руй.
Кондак, глас 8
Я́ко Богонасажде́нное и Богоразу́мное дре́во в Росси́и возра́сл еси́/ и многопло́дием Богоподо́бных доброде́телей твои́х утучня́еши сердца́ благочести́вых./ Те́мже в кре́пости по́мощи твоея́, преблаже́нне Дании́ле,/ от вся́ких нас бед свободи́,/ да пое́м при́сно: Аллилу́ия.
Икос
А́нгел на земли́ показа́лся еси́,/ сла́вя непреста́нно Не́ба и земли́ Творца́ Го́спода Бо́га,/ вся́ким бо о́бразом во́лю Его́ во всей твое́й жи́зни испо́лните потща́лся еси́,/ всем благотворя́, прия́л еси́ от Христа́, я́ко апо́стол,/ благода́ть вся́кия бедоско́рбныя неду́ги и боле́зни цели́ти./ Те́мже вопие́м ти:/ ра́дуйся, о́тче, от младе́нчества Бо́гом избра́нный;/ ра́дуйся, Дании́ле, в гражда́нство Небе́сное зва́нный;/ ра́дуйся, Тро́ичным Све́том от купе́ли святы́я просвети́вся;/ ра́дуйся, ева́нгельский христоподража́тель и́стинне яви́вся;/ ра́дуйся, оте́чественнаго всеру́сска престо́ла насле́дник бы́вый;/ ра́дуйся, держа́ву вла́сти твоея́ благоче́стием и пра́вдою украси́вый;/ ра́дуйся, на враги́ злове́рцы и на враждотво́рцы от Бо́га получи́в побе́ды;/ ра́дуйся, оста́вль мир преле́стный и восприя́в отце́в святы́х сле́ды;/ ра́дуйся, в мона́шестве испо́лнився поста́, моли́тв, воздержа́ния;/ ра́дуйся, сподо́бився от Христа́ благода́ти чуде́с дарова́ния;/ ра́дуйся, я́ко в Не́бе со святы́ми Богонача́льную Тро́ицу зри́ши;/ ра́дуйся, оста́вль твоя́ мо́щи, по́мощь всем твори́ши./ Ра́дуйся, мы тебе́ принося́ще, пое́м Бо́гу: Аллилу́ия.
Песнь 7
Ирмос: Огня́ гаси́лище – отроко́в моли́твы,/ ороша́ющая пе́щь, пропове́дница чудесе́,/ не опаля́ющи, ниже́ сожига́ющи/ песносло́вцы Бо́га оте́ц на́ших.
Припев: Святы́й благове́рный кня́же Дании́ле, моли́ Бо́га о на́с.
О́гнь юновеще́ственныя пло́ти твоея́/ невеще́ственным пла́менем Бо́жия любве́, в моли́твах бо́дрствуя, погаси́л еси́, о́тче всече́стне./ Моли́ и нам не опали́тися огнестра́стием,/ да песносло́вим Бо́га оте́ц на́ших.
Припев: Святы́й благове́рный кня́же Дании́ле, моли́ Бо́га о на́с.
О́гнь присногоря́щия ве́ры ты, досточу́дне, в се́рдце твое́м содержа́в,/ восте́кл еси́ на высоту́ доброде́телей./ В пещи́ жегобе́дства мирска́го ороси́ нас благода́тию Христо́вою,/ песносло́вити Бо́га оте́ц на́ших.
Сла́ва Отцу́ и Сы́ну и Свято́му Ду́ху.
Огня́ свере́пство ви́димых враго́в и неви́димых, востаю́щих на град и насле́дие твое́,/ богоприя́тных твои́х моли́тв, Дании́ле блаже́нне, зале́й вода́ми,/ да, спа́сшеся от них, воспесносло́вим Бо́га оте́ц на́ших.
И ны́не и при́сно и во ве́ки веко́в. Ами́нь.
Богородичен: О́гнь Боже́ственный во чре́ве Твое́м прие́мши, Всечи́стая Де́во,/ родила́ еси́ всему́ ми́ру жи́зни Исто́чника – Христа́ Иису́са./ Моли́, е́же небото́чными благода́ти Бо́жия вода́ми/ огнепа́льному угаси́тися пла́мени прегреше́ний на́ших.
Песнь 8
Ирмос: А́нгелов сонм, челове́ков собо́р,/ Царя́ и Зижди́теля всех,/ свяще́нницы, по́йте, благослови́те, леви́ти,/ лю́дие, превозноси́те во вся ве́ки.
Припев: Святы́й благове́рный кня́же Дании́ле, моли́ Бо́га о на́с.
А́нгелы святы́я, во́лю Го́спода Бо́га сотворя́ющия, подража́я,/ схимона́шеский вели́кий о́браз восприе́м, о́тче Дании́ле,/ а́нгельски пожи́л еси́ во оби́тели святе́й,/ благохвали́ти вся лю́ди научи́в Го́спода во вся ве́ки.
Припев: Святы́й благове́рный кня́же Дании́ле, моли́ Бо́га о на́с.
А́нгелом небе́сным богомы́сленный собесе́дниче,/ боговенча́нный а́дских а́нгелов победи́телю, всеблаже́нне Дании́ле,/ удосто́ивыйся зре́ти Всецаря́ Иису́са,/ удосто́и нас зре́ти и хвали́ти Его́ во вся ве́ки.
Сла́ва Отцу́ и Сы́ну и Свято́му Ду́ху.
А́нгела Сове́та Вели́каго, Бо́га воплоще́нна,/ пропове́дал еси́ богочести́вым твои́м житие́м, о́тче, в концы́ земли́./ И ны́не твоя́ святы́я мо́щи, су́ще в созерца́нии,/ воздви́жут ве́рныя вся лю́ди воспева́ти Го́спода во ве́ки.
И ны́не и при́сно и во ве́ки веко́в. Ами́нь.
Богородичен: А́нгела Гаврии́ла глас ра́дованен услы́шавши, Де́во Боговлады́чице,/ ве́сь род челове́ческий обра́довала еси́ рождество́м Твои́м,/ изба́вльши нас от грехо́в на́ших, сподо́би ра́достне хвали́ти Го́спода во ве́ки.
Песнь 9
Ирмос: Велича́ем, Христе́,/ Твою́ Всенепоро́чную Ма́терь Чи́стую,/ я́ко роди́ Тя преесте́ственно пло́тию,/ от вся́кия льсти́ и тли нас избавля́яй.
Припев: Святы́й благове́рный кня́же Дании́ле, моли́ Бо́га о на́с.
Иерусали́м Го́рний,/ иде́же девятогу́бая иера́рхия святы́х А́нгелов богозри́тельне торжеству́ет,/ насле́довав, Богоблаже́нне Дании́ле о́тче,/ моли́ся, да, изба́вльшеся ле́сти и тли,/ Христа́ и Ма́терь Его́ Мари́ю ве́чно возвелича́ем.
Припев: Святы́й благове́рный кня́же Дании́ле, моли́ Бо́га о на́с.
Иерусали́м Го́рний,/ иде́же девятогу́бая иера́рхия святы́х А́нгелов богозри́тельне торжеству́ет,/ насле́довав, Богоблаже́нне Дании́ле о́тче,/ моли́ся, да, изба́вльшеся ле́сти и тли,/ Христа́ и Ма́терь Его́ Мари́ю ве́чно возвелича́ем.
Припев: Святы́й благове́рный кня́же Дании́ле, моли́ Бо́га о на́с.
Ре́вность ве́лию показа́л еси́ в Богоче́стии, Дании́ле блаже́нне,/ преизря́ден ре́снотив о́браз быв лю́дем твои́м,/ и во ангелочи́нстве бо схимона́шества благове́рне учи́л еси́ вся/ Бо́га и Богома́терь велича́ти.
Сла́ва Отцу́ и Сы́ну и Свято́му Ду́ху.
Ели́ко вели́к в православнокня́жестве, Богому́дре о́тче, быв,/ наипа́че смири́л еси́ себе́ схимонахогове́инством,/ те́мже Всеблаги́й Бог тя превознесе́/ и дарова́ тебе́ Небе́сное насле́дие и чуде́с благода́ть,/ е́юже исцеля́й ду́ши и телеса́ от вся́ких скорбе́й/ Иису́са и Мари́ю Де́ву велича́ющих.
И ны́не и при́сно и во ве́ки веко́в. Ами́нь.
Богородичен: Избавле́ние от тли и вся́кия ле́сти –/ Плотоно́сца Христа́ – родила́ еси́ нам, Всенепоро́чная Де́во./ Моли́ Его́ изба́вити нас от прегреше́ний/ и прекра́снаго рая́ сподо́бити насле́дства,/ да Тя при́сно велича́ем.
Светилен
Благоле́пною удо́бренный простото́ю,/ мы́сленный оре́л, небопа́рными доброде́телей кри́лы/ в Небе́сное возлете́л еси́ жили́ще,/ в не́мже, преподо́бне Дании́ле, жи́знию блаже́нною живя́й,/ Триипоста́сна Всеблага́го Жизнода́вца Бо́га мо́лиши/ жизнь нетле́нную нам дарова́ти,/ тя всеусе́рдно блажа́щим.
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.
Богородичен: Всея́ прему́дрости дом, Ду́ха Всесвята́го седмодарова́ньми утвержде́нный,/ Богоблаже́нная Цари́це, Де́во Мари́е Влады́чице,/ сла́вою в пресветлонебесове́чности почте́на,/ богоуго́ждшему отцу́ Дании́лу по́мощь в блаже́нство ева́нгельское пода́вшая,/ сотвори́ ны до́мы на вселе́ние Боже́ственное,/ во е́же его́ Всеправи́теля и Тя, Богома́терь,/ на земли́ и на Небеси́ сла́вити непреста́нно.
...
глас 8
Песнь 1
Ирмос: Поим Господеви, проведшему люди Своя сквозе Чермное море, яко Един славно прославися.
О Царстве Небеснем выну помышляя, земную оставил еси власть, Единаго всех Царя Бога возлюбив, с Нимже ныне водворяяся в Небесных обителех, моли Его о чтущих тя, досточудне Данииле.
От самых пелен матерних избра тя Владыка, и, яко храм честный и непорочный, душу твою освяти, и предуготова в жилище Себе, и прослави тя в чудесех, Богоблаженне угодниче Христов Данииле.
Младенец по Божественном родителе твоем оставлься, Богом воспитан и наставлен еси, всех родительских дел истинное зерцало показался еси, блаженне.
Богородичен: Яко Деву Едину в женах, Тя, без семене рождшую Бога плотию, вси ублажаем, роди человечестии, и, надежду на Тя возложивше, спасаемся, и, к Тебе прибегающе, от всяких бед свобождаемся.
Песнь 3
Ирмос: Ты еси утверждение притекающих к Тебе, Господи, Ты еси Свет омраченных, и поет Тя дух мой.
Плодными добродетельми украшаемь, всяку тлеемую сладость житейскую яве отразил еси, к Божией доброте непрестанно взирая.
Яко украшением чудес одеян всегда, чудотворец явился еси, мирскаго убо вреда и нас избави, блаженне, да поем выну Бога, прославльшаго тя.
Целомудрие соблюд и евангельским украшен разумом, смиренномудрствовал еси о Христе и ныне с Ним вечно радуешися.
Богородичен: Родила еси, Мати Дево Чистая, Свет неприступный, Иже весь мир просвещает ясносиятельными зарями Своего Божества.
Седален, глас 4
От корене благаго прекрасная ветвь израсл еси и, аки благоуханный крин, добродетельми украшен был еси, призирая милостию на нища и убога и на вся подвластныя тебе люди, блаженне и приснопамятне княже Данииле, зловерныя же и враждебныя в любовь и смирение преклонив, в бдениих и трудех богоугодно пожил еси и достойную мзду от Господа твоего приял еси. Того убо моли даровати душам нашим мир и велию милость.
Песнь 4
Ирмос: Пророк Аввакум умныма очима провиде, Господи, пришествие Твое, тем и вопияше: от юга приидет Бог. Слава силе Твоей, слава снизхождению Твоему.
Умертвил еси вся плоти смертоносныя страсти благодатию Христовою, тем животворными твоих чудес приложеньми страждущия оживи и врат смертных избави.
Щитом оградився благочестия, был еси, блаженне, образ людем Господним в начальстве княжения и в пребывании монашества, тем вси тебе ублажаем.
Источник чудес явился еси, Богоблаженне княже Данииле: к тебе верою приходящии и кланяющиися честней твоей раке, желаемая приемлют исцеления.
Богородичен: Матерь Тя Божию вемы вси и по рождестве явльшуюся нетленну Деву. Тем моли из Тебе Рождшагося, да избавит вечнаго тления всех, верою воспевающих Тя.
Песнь 5
Ирмос: Утренююще, вопием Ти: Господи, спаси ны, Ты бо еси Бог наш, разве Тебе, иного не вемы.
Текущая и тленная презрев, нетленная сподобился еси зрети, идеже выну Христа прославляя, моли Его, да нас вечныя Своея славы наследники покажет.
Благонравно и добродетельно в княжестве пожил еси, и, ангельскому подражав житию, во обитель вселился еси, юже сам еси создал, и, в ней чистым пожив житием, ныне в Небесных водворяешися обителех.
Яко предстателя тя и заступника граду твоему и обители твоей и всем людем российским показа Бог, защищай убо град твой, мирну же и во всем довольну соделай обитель и людем твоим спасение исходатайствуй.
Богородичен: Пренепорочная Нетленная Отроковице, Богомати Владычице, призри на рабы Твоя, верно прибегающая под кров Твой, и моли Сына Своего от всяких бед избавити нас.
Песнь 6
Ирмос: Ризу мне подаждь светлу, одеяйся светом, яко ризою, Многомилостиве Христе Боже наше.
Дар Божий желаемый дался еси России, богатыми чудес дарами сияющ, тем, выну Троичными озарении осияваем, множеству святых лик сликовствовати сподобился еси.
Рака, идеже лежат честныя твоя и святыя мощи, Богоблаженне Данииле, источник чудес изливает с верою приходящим и покланяющимся тебе.
Блажен град, блаженна и обитель, в нейже в житии твоем подвизатися изволил еси, и по смерти твоей, яко многоценный дар, мощи твоя оставив, призираеши на всех, живущих в ней.
Богородичен: Во многия беды и напасти впад, бурею одержим безчисленных согрешений, сего ради к Тебе, яко к теплому предстательству, прибегаю, Дево: моли из Тебе воплощшагося Бога, да прегрешений оставление подаст рабу Твоему.
Кондак, глас 4
Избранный Богом от чресл родительских и воспитанный от младенчества в законе Господни в мужа совершенна и Промыслом Вышняго, именитаго града Москвы наследие княжества прием, верен строитель благочестивым людем твоим показался еси, Богоблаженне Данииле, ихже образом своим наставляя и поучая заповедем Господним выну, путем, ведущим в живот вечный, присно шествуя, Небеснаго Царства достигл еси, идеже со ангельскими водворяяся лики, поеши Богу: Аллилуиа.
Икос
Ангел во плоти на земли показался еси, Богомудре княже Данииле, славя непрестанно Творца небу и земли, всяким бо образом волю Его чрез всю твою жизнь исполнити потщался еси, всем благотворя, приял еси от Христа дар чудотворения, темже зовем ти: радуйся, яко от младенчества Богом избранный; радуйся, яко Темже в гражданство Небесное званный. Радуйся, яко державу власти твоея благочестием и правдою украсил еси; радуйся, яко на враги зловерцы и враждотворцы от Бога получивый победы. Радуйся, яко, оставив мир прелестный, к тихому пристанищу равноангельскаго жития притекл еси, в немже показал еси всем образ воздержания; радуйся, яко за толикия подвиги твоя сподобивыйся от Христа благодати и чудес дарования. Радуйся, яко в Небе со всеми святыми Живоначальную Троицу зриши и Той выну поеши: Аллилуиа.
Песнь 7
Ирмос: Отроцы еврейстии в пещи попраша пламень дерзновенно и на росу огнь преложиша, вопиюще: благословен еси, Господи Боже, во веки.
Стопам последуя яве всеблаженнаго родителя твоего Александра, Богомудре приснопамятне Данииле, наследие княжества Московскаго восприял еси, последи же иноческим житием прешел еси в Горняя обители, идеже выну поеши отцев Бога Благословеннаго.
В постничестве и бденных молитвах богомудренно пожил еси и непрестанно славил Творца твоего, воспевая Ему: отцев Боже, благословен еси.
Богородичен: Яко Красная, Краснаго родила еси, безобразие наше обратившаго в первый образ, Отроковице Всенепорочная, Емуже поем: отцев Боже, благословен еси.
Песнь 8
Ирмос: Богоглаголивии отроцы, в пещи со огнем пламень попирающе, пояху: благословите, дела Господня, Господа.
Днесь великаго града Москвы народи, стекшеся отвсюду в честную обитель благовернаго князя Даниила, в день празднственный памяти его, Творцу воспоем: благословите, дела Господня, Господа.
Приидите, вси святители и вси священных собори, в храм Бога нашего, идеже лежат мощи великаго князя Даниила, ихже облобызающе, Творцу вопием: благословите, дела Господня, Господа.
Днесь Церковь Христова, празднующи Даниилово торжество, сущее о Бозе, всех созывает верных к похвале угодника Христова, иже исцеление источает верою приходящих к нему и поющим Творцу: благословите, дела Господня, Господа.
Богородичен: Глаголом Исаии пророка последующе, Богородицу Тя исповедуем: родила бо еси Отроча, всех древнейшее, нарицаемое Еммануил, Емуже зовем: благословите, дела Господня, Господа.
Песнь 9
Ирмос: Чистую славно почтим, людие, Богородицу, огнь Божества приимшую во чреве неопально, песньми величаем.
Едино Божество в Триех Ипостасех, Богоначальную и Всетворящую Вину в житии твоем присно величал еси, предстоя Ему, моли о людех твоих, во еже от всяких бед и напастей спастися им.
Ревность великую показал еси к благочестию, Данииле блаженне, преизряден образ быв всем людем твоим, тем ныне предстоя всех Творцу, молися, да от всех бед и искушений избавит и наследники Царствия Своего покажет ны.
Елико велик в православном княжении твоем, Богомудре княже Данииле, был еси, толико смирил еси себе, темже Всеблагий Бог тя превознесе и дарова тебе Небесное наследие и чудес благодать, юже верным людем твоим милостивно подаваяй, ко Господу о нас помолися.
Богородичен: Избавителя и Спаса нашего родила еси, Всенепорочная Дево, Сего убо моли избавити нас прегрешений наших и наследники Царствия Своего сотворити, да Тя, Предстательницу нашу, присно величаем.
Светилен
Богоначальныя и Всебожественныя Троицы Светом озарився, свет, добросияющий благодатию Иисус Христовою, всей России явился еси, благородный Данииле, озаритися убо и нам Пребожественным светом Живоначальную Троицу моли, да, с тобою вечныя радости наслаждающеся, воспоем Бога, прославльшаго тя.
...
Минея, 4 Марта.
Глас 4
Песнь 1
Ирмос: Мо́ря чермну́ю пучи́ну/ невла́жными стопа́ми/ дре́вний пешеше́ствовав Изра́иль,/ крестообра́зныма Моисе́овыма рука́ма/ Амали́кову си́лу в пусты́ни победи́л е́сть.
Припев: Святы́й благове́рный кня́же Дании́ле, моли́ Бо́га о на́с.
Просвети́ ми ум и озари́ моя́ чу́вства,/ согреше́ний мрак души́ моея́ отгна́в, Христе́ Бо́же,/ да чи́стою со́вестию возмогу́ песнь соста́вити и возвели́чити Твоего́ уго́дника,/ блаже́ннаго кня́зя Дании́ла.
Припев: Святы́й благове́рный кня́же Дании́ле, моли́ Бо́га о на́с.
Светолу́чными блиста́нии Ду́ха Свята́го осиява́емый,/ яви́лся еси́ пресве́тлый свети́льник Росси́йския земли́, Богому́дре Дании́ле,/ тем ны́не светоза́рному Тро́ическому Све́ту предстоя́,/ моли́ о насле́дии земли́ твоея́.
Сла́ва Отцу́ и Сы́ну и Свято́му Ду́ху.
Измла́да себе́ сама́го Бо́гу освяти́л еси́/ и чрез всю жизнь твою́ был еси́ и́стинный Христо́ва Ева́нгелия подража́тель,/ тем и насле́дник Боже́ственнаго Ца́рствия позна́лся еси́, приснопа́мятне кня́же Дании́ле.
И ны́не и при́сно и во ве́ки веко́в. Ами́нь.
Богородичен: Седя́щаго на Херуви́мех Творца́ Ты Еди́на, Богоневе́сто, на объя́тиих носи́ти сподо́билася еси́/ и яви́лася еси́ от всех родо́в Бо́га Сло́ва Прия́телище досто́йное.
Песнь 3
Ирмос: Весели́тся о Тебе́ Це́рковь Твоя́, Христе́, зову́щи:/ Ты моя́ кре́пость, Го́споди,/ и прибе́жище, и утвержде́ние.
Припев: Святы́й благове́рный кня́же Дании́ле, моли́ Бо́га о на́с.
Зако́ну Спа́сову покаря́яся, всесла́вне Дании́ле,/ сладостра́стие плотско́е отри́нул еси́,/ доброде́тельною же душе́ю све́тло просвещаяся,/ Небе́снаго Ца́рствия дости́гл еси́.
Припев: Святы́й благове́рный кня́же Дании́ле, моли́ Бо́га о на́с.
Вели́кое Це́ркви был еси́ украше́ние,/ в не́йже Христу́, Царю́ сла́вы, насле́дник Небе́снаго хра́ма показа́лся еси́, блаже́нне,/ иде́же со А́нгелы уже́ пе́ти Творцу́ удосто́ился еси́.
Сла́ва Отцу́ и Сы́ну и Свято́му Ду́ху.
Терпя́, потерпе́л еси́ Го́спода, и услы́ша тя,/ и внят гла́су непреста́ннаго моле́ния твоего́,/ и воззва́ тя к ве́чному весе́лию, ра́йскаго сотвори́в насле́дника.
И ны́не и при́сно и во ве́ки веко́в. Ами́нь.
Богородичен: Влады́чице Блага́я,/ всех Творца́ во утро́бе Твое́й заче́ншая и ро́ждшая ми́ру Спа́са и Го́спода,/ Его́же моли́, да изба́вит нас от вся́ких искуше́ний/ и в чи́стом житии́ соблюде́т нас.
Седален, глас 4
От ко́рене блага́го прекра́сная ве́твь изра́сл еси́/ и, а́ки благоуха́нный крин, доброде́тельми укра́шен был еси́,/ призира́я ми́лостию на ни́ща и убо́га/ и на вся подвла́стныя тебе́ лю́ди, блаже́нне и приснопа́мятне кня́же Дании́ле,/ злове́рныя же и вражде́бныя в любо́вь и смире́ние преклони́в,/ в бде́ниих и труде́х богоуго́дно пожи́л еси́/ и досто́йную мзду от Го́спода твоего́ прия́л еси́./ Того́ у́бо моли́ дарова́ти душа́м на́шим мир и ве́лию ми́лость.
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.
Богородичен: Боже́ственная ски́ния была́ еси́, Еди́на Пречи́стая Де́во Ма́ти,/ чистото́ю А́нгелы превозше́дшая и заче́ншая во утро́бе Свое́й Пребезнача́льнаго Сло́ва, Собезнача́льна же Отцу́,/ и Сего́ всему́ ми́ру Изба́вителя ро́ждшая,/ мене́, па́че всех оскверне́нна плотски́ми прегреше́ньми, очи́сти моли́тв Твои́х Боже́ственными вода́ми,/ подаю́щи души́ мое́й мир и ве́лию ми́лость.
Песнь 4
Ирмос: Вознесе́на Тя ви́девши Це́рковь на Кресте́,/ Со́лнце Пра́ведное,/ ста в чи́не свое́м,/ досто́йно взыва́ющи:/ сла́ва си́ле Твое́й, Го́споди.
Припев: Святы́й благове́рный кня́же Дании́ле, моли́ Бо́га о на́с.
Я́ко же зла́то огне́м, свяще́ннейше,/ воздержа́нием честно́е те́ло твое́ очи́стив, кра́сно показа́л еси́ Творцу́,/ сего́ ра́ди тебе́ порфи́ру нетле́нну ве́чнаго блаже́нства дарова́.
Припев: Святы́й благове́рный кня́же Дании́ле, моли́ Бо́га о на́с.
Род, и бога́тство, и держа́ву Христа́ ра́ди оста́вив/ и взем крест свой, подвиза́лся еси́ боголе́пно,/ тем ны́не с преподо́бных ли́ки ра́дуешися.
Сла́ва Отцу́ и Сы́ну и Свято́му Ду́ху.
Ревнова́в в доброде́телех Богому́дрым отце́м,/ Ева́нгельское се́мя Бо́жия словесе́ в се́рдце твое́м насади́л еси́, и плод прине́сл еси́ Влады́це,/ тем и мзду от Него́ прия́л еси́ досто́йную.
И ны́не и при́сно и во ве́ки веко́в. Ами́нь.
Богородичен: Родила́ еси́ в ле́то Безле́тнаго, Пречи́стая, бы́вша Богочелове́ка,/ Того́ у́бо приле́жно моли́, да свободи́т ве́чнаго муче́ния/ и спасе́т по о́бразу Своему́ созда́ннаго челове́ка.
Песнь 5
Ирмос: Ты, Го́споди, мой Свет,/ в мир прише́л еси́,/ Свет святы́й, обраща́яй из мра́чна неве́дения/ ве́рою воспева́ющия Тя.
Припев: Святы́й благове́рный кня́же Дании́ле, моли́ Бо́га о на́с.
Огне́м любве́ Бо́жия непреста́нно распаля́яся,/ оста́вив мир, во оби́тели мона́шествовати изво́лил еси́, всече́стне,/ тем дарова́ньми Ду́ха Свята́го обогаще́н,/ чудоде́йством лю́ди спаса́еши.
Припев: Святы́й благове́рный кня́же Дании́ле, моли́ Бо́га о на́с.
Се храм твой чудесы́ всеблаголе́пно, я́ко звезда́ми све́тлыми, украша́ется,/ и, веселя́ся, всегда́ блажи́тся и всечестну́ю твою́ па́мять пра́зднует благоче́стно,/ вели́кий чудотво́рче Дании́ле.
Сла́ва Отцу́ и Сы́ну и Свято́му Ду́ху.
Разли́чных напа́стей и бед нахожде́ние твои́ми моли́твами отрази́, Богоблаже́нне кня́же Дании́ле,/ и всем, усе́рдно соверша́ющим всепра́зднственную па́мять твою́, грехо́в оставле́ние испроси́.
И ны́не и при́сно и во ве́ки веко́в. Ами́нь.
Богородичен: Тебе́ Еди́ну по Бо́зе и́мамы Предста́тельницу ро́да на́шего,/ Тебе́ у́бо про́сим, я́ко и́маши дерзнове́ние к Сы́ну Твоему́ и Бо́гу на́шему,/ помоли́ся к Нему́, во е́же спасти́ся нам.
Песнь 6
Ирмос: Пожру́ Ти со гла́сом хвале́ния, Го́споди,/ Це́рковь вопие́т Ти,/ от бесо́вския кро́ве очи́щшися/ ра́ди ми́лости от ребр Твои́х/ исте́кшею Кро́вию.
Припев: Святы́й благове́рный кня́же Дании́ле, моли́ Бо́га о на́с.
Предстоя́ при́сно Престо́лу Тро́ичныя благода́ти,/ со все́ми ра́дуяся А́нгелы и ми́ру исцеле́ний бога́тство подава́я,/ спаси́ всех нас моли́твами твои́ми.
Припев: Святы́й благове́рный кня́же Дании́ле, моли́ Бо́га о на́с.
Отверзо́шася тебе́ две́ри Еде́мския,/ и жи́тели Небе́сныя с вели́ким весе́лием и ра́достию тя прия́ша,/ иде́же с ни́ми ра́дуяся, вы́ну всех ми́лостивно посеща́й/ и ве́рно чту́щих тя помина́й.
Сла́ва Отцу́ и Сы́ну и Свято́му Ду́ху.
Яви́лся еси́ лю́дем твои́м предста́тель те́плый,/ вдов и сиро́т засту́пник,/ ни́щих пита́тель, скорбя́щих утеше́ние,/ гра́ду и оби́тели твое́й утвержде́ние.
И ны́не и при́сно и во ве́ки веко́в. Ами́нь.
Богородичен: Яви́лася еси́ Изба́вительница ро́да челове́ческаго, Ма́ти Бо́га на́шего,/ тем Ти ве́рно припа́даем:/ Сы́на Твоего́, я́ко Бла́га, моли́, Всенепоро́чная,/ от вся́ких бед и искуше́ний изба́вити ны.
Кондак, глас 4
Избра́нный Бо́гом от чресл роди́тельских/ и воспи́танный от младе́нчества в зако́не Госпо́дни в му́жа соверше́нна/ и Про́мыслом Вы́шняго, имени́таго гра́да Москвы́ насле́дие кня́жества прие́м,/ ве́рен строи́тель благочести́вым лю́дем твои́м показа́лся еси́, Богоблаже́нне Дании́ле,/ и́хже о́бразом свои́м наставля́я/ и поуча́я за́поведей Госпо́дним вы́ну,/ путе́м, веду́щим в живо́т ве́чный, при́сно ше́ствуя,/ Небе́снаго Ца́рства дости́гл еси́,/ иде́же со а́нгельскими водворя́яся ли́ки, пое́ши Бо́гу: Аллилу́ия.
Икос
А́нгел во пло́ти на земли́ показа́лся еси́, Богому́дре кня́же Дании́ле,/ сла́вя непреста́нно Творца́ не́бу и земли́,/ вся́ким бо о́бразом во́лю Его́ чрез всю твою́ жизнь испо́лнити потща́лся еси́,/ всем благотворя́, прия́л еси́ от Христа́ дар чудотворе́ния,/ те́мже зове́м ти:/ ра́дуйся, я́ко от младе́нчества Бо́гом избра́нный;/ ра́дуйся, я́ко Те́мже в гражда́нство Небе́сное зва́нный./ Ра́дуйся, я́ко держа́ву вла́сти твоея́ благоче́стием и пра́вдою украси́л еси́;/ ра́дуйся, я́ко на враги́ злове́рцы и враждотво́рцы от Бо́га получи́вый побе́ды./ Ра́дуйся, я́ко, оста́вив мир преле́стный, к ти́хому приста́нищу равноа́нгельскаго жития́ прите́кл еси́,/ в не́мже показа́л еси́ всем о́браз воздержа́ния;/ ра́дуйся, я́ко за толи́кии по́двиги твоя́ сподо́бивыйся от Христа́ благода́ти и чуде́с дарова́ния./ Ра́дуйся, я́ко в Не́бе со все́ми святы́ми Живонача́льную Тро́ицу зри́ши/ и Той вы́ну пое́ши: Аллилу́ия.
Песнь 7
Ирмос: В пещи́ авраа́мстии о́троцы перси́дстей,/ любо́вию благоче́стия па́че,/ не́жели пла́менем, опаля́еми, взыва́ху:/ благослове́н еси́ в хра́ме сла́вы Твоея́, Го́споди.
Припев: Святы́й благове́рный кня́же Дании́ле, моли́ Бо́га о на́с.
У́треневав к Бо́гу от младе́нчества, всебога́те,/ тьмы́ избе́гл еси́ теле́сных страсте́й,/ воздержа́нием и да́ром чуде́с обогати́лся еси́, преподо́бне,/ и ны́не с Го́рними водворя́яся ли́ки, пое́ши Творцу́:/ благослове́н еси́ в хра́ме сла́вы Твоея́, Го́споди.
Припев: Святы́й благове́рный кня́же Дании́ле, моли́ Бо́га о на́с.
Во всю Росси́ю про́йде сла́ва чуде́с Твои́х, блаже́нне,/ и́миже просвети́л еси́ лю́ди твоя́,/ и́же, твои́м чудоде́йством от вся́ких бед и напа́стей избавля́еми, пою́т Творцу́:/ благослове́н еси́ в хра́ме сла́вы Твоея́, Го́споди.
Сла́ва Отцу́ и Сы́ну и Свято́му Ду́ху.
Пе́сньми и пе́ньми духо́вными хва́лим тя, блаже́нне,/ и честну́ю твою́ и многоцеле́бную обстоя́ще ра́ку, си́це вопие́м просла́вльшему тя Творцу́:/ благослове́н еси́ в хра́ме сла́вы Твоея́, Го́споди.
И ны́не и при́сно и во ве́ки веко́в. Ами́нь.
Богородичен: Де́ва пребыла́ еси́ по рождестве́,/ я́коже была́ еси́ пре́жде рождества́,/ Бо́га бо Сло́ва родила́ еси́, избавля́ющаго ны хода́тайством Твои́м,/ Ему́же, ве́рнии, непреста́нно пое́м:/ благослове́н еси́ в хра́ме сла́вы Твоея́, Го́споди.
Песнь 8
Ирмос: Ру́це распросте́р, Дании́л/ льво́в зия́ния в ро́ве затче́;/ о́гненную же си́лу угаси́ша,/ доброде́телию препоя́савшеся,/ благоче́стия рачи́тели, о́троцы, взыва́юще:/ благослови́те, вся дела́ Госпо́дня, Го́спода.
Припев: Святы́й благове́рный кня́же Дании́ле, моли́ Бо́га о на́с.
Досто́йно дне́сь в преставле́нии твое́м торжеству́ет держа́вный град Москва́,/ досто́йно и оби́тель твоя́ честна́я, ю́же созда́л еси́,/ в ней же святы́я твоя́ почива́ют мо́щи, ублажа́я тя, Творцу́ взыва́ет:/ благослови́те, вся дела́ Госпо́дня, Го́спода.
Припев: Святы́й благове́рный кня́же Дании́ле, моли́ Бо́га о на́с.
Ми́лостивными твои́ми щедро́тами ни́щих и убо́гих напита́л еси́/ и сам от Христа́ ве́чную получи́л еси́ ми́лость,/ Ему́же вы́ну предстоя́, со А́нгелы пое́ши:/ благослови́те, вся дела́ Госпо́дня, Го́спода.
Сла́ва Отцу́ и Сы́ну и Свято́му Ду́ху.
Вели́кое твое́ заступле́ние и предста́тельство воспомина́ем, Богоблаже́нне кня́же Дании́ле,/ и сего́ ра́ди собра́вшеся в день па́мяти твоея́,/ я́ко о́бщему всех нас засту́пнику, хвалу́ воздае́м ти, воспева́юще:/ благослови́те, вся дела́ Госпо́дня, Го́спода.
И ны́не и при́сно и во ве́ки веко́в. Ами́нь.
Богородичен: Вседержи́тельною си́лою нося́й вся́ческая/ в челове́ческую пло́ть из Тебе́ оде́яся, Де́во Всенепоро́чная, на благодея́ние пою́щим:/ благослови́те, вся дела́ Госпо́дня, Го́спода.
Песнь 9
Ирмос: Ка́мень нерукосе́чный/ от несеко́мыя горы́, Тебе́, Де́во,/ краеуго́льный отсече́ся,/ Христо́с, совокупи́вый разстоя́щаяся естества́./ Тем, веселя́щеся, Тя, Богоро́дице, велича́ем.
Припев: Святы́й благове́рный кня́же Дании́ле, моли́ Бо́га о на́с.
Дне́сь сте́кшеся во оби́тель твою́ и в храм Бо́га на́шего, благове́рный кня́же Дании́ле, приле́жно мо́лимтися:/ пода́ждь лю́дем ми́рное здра́вие и в ско́рбех ра́достное утеше́ние,/ да тя, ско́раго защи́тника на́шего, ве́рою ублажа́ем.
Припев: Святы́й благове́рный кня́же Дании́ле, моли́ Бо́га о на́с.
Основа́теля и первонача́льника, кня́зя гра́да Москвы́, Богоблаже́нне кня́же Дании́ле, показа́ тя Госпо́дь,/ к Нему́же непреста́нно моля́ся, град и оби́тель твою́ от вся́ких бед спаса́й и ми́лостивно посеща́й.
Сла́ва Отцу́ и Сы́ну и Свято́му Ду́ху.
Па́мять пра́здника твоего́ хва́ляще,/ вси лю́дие твои́ со мно́жеством и́ночествующих по́стник покланя́ются тебе́/ и, ви́дяще от Бо́га да́нная ти пресла́вная чудеса́, про́сят от Тебе́ ми́лости,/ и́хже моле́ния не пре́зри.
И ны́не и при́сно и во ве́ки веко́в. Ами́нь.
Богородичен: Свет ро́ждшая – Иису́са Го́спода,/ просвеща́яй вся́каго челове́ка, Де́во Богома́ти,/ тем Тя мо́лим:/ от вся́ких бед и напа́стей лю́ди Твоя́ изба́ви,/ да Тя, Засту́пницу ро́да на́шего, при́сно велича́ем.
Светилен
Богонача́льныя и Всебоже́ственныя Тро́ицы Све́том озари́вся,/ свет, добросия́ющий благода́тию Иису́с Христо́вою,/ всей Росси́и яви́лся еси́, благоро́дный кня́же Дании́ле,/ озари́тися у́бо и нам Пребоже́ственным све́том Живонача́льную Тро́ицу моли́,/ да, с тобо́ю ве́чныя ра́дости наслажда́ющеся, воспое́м Бо́га, просла́вльшаго тя.
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.
Богородичен: Всю наде́жду спасе́ния на́шего на Тя возлага́ем, Богома́ти Неискусобра́чная,/ и на по́мощь при́сно Тя призыва́ем:/ от напа́сти врага́ и печа́ли спаси́ нас,/ грехо́вныя плени́цы зол на́ших разреша́я, ве́чнаго огня́ исхити́,/ да Тя, Предста́тельницу ро́да на́шего, при́сно велича́ем.