Глас 1
Песнь 1
Ирмос: Твоя́ победи́тельная десни́ца/ боголе́пно в кре́пости просла́вися:/ та бо, Безсме́ртне,/ я́ко всемогу́щая проти́вныя сотре́,/ изра́ильтяном путь глубины́ новосоде́лавшая.
Припев: Пресвята́я Богоро́дице, спаси́ на́с.
Очи́стим чу́вствия и у́зрим в непристу́пней све́те Ма́терь Све́та,/ в ико́не Свое́й чудотво́рней чудесы́ пресла́вными сия́ющу/ и ду́ши на́ша озаря́ющу, да ра́дуемся, зову́ще:/ ра́дуйся, Ма́ти Госпо́дня.
Припев: Пресвята́я Богоро́дице, спаси́ на́с.
Небеса́ у́бо да веселя́тся, земля́ же да ра́дуется,/ зря́щи чудеса́ ве́лия, ико́ною Присноде́вы быва́емая,/ да пра́зднует же град Лю́беч све́тло чудотво́рныя ико́ны Богома́тери день явле́ния,/ сию́ почита́я, я́ко сте́ну огражде́ния.
Сла́ва Отцу́ и Сы́ну и Свято́му Ду́ху.
Умерщвле́ния преде́л сломи́ла еси́, Влады́чице,/ ве́чную Жизнь ро́ждши – Христа́,/ Его́же я́ко Младе́нца на руку́ Твое́ю носи́ла еси́,/ я́коже Тя на ико́не Твое́й святе́й ви́дим, Де́во Всенепоро́чная.
И ны́не и при́сно и во ве́ки веко́в. Ами́нь.
Воскресе́ния ме́ртвых Вино́вника и Жизнода́вца ро́ждшая, Богоблагода́тная,/ е́же ра́дуйся от всех родо́в христиа́нских слы́шиши,/ ико́ною же Твое́ю свято́ю ве́рныя утеша́еши и подвиза́еши вопи́ти Тебе́:/ ра́дуйся, Мари́е Всеблагослове́нная.
Песнь 3
Ирмос: Еди́не, ве́дый челове́ческаго существа́ не́мощь/ и ми́лостивно в не вообра́жся,/ препоя́ши мя с высоты́ си́лою,/ е́же вопи́ти Тебе́, Святы́й,/ одушевле́нный Хра́ме, неизрече́нныя сла́вы Твоея́, Человеколю́бче.
Припев: Пресвята́я Богоро́дице, спаси́ на́с.
Ны́не гра́да Лю́беча лю́дие испо́лнишася ра́дости/ явле́нием чудотво́рныя ико́ны Твоея́, Богоро́дице,/ и пра́зднуют све́тло пра́здник Ея́ явле́ния,/ я́ко вои́стинну торжество́ Правосла́вия/ и е́ресей посрамле́ние Твое́ю си́лою, Влады́чице.
Припев: Пресвята́я Богоро́дице, спаси́ на́с.
Виждь, Чи́стая, правосла́вных собо́ры,/ на поклоне́ние чудотво́рному о́бразу Твоему́ гряду́щия./ Виждь и нас, гре́шных, к многоцеле́бному о́бразу Твоему́ с любо́вию припа́дающих,/ грехо́в разреше́ния и жития́ исправле́ния прося́щих,/ и не лиши́ нас Ма́терняго Твоего́ заступле́ния, Всенепоро́чная.
Сла́ва Отцу́ и Сы́ну и Свято́му Ду́ху.
Тече́т струя́ чуде́с незави́стная/ от ико́ны Твоея́ чи́стыя, Богоро́дице Де́во,/ от нея́же ве́рили исцеле́ние и утеше́ние прие́млют, моля́щеся те́пле,/ зол избавле́ние и ве́лию Твою́ ми́лость, Пречи́стая.
И ны́не и при́сно и во ве́ки веко́в. Ами́нь.
Все́ю душе́ю и мы́слию смире́нною чудеса́ Твоя́ сла́вим, Влады́чице,/ с любо́вию предстоя́ще чудотво́рней Твое́й ико́не,/ в не́йже зало́г благоволе́ния Твоего́ нам дарова́ла еси́, Богоневе́сто./ Те́мже неотсту́пна бу́ди от нас Твое́ю ми́лостию.
Седален, глас 2
Моле́ния на́ша, со усе́рдием приноси́мыя Тебе́ пред чудотво́рною ико́ною Твое́ю, Богома́ти пречи́стая,/ ми́лостивно услы́ши и бу́ди нам покро́в держа́вен и заступле́ние кре́пкое от враг ви́димых и неви́димых,/ предвари́ и от бед изба́ви нас, Влады́чице Всеблага́я,/ еди́на, вско́ре предста́тельствующая.
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.
Богородичен: Моле́ния на́ша, со усе́рдием приноси́мыя Тебе́ пред чудотво́рною ико́ною Твое́ю, Богома́ти пречи́стая,/ ми́лостивно услы́ши и бу́ди нам покро́в держа́вен и заступле́ние кре́пкое от враг ви́димых и неви́димых,/ предвари́ и от бед изба́ви нас, Влады́чице Всеблага́я,/ еди́на, вско́ре предста́тельствующая.
Песнь 4
Ирмос: Го́ру Тя, благода́тию Бо́жиею приосене́нную,/ прозорли́выми Авваку́м усмотри́в очи́ма,/ из Тебе́ изы́ти Изра́илеву провозглаша́ше Свято́му/ во спасе́ние на́ше и обновле́ние.
Припев: Пресвята́я Богоро́дице, спаси́ на́с.
Се Пречи́стыя раб, преподо́бный Анто́ний, неви́димо гряде́т к нам от Го́рних высо́т/ сопра́здновати с на́ми день явле́ния чудотво́рныя ико́ны Богома́тери,/ е́юже оте́чествие его земно́е просла́вися чудесы́,/ в не́мже сла́вится и́мя Твое́, Мари́е Богоблагода́тная.
Припев: Пресвята́я Богоро́дице, спаси́ на́с.
Избра́нник Твой, Госпоже́,/ на горе́ Пече́рстей оби́тель пресла́вну во и́мя Твое́ созда́ и огради́, преподо́бный Анто́ний,/ зде же, во оте́чествии его́ земне́м, просла́вися чудесы́ Твой о́браз святы́й,/ Твои́м благоволе́нием, Влады́чице.
Сла́ва Отцу́ и Сы́ну и Свято́му Ду́ху.
Богооте́ц у́бо Дави́д пред се́нным ковче́гом скака́ше, игра́я,/ мы же, веселя́щеся о Твое́м заступле́нии, Де́во,/ Твою́ чудотво́рную ико́ну ра́достно окружа́ем/ и сию́ любе́зно лобыза́ем, зову́ще:/ Ты еси́ на́ше ра́дование, сла́ва и похвала́, Богоневе́сто.
И ны́не и при́сно и во ве́ки веко́в. Ами́нь.
Ре́ку исцеле́ний и исто́чник чуде́с/ ико́ну Твою́ святу́ю по достоя́нию имену́ем, Богоро́дице,/ е́юже град Лю́беч све́тло красу́ется,/ стяжа́в в себе́ толи́кий дар Твоея́ ми́лости,/ и благода́рно славосло́вит Твое́ ему́ заступле́ние.
Песнь 5
Ирмос: Просвети́вый сия́нием/ прише́ствия Твоего́, Христе́,/ и освети́вый Кресто́м Твои́м ми́ра концы́,/ сердца́ просвети́ све́том Твоего́ Богоразу́мия/ правосла́вно пою́щих Тя.
Припев: Пресвята́я Богоро́дице, спаси́ на́с.
Безме́рное милосе́рдие Твое́ познае́м, Влады́чице,/ в чудесе́х пресла́вных, от ико́ны Твоея́ быва́емых./ Сего́ ра́ди че́ствуем ю с любо́вию и благогове́нием,/ и ра́бски пред не́ю Тебе́ вопие́м:/ ра́дуйся, ра́дости на́шея Вино́внице/ и спасе́ния на́шего Хода́таице, Мари́е Благода́тная.
Припев: Пресвята́я Богоро́дице, спаси́ на́с.
Присту́пим, ве́рнии, с любо́вию к чудотво́рному о́бразу Присноде́вы/ и поклони́мся ему́ со благогове́нием,/ се бо в нем чуде́с си́лу проявля́ет Всеблага́я Влады́чица и вся спаса́ет,/ с ве́рою несомне́нною почита́ющих пречи́стаго ли́ка Ея́ подо́бие.
Сла́ва Отцу́ и Сы́ну и Свято́му Ду́ху.
Неотсту́пна бу́ди, Влады́чице, по́мощию Твое́ю и заступле́нием/ нам, смире́нным рабо́м Твои́м,/ и я́коже избра́ннику Твоему́, преподо́бному Анто́нию, ми́лость Твою́ яви́ла еси́,/ си́це и нам, во оте́чествии его́ Тя пою́щим, покажи́ милосе́рдие Твое́ неисче́тное,/ в житии́ на́шем и при кончи́не нас при́сно заступа́ющи.
И ны́не и при́сно и во ве́ки веко́в. Ами́нь.
Пева́емая чудеса́ Твоя́, во гра́де Лю́бечи бы́вшая, Богоотрокови́це Де́во,/ удивля́ют челове́ков помышле́ния,/ и ве́рныя влеку́т на поклоне́ние чудотво́рному Твоему́ о́бразу,/ в не́мже чуде́с си́лу пресла́вно прояви́ла еси́, Влады́чице,/ на спасе́ние на́ше и утвержде́ние.
Песнь 6
Ирмос: Обы́де нас после́дняя бе́здна,/ несть избавля́яй,/ вмени́хомся, я́ко о́вцы заколе́ния./ Спаси́ лю́ди Твоя́, Бо́же наш,/ Ты бо кре́пость немотству́ющих и исправле́ние.
Припев: Пресвята́я Богоро́дице, спаси́ на́с.
При́зри ми́лостивно, Де́во, на лю́ди Твоя́,/ пред ико́ною Твое́ю честно́ю те́пле Тебе́ моля́щияся./ Сохрани́ град Твой от вся́каго зла, потре́бная ему́ подава́ющи,/ снабдя́щи и покрыва́ющи Твоея́ по́мощи и заступле́ния и́щущия.
Припев: Пресвята́я Богоро́дице, спаси́ на́с.
Спа́са Христа́ о нас умоли́ти потщи́ся, Богоро́дице,/ Ма́тернее дерзнове́ние к Нему́ иму́щи,/ простри́ к Нему́ ру́це Твои́ честни́и на умоле́ние,/ и́миже Его́ я́ко младе́нца носи́ла еси́,/ и спаси́ град и лю́ди, на Тя упова́ющия.
Сла́ва Отцу́ и Сы́ну и Свято́му Ду́ху.
Да изба́вимся от вся́ких злоключе́ний Твои́м предста́тельством, Богома́ти Влады́чице,/ чту́щия ве́рно Твой святы́й пра́здник,/ в не́мже чуде́с Твои́х мно́жество воспева́ем,/ и, Твои́ми ми́лостями крася́щеся,/ Тя еди́ну ско́ро Предста́тельствующую Помо́щницу имену́ем.
И ны́не и при́сно и во ве́ки веко́в. Ами́нь.
Пое́м Тя и покланя́емся Ти, Богома́ти Де́во,/ с ве́рою и любо́вию пропове́дающе мно́гая и пресла́вная Твоя́ чудеса́,/ в Лю́бечи ико́ною Твое́ю чудотво́рною явле́нная./ Ты же, я́ко Ми́лостива су́щи,/ я́коже дре́вле отце́м на́шим, си́це и нам, смире́нным, щедро́ты Твоя́ да́руй,/ заступа́ющи и спаса́ющи нас от вся́ких бед.
Кондак, глас 8
Притеце́м, ве́рнии, к многоцеле́бному о́бразу Засту́пницы на́шея, Богоро́дицы Мари́и,/ и, припа́дающе к нему́ с любо́вию, си́це рцем:/ о Всепе́тая Ма́ти, о Цари́це Всеми́лостивая,/ при́зри свы́ше благосе́рдием Твои́м на ны, недосто́йныя,/ и моли́твами уго́дника Твоего́, преподо́бнаго Анто́ния Пече́рскаго,/ яви́ нам Твоя́ ми́лости и щедро́ты:/ в боле́знех исцеле́ние, в ско́рбех утеше́ние,/ в беда́х ско́рую по́мощь нам да́руй,/ и вся ны спаси́, на Тя упова́ющия, да зове́м Ти:/ ра́дуйся, Де́во, христиа́н заступле́ние.
Икос
А́нгела земна́го и челове́ка Небе́снаго, преподо́бнаго Анто́ния, умоле́нием/ и Твои́м неисче́тным милосе́рдием преклоня́ема, Влады́чице Преблага́я,/ услы́ши нас, благоутро́бно похва́льныя пе́сни Тебе́ принося́щих/ и во умиле́нии глубо́цем зову́щих Ти:/ ра́дуйся, Бо́га Отца́ Неве́сто Непоро́чная;/ ра́дуйся, Бо́га Сы́на Роди́тельнице Неискусобра́чная./ Ра́дуйся, Бо́га Ду́ха Свята́го селе́ние избра́нное;/ ра́дуйся, Пресвяты́я Тро́ицы Таи́ннице Пречестна́я./ Ра́дуйся, а́нгельских во́инств удивле́ние;/ ра́дуйся, челове́ческаго ро́да возвыше́ние./ Ра́дуйся, Лю́беча похвало́;/ ра́дуйся, Росси́и сла́во./ Ра́дуйся, наде́ждо ненаде́жных;/ ра́дуйся, врачевство́ боля́щих./ Ра́дуйся, Утоли́тельнице печа́лей;/ ра́дуйся, ра́досте скорбя́щих./ Ра́дуйся, Де́во, христиа́н заступле́ние.
Песнь 7
Ирмос: Тебе́, у́мную, Богоро́дице, пещь,/ разсмотря́ем, ве́рнии,/ я́коже бо о́троки спасе́ три Превозноси́мый,/ мир обнови́, во чре́ве Твое́м всеце́л,/ хва́льный отце́в Бог и препросла́влен.
Припев: Пресвята́я Богоро́дице, спаси́ на́с.
О́троки в пещи́ халде́йстей Изба́вльшаго/ пло́тию родила́ еси́, Де́во,/ и на руку́ Твое́ю я́ко Младе́нца Того́ носи́ла еси́,/ с Ни́мже и на ико́не Тя зрим, Всепе́тая,/ хва́льным отце́в Бо́гом и препросла́вленным.
Припев: Пресвята́я Богоро́дице, спаси́ на́с.
Всех ве́рных собира́еши, Влады́чице, пе́ти Тебе́ немо́лчныя хвалы́/ и чуде́с Твои́х мно́жество пропове́дати велегла́сно;/ Ты же, я́ко Милосе́рдая Ма́ти,/ не пре́зри и нас, днесь славосло́вящих Тя/ и ро́ждшагося от Тебе́ хва́льнаго отце́в Бо́га и препросла́вленнаго.
Сла́ва Отцу́ и Сы́ну и Свято́му Ду́ху.
Я́ко вои́стинну свяще́нный и ра́достный день наста́/ явле́ния свята́го и чудотво́рнаго о́браза Твоего́, Богома́ти Пречи́стая,/ в не́мже град Лю́беч духо́вно весели́тся и воспева́ет Твоя́ чудеса́,/ мы же, покланя́ющеся Тебе́ пред всечестно́ю ико́ною Твое́ю,/ ра́достно созерца́ем на Ней руко́ю Твое́ю держи́маго Предве́чнаго Младе́нца,/ хва́льнаго отце́в Бо́га и препросла́вленнаго.
И ны́не и при́сно и во ве́ки веко́в. Ами́нь.
Мона́хов росси́йских первонача́льника, преподо́бнаго Анто́ния Пече́рскаго,/ оте́чествие земно́е днесь, благоволе́нием Твои́м озаре́нное, Присноде́во Мари́е,/ со стра́хом и ра́достию пра́здник све́тел Тебе́ сотворя́ет, зовя́:/ Ты еси́ моя́ похвала́ и утвержде́ние,/ Ма́ти хва́льнаго отце́в Бо́га и препросла́вленнаго.
Песнь 8
Ирмос: В пещи́ о́троцы изра́илевы,/ я́коже в горниле,/ добро́тою благоче́стия чисте́е зла́та блеща́хуся, глаго́люще:/ благослови́те, вся дела́ Госпо́дня, Го́спода,/ по́йте и превозноси́те во вся ве́ки.
Припев: Пресвята́я Богоро́дице, спаси́ на́с.
Сей святы́й и светоно́сный день торжества́ Богома́тери,/ в не́мже явле́ние многоцеле́бнаго Ея́ о́браза све́тло пра́зднуем,/ ве́рныя и боголюби́выя ду́ши созыва́ет/ моле́бныя похвалы́ Засту́пнице на́шей приноси́ти и ра́достно к Ней вопи́ти:/ ра́дуйся, Богоро́дице,/ от всех родо́в христиа́нских превозноси́мая во вся ве́ки.
Припев: Пресвята́я Богоро́дице, спаси́ на́с.
Прииди́, правосла́вная Лю́бечская па́ство, и виждь/ ве́лие благоутро́бие Влады́чицы на́шея Богоро́дицы,/ в явле́нии ико́ны Ея́ тебе́ даро́ванное,/ от Нея́же чуде́с струи́ истека́ют, и зна́мения благода́тная соверша́ются,/ и всем щедро́ты Ея́ подаю́тся, превознося́щим и́мя Ея свято́е во вся ве́ки.
Сла́ва Отцу́ и Сы́ну и Свято́му Ду́ху.
Воззри́ на нас ми́лостивно, Влады́чице, предстоя́щих Тебе́ с ве́рою и любо́вию/ и моля́щихся Тебе́ пред пречи́стым о́бразом Твои́м,/ его́же в Лю́бечи ди́вно яви́ла еси́/ и чудесы́ мно́гими просла́вила еси́,/ си́ми Правосла́вную ве́ру утвержда́ющи и е́реси низлага́ющи,/ благонра́вныя же рабы́ Твоя́ подвиза́ющи превозноси́ти Тя во вся ве́ки.
И ны́не и при́сно и во ве́ки веко́в. Ами́нь.
Приими́ на́шу сле́зную моли́тву, Всеблага́я,/ и испроси́ нам оставле́ние грехо́в, ми́рное житие́ и благу́ю кончи́ну от Го́спода:/ ве́мы бо, вемы вои́стинну, Де́во,/ я́ко вся возмо́жна Тебе́, а́ще то́кмо восхо́щеши./ Те́мже со упова́нием кре́пким пое́м во сла́ву Твою́/ и превозно́сим Тя во вся ве́ки.
Песнь 9
Ирмос: О́браз чи́стаго рождества́ Твоего́/ огнепали́мая купина́ показа́ неопа́льная,/ и ны́не на нас напа́стей свире́пеющую угаси́ти, мо́лимся, пещь,/ да Тя, Богоро́дице,/ непреста́нно велича́ем.
Припев: Пресвята́я Богоро́дице, спаси́ на́с.
Свети́ся, ра́дуйся, гра́де Лю́беч,/ се бо в Тебе́ заря́ чуде́с возсия́ – ико́на Пречи́стыя Де́вы;/ лику́йте Лю́бечстии лю́дие,/ обре́тшии зало́г несомне́нный благоволе́ния Богома́тери,/ Свое́ю ико́ною в вас чудоде́йствующей,/ и по до́лгу хвале́бными гла́сы Пречи́стую велича́йте.
Припев: Пресвята́я Богоро́дице, спаси́ на́с.
О, Боже́ственнаго и вселюбе́знаго ли́ка Твоего́ подо́бие/ и безме́рных чуде́с от него́ излия́ние, Влады́чице,/ град Лю́беч и всю па́ству его́ просвеща́ют духо́вно/ и щедро́тами Твои́ми обогаща́ют и́щущих Твоего́ заступле́ния:/ Ты бо еси́ вои́стинну кре́пкое на́ше упова́ние.
Сла́ва Отцу́ и Сы́ну и Свято́му Ду́ху.
О Ма́ти и Де́во, ро́ждшая святы́х Святе́йшее Сло́во!/ Слове́с на́ших хвале́бных не пре́зри,/ и́миже чудеса́ ико́ны Твоея́ прославля́ти дерза́ем, смире́ннии,/ но моли́тв ра́ди уго́дника Твоего́, преподо́бнаго Анто́ния Пече́рскаго,/ на ми́лость к нам преклони́ся и от вся́ких бед нас изба́ви,/ да Тя непреста́нно велича́ем.
И ны́не и при́сно и во ве́ки веко́в. Ами́нь.
Да сохрани́ши, Влады́чице, град и лю́ди/ пребыва́нием в них чудотво́рныя ико́ны Твоея́ осене́нныя,/ да спасе́ши держа́ву Росси́йскую от вся́каго зла́го нестрое́ния и враг ви́димых и неви́димых./ Мо́лим Тя, Всеблага́я,/ сохрани́ ста́до Твое́ в Правосла́вии це́ло/ и спаси́ нас, Тя благогове́йно велича́ющих.
Светилен
Ико́ну Твою́ всечестну́ю град Лю́беч, я́ко сокро́вище драго́е, стяжа́,/ от лет дре́вних чудесы́ просла́вленную,/ о Сла́дкая Ма́ти Христа́ Бо́га на́шего,/ пред не́юже Тебе́ покланя́ющеся, мо́лимся:/ бу́ди нам покро́в недви́жим и Хода́таица спасе́ния.
...........
Кондак 1
Взбранной Воеводе и усердней Заступнице рода христианского, Пресвятей Деве Богородице, град Любеч явлением святыя иконы Ея прославльшей и чудесы, от нея бываемыми, духовно ны утешившей, благодарственное приносим пение; Ты же, Всемилостивая Царице, яко имущая державу непобедимую и милосердие неисчетное, от всяких нас бед и скорбей присно свобождай, да зовем Ти:
Радуйся, Мати Божия, и спаси на Тя уповающия.
Икос 1
Ангелов Царице и всея твари Владычице, от Ангелов горе приемлющая достойныя Тебе хвалы, приими и от нас земных и перстных усердныя благохваления, их же пред святою и чудотворною иконою Твоею возносити Тебе дерзаем и, уповая на Твое матернее благосердие, сице от любве сердечныя Тебе вопием:
Радуйся, радость нам вечную, Христа Спасителя, рождшая;
Радуйся, в рождестве и по рождестве Девою пребывшая.
Радуйся, в девстве и целомудрии верныя утверждающая;
Радуйся, райския двери благочестивым отверзающая.
Радуйся, иконою Твоею нас присно утешающая;
Радуйся, чудесы, от нея бываемыми, духовно нас веселящая.
Радуйся, Мати Божия, и спаси на Тя уповающия.
Кондак 2
Видяще святую икону Твою, Богородице Дево, в Любечи от лет древних чудесы Божественными прославленную, яже миро есть излиянное для верных и боголюбивых душ, со благоговением ей поклоняемся и славословим преблагословенное имя Твое: облагоухай, Владычице, и наша сердца Божиею благодатию, да радостно зовем Богу: Аллилуиа.
Икос 2
Разумеем, Пречистая, Твое благоволение к стране нашей православней, яже чудотворными иконами Твоими преукрашена есть, в них же явила еси нам источники милостей Твоих пребогатых; се, и в Любечи икона Твоя чудотворная прославлена бысть от лет древних, от нея же помощь Твою всем даруеши, иже верно к Тебе взывают:
Радуйся, Любечская похвало и Помощнице наша всеблагая;
Радуйся, всех верных утешение и заступление непостыдное.
Радуйся, о Ней же радуются Ангелы;
Радуйся, о Ней же Бога славят человецы.
Радуйся, горняго мира доблее украшение;
Радуйся, дольнаго мира благодатное ограждение.
Радуйся, Мати Божия, и спаси на Тя уповающия.
Кондак 3
Силою Божиею укреплен святый равноапостольный Великий Князь Владимир, его же матере Любеч отечество бысть, идолы попра и всю землю Российскую верою Христовою просвети, его же подвиг блажаще, на помощь молитвы его небесныя призываем и, прославляя в Любечи икону Твою святую, Владычице, молим Ти ся: молися с ним за нас ко Христу Богу, Ему же присно поем: Аллилуиа.
Икос 3
Имеет град Любеч в себе сокровище пребогатое Божественных даров, икону Твою чудотворную, Богородице Дево, и молитвами преподобнаго и богоноснаго отца нашего Антония Печерскаго чудотворца, иже в Любечи родися и воспитася, многия милости и щедроты Твоя от образа Твоего благодатнаго получает, о них же Тя благодаряще, сице Тебе зовет:
Радуйся, преподобнаго Антония благоволением Твоим осенившая;
Радуйся, отечество его земное иконою Твоею чудотворною прославльшая.
Радуйся, с ним вкупе присно молящаяся за нас Сыну Твоему и Богу;
Радуйся, от горних высот к нам матернею Твоею любовию приникающая.
Радуйся, преподобных трудолюбцев изрядное венчание;
Радуйся, иноков благоскорбящих всевеселящее радование.
Радуйся, Мати Божия, и спаси на Тя уповающия.
Кондак 4
Бурею скорби велией одержим бысть муж, внезапно лишившийся жены и двух чад своих, и не ведая что творити, на ладьи устремися долу по реце Днепру, но силою Божиею принесеся на ладьи своей к Любечу и зде на брезе обрете икону Твою святую, Богородице Дево, юже взем, принесе в дом свой и узре тамо жену и чад своих живы и здравы сущи. Темже велегласно прослави Твое всемогущество и благость и возопи Богу: Аллилуиа.
Икос 4
Слышавше чудо преславное, в явлении иконы Твоея святыя бывшее, людие Любечстии стекошася видети спасенных Тобою и новоявленную икону Твою, Владычице Преблагая; им же поведаше обретший ю муж, како умерших жену и чад своих, принесши благодатную икону Твою в дом свой, обрете живых и здравых. Темже вси вернии радостно и хвалебно восклицаху к Тебе:
Радуйся, скорбящих милостивая Утешительнице;
Радуйся, мертвых благодатная Воскресительнице.
Радуйся, в явлении иконы Твоея безвременно погибшим смертию напрасною живот возвратившая;
Радуйся, яко вся возможна Тебе, сим показавшая.
Радуйся, в Любечи возсиявшая преславными чудесы;
Радуйся, всем чтущим образ Твой святый дарующая от него милости Твоя богатыя.
Радуйся, Мати Божия, и спаси на Тя уповающия.
Кондак 5
Боготечная звезда, икона Твоя святая, Богородице Дево, от Любеча в Киев пренесена бысть Твоим благоволением, Преблагая, и в соборнем храме Софии Премудрости Божией поставленная в нем пребывает, и милости Твоя благодатныя всем с верою молящимся пред нею обильно источает, да вси зовут рождшемуся от Тебе и прославльшему Тя Богу Слову: Аллилуиа.
Икос 5
Видевше людие Любечстии лишение свое, яко чудотворная икона Твоя, Владычице, от них в Киев пренесена бысть, просиша Первосвятителя Киевскаго о ея к ним возвращении, но сей, список с чудотворныя иконы написав и освятив, в Любеч его посла, идеже чудес благодатию сей прославися, и тако скорбь людей Любечских утолися и в радость преложися Твоим благопромышлением о них, Госпоже Всеблагая. Сего ради вопием Ти:
Радуйся, во благих желания наша дивно исполняющая;
Радуйся, любящим и чтущим Тя любовию Твоею Божественною сугубо воздающая.
Радуйся, скорбь людей Любечских о лишении образа Твоего честнаго в радость претворившая;
Радуйся, список с иконы Твоея чудотворныя многими чудесы прославльшая.
Радуйся, яко с верою и благоговением поклоняемся пречистаго лика Твоего изображению;
Радуйся, яко от него приемлем благодатныя дары Твоя на пользу душ и телес наших.
Радуйся, Мати Божия, и спаси на Тя уповающия.
Кондак 6
Проповедует град Любеч милости Твоя и чудеса, Владычице Всемилостивая, и светло красуется. имея в себе залог Твоего благоволения, икону Твою благодатную, Госпоже Всеблагая, к ней же усердно притекающе, в недузех исцеление, в скорбех утешение, в бедах избавление от нея приемлем и зовем Тобою благодеющему нам Христу, Царю и Богу: Аллилуиа.
Икос 6
Возсияла еси, яко луна полная, на тверди Христовы Церкве, Богородице Дево, лучами чудес предивных озаряя верных и всех путеводствуя к пресветлому Солнцу Правды, Сыну Твоему и Богу. Озари Владычице, и наша мрачныя души, да во свете добрых дел неосужденно возможем приносити Тебе пения сицевыя:
Радуйся, радость и умирение миру рождеством Твоим принесшая;
Радуйся, во благих обеты наша милостиво приемлющая.
Радуйся, ветхим деньми силы обновляющая;
Радуйся, юношей и дев к целомудрию невидимо руководящая.
Радуйся, иноков и инокинь Боголюбивых тайное утешение;
Радуйся, в сомнении сущих и неверных благодатное вразумление.
Радуйся, Мати Божия, и спаси на Тя уповающия.
Кондак 7
Хотящим всем с верою приходити на поклонение чудотворней иконе Твоей, Владычице, дары благодатная от нея подаеши и вся спасаеши, иже по Бозе упование свое на Тя возложиша, Тебе бо дадеся от Господа велия благодать матерняго заступления. Темже с любовию припадающе к многоцелебному Твоему образу, взываем Сыну Твоему и Богу: Аллилуиа.
Икос 7
Новое знамение Твоего милосердия явила еси, Владычице, в Любечи, егда среди агарянских и латинских гонений веру православную целу и невредиму тамо сохранила еси, чудесы, от иконы Твоея святыя бываемыми, утверждая верных в православии святоотечестем и внушая им вопити к Тебе:
Радуйся, щите святыя православныя веры;
Радуйся, молние, ереси пожигающая.
Радуйся, Наставнице богомудрия душеспасительнаго;
Радуйся, Мздовоздательнице верных подвижников православия.
Радуйся, многопетая славо пастырей святыя Церкве Христовы;
Радуйся, ограждение крепкое истиннаго и праваго учения.
Радуйся, Мати Божия, и спаси на Тя уповающия.
Кондак 8
Странно есть видети святую икону Твою, Богородице Дево, на доске написанную и духов тьмы присутствием своим прогоняющую силою Твоею Божественною, яко ада Победителя-Христа Бога родила еси, Иже и Тебе подаде власть на диавола, от его же насилия и нас грешных свободи, Всеблагая, да благодарственно зовем воплощшемуся от Тебе Царю славы Христу: Аллилуиа.
Икос 8
Вся благая, временная и вечная исходатайствуй нам, Владычице, матерним предстательством Твоим ко Христу Богу и умоли Его благость даровати нам прощение согрешений наших, вольных и невольных, и не лишити нас наследия Царствия Небеснаго, да радостно Ти взываем:
Радуйся, обрадованная Приснодево, Богородице Марие;
Радуйся, едина избранная и добрая в женах.
Радуйся, дев похвало и матерей веселие;
Радуйся, земных и небесных Божественное радование.
Радуйся, от Сиона горняго благосердием Твоим посещающая земнородных;
Радуйся, избавляющая от всяких бед веру и любовь к Тебе имущия.
Радуйся, Мати Божия, и спаси на Тя уповающия.
Кондак 9
Вси Ангели на небеси немолчныя хвалы воспевают Ти, Богородице, мы же на земли, подражати им дерзающе, велие желание имамы пети Тя и хвалити, честнейшую Херувим и славнейшую без сравнения Серафим, Матерь Господа нашего; Ты же, Всеблагая, Сама научи нас достойно славити Тя и воспевати рождшемуся от Тебе Спасу душ наших: Аллилуиа.
Икос 9
Ветии суемудреннии не могут достойно восхвалити Тя, Пречистая Дево, мы же, смиреннии, от любве сердечныя сии малыя похвалы приносим Ти и молимся: не возгнушайся ими, Всеблагая, ради греховнаго недостоинства нашего, но приемлющи ны благоутробно, воздаждь нам предстательством Твоим к триединому Богу, да зовем Ти радостно:
Радуйся, покрове миру, ширший облака;
Радуйся, града прибежище, в нем же странники земныя отдохновение обретают.
Радуйся, чертоже Божественнаго уневещения;
Радуйся, Виновнице грешных с Богом примирения.
Радуйся, величием многих чудес прославленная во вселенней;
Радуйся, иконою Твоею святою являющая помощь и милость земнородным.
Радуйся, Мати Божия, и спаси на Тя уповающия.
Кондак 10
Спасителя душ наших Господа Иисуса Христа, яко младенца, видим на руку Твоею, Богомати Владычице, носимаго и вся ны благословящаго, Его же созерцая на иконе Твоей святей, радуемся, грешнии, и со страхом и любовию сию целуем, яко залог Божия и Твоего к нам благоволения, зовуще благих подателю Богу: Аллилуиа.
Икос 10
Стена необоримая и крепкое зашищение даровася граду Любечу иконою Твоею чудотворною, Богородице Дево, сияет бо сия многими преславными чудесы, сего ради мы грешнии, поклоняющеся Твоему пречистому образу, Владычице, благоумиленно пред ним Тебе вопием:
Радуйся, заре немерцающая, всякий мрак греховный прогоняющая:
Радуйся, просвещение неверующих и в сомнении сущих сердец.
Радуйся, боголепная красото святыя Христовы Церкве;
Радуйся, ризою Твоею честною всех нас защищающая.
Радуйся, матернею любовию Твоею весь мир христианский объемлющая;
Радуйся, щедроты Твоя богатыя верным нескудно подавающая.
Радуйся, Мати Божия, и спаси на Тя уповающия.
Кондак 11
Пение хвалебное приносим Ти с любовию, Богородительнице Пречистая, не таим чудес Твоих, исповедуем милости Твоя, на нас и отцех наших от иконы Твоея святыя явленныя, и припадая к ней со усердием многим, молим Тя, Покровительнице наша: покрый нас покровом Твоим святым от всякаго зла и научи достойно воспевати Пресвятей Троице Ангельскую песнь: Аллилуиа.
Икос 11
Светоподательная икона Твоя, Богородице Марие, в Любечи от лет древних лучами Божественных чудес сияет, души и сердца верных благодатно просвещает и вся привлекает на поклонение Тебе Пречистой и Преблагословенней Заступнице рода нашего. Темже ущедреннии милостями Твоими, согласно взываем к Тебе:
Радуйся, стено богозданная, ограждающая нас от искушений врага-диавола;
Радуйся, реко приснотекущая чудес Божественных, еюже благодатно напаяются души наша.
Радуйся, в Киеве честною иконою Твоею пребывающая и Любеча таковою же святынею неоставляющая;
Радуйся, всю Российскую землю благоволения Твоего сподобляющая.
Радуйся, яко Тобою радость подается скорбящим и печальным;
Радуйся, яко Тобою помощь ниспосылается в беде и отчаянии сущим.
Радуйся, Мати Божия, и спаси на Тя уповающия.
Кондак 12
Благодать Божественная осеняет святую икону Твою, Богородице Дево, и действует чрез нее ко благо душ и телес наших. Сего ради почитаем радостное ея явление в Любечи и со страхом Тебе вопием: Царице и Владычице наша Преблагая, не остави нас помощию Твоею державною в жизни нашей, в смерти и по смерти, и сподоби нас во стране живых воспевати Творцу и Искупителю нашему: Аллилуиа.
Икос 12
Поем Твоя чудеса, Владычице, в Любечи от иконы Твоея святыя бывшия, благодарим Тя, взыскавшую нас смиренных щедротами Твоими, прославляем милости Твоя богатыя, на нас и отцех наших явленныя Тобою от пречистаго образа Твоего, егоже явление торжественно празднующе, с веселием взываем к Тебе:
Радуйся, весну спасения нам возсиявшая;
Радуйся, теплотою благодати хладныя сердца наша согревающая.
Радуйся, присно царствующая с Сыном Твоим и Богом;
Радуйся, Царский венец улучившая от Царя царей.
Радуйся, на руку Твоею держащая Вседержителя;
Радуйся, к Нему за ны руце Твои молебно простирающая.
Радуйся, Мати Божия, и спаси на Тя уповающия.
Кондак 13
О всепетая Мати, Любечская похвало и наше заступление, приими милостиво сие малое моление наше, пред пречистым образом Твоим приносимое, и умоли Сына Твоего и Бога нашего избавити нас муки вечныя и сподобити радости святых, выну поющих Ему: Аллилуиа.
[Се́й конда́к глаго́лется три́жды.]
[Далее повторяем 1‑е икос и кондак:]
Икос 1
Ангелов Царице и всея твари Владычице, от Ангелов горе приемлющая достойныя Тебе хвалы, приими и от нас земных и перстных усердныя благохваления, их же пред святою и чудотворною иконою Твоею возносити Тебе дерзаем и, уповая на Твое матернее благосердие, сице от любве сердечныя Тебе вопием:
Радуйся, радость нам вечную, Христа Спасителя, рождшая;
Радуйся, в рождестве и по рождестве Девою пребывшая.
Радуйся, в девстве и целомудрии верныя утверждающая;
Радуйся, райския двери благочестивым отверзающая.
Радуйся, иконою Твоею нас присно утешающая;
Радуйся, чудесы, от нея бываемыми, духовно нас веселящая.
Радуйся, Мати Божия, и спаси на Тя уповающия.
Кондак 1
Взбранной Воеводе и усердней Заступнице рода христианского, Пресвятей Деве Богородице, град Любеч явлением святыя иконы Ея прославльшей и чудесы, от нея бываемыми, духовно ны утешившей, благодарственное приносим пение; Ты же, Всемилостивая Царице, яко имущая державу непобедимую и милосердие неисчетное, от всяких нас бед и скорбей присно свобождай, да зовем Ти:
Радуйся, Мати Божия, и спаси на Тя уповающия.
Молитва к Пресвятой Богородице перед Ея иконой, именуемой «Любечская»
О пресвятая и преблагословенная Мати Господа и Спаса нашего Иисуса Христа, Пречистая Приснодево, Богородице Мария! Припадаем и поклоняемся Тебе пред святою и чудотворною иконою Твоею, юже от лет древних зде чудеси многими и исцеленми неисчетными прославити благоволила еси. Смиренно молимся Тебе, благой и милосердной Заступнице нашей, предстательством угодника Твоего преподобнаго Антония Печерскаго, вонми гласу грешных молений наших, не презри воздыхании от души, виждь скорби и беды, нас обышедшия, и яко любвеобильная воистину Мати, потщися на помощь нам безпомощным, унылым, во многие и тяжкие грехи впадшим и присно прогневляющим Господа и Создателя нашего, Его же умоли, Предстательнице наша, да не погубит нас со беззаконии нашими, но явит нам человеколюбную Свою милость. Испроси нам, Владычице, у благости Его телесное здравие и душевное спасение, благочестное и мирное житие, земли плодоносие, воздуха благорастворение, дожди благовременны, и благословение свыше на вся благая дела и начинания наша. Исходатайствуй, Госпоже, у Царя царствующих и Господа господствующих всем православным милость Божию, благоустроение и во всех благих изобилие. О Царице всепетая, Мати Божия Всеблагая, простри благоноснии руце Твои к возлюбленному Сыну Твоему и Богу нашему, умоли Его вся ны спасти и избавити погибели вечныя. Яко же древле на месте сем отцем нашим милость Твою являла еси, Владычице, сице и нам ныне яви, Богородице, Твоя щедроты: болящия исцели, скорбящия утеши, бедствующим помози; споспеши всем нам носити иго Христово в терпении и смирении и сподоби нас благочестно житие сие земное скончати, христианскую непостыдную кончину получити и Небесное Царствие унаследити матерним ходатайством Твоим к рождшемуся от Тебе Господу и Богу нашему Иисусу Христу, Ему же со Безначальным Его Отцем и Пресвятым Духом подобает всякая слава, честь и поклонение, ныне и присно и во веки веков. Аминь.
Присоединяйтесь к ОК, чтобы подписаться на группу и комментировать публикации.
Нет комментариев