Глас 8
Песнь 1
Ирмос: Колесницегони́теля фарао́ня погрузи́/ чудотворя́й иногда́/ Моисе́йский жезл, крестообра́зно порази́в/ и раздели́в мо́ре,/ Изра́иля же беглеца́, пешехо́дца спасе́,/ песнь Бо́гови воспева́юща.
Припев: Преподо́бне о́тче на́ш Пафну́тие, моли́ Бо́га о на́с.
Сла́ву мимотеку́щую на нетле́нную премину́л еси́, преподо́бне,/ с Вы́шними ли́ки ны́не причте́ся,/ предстои́ши Престо́лу всех Царя́,/ просвеще́ние ми испроси́, восхваля́ющу честны́я твоя́ по́двиги.
Припев: Преподо́бне о́тче на́ш Пафну́тие, моли́ Бо́га о на́с.
А́ще и от непра́ведна ро́да влеча́шеся,/ но пра́веден плод Бо́гови принесе́ся/ и Тро́ицы жили́ще показа́ся,/ Юже моли́ о пою́щих тя.
Сла́ва Отцу́ и Сы́ну и Свято́му Ду́ху.
Не довле́ тебе́, преподо́бне, в ми́ре,/ посто́м и воздержа́нием в по́лк свяще́нных себе́ вчиня́еши и́ноческаго пребыва́ния/ и с си́ми до́блественне Христа́ моли́л еси́.
И ны́не и при́сно и во ве́ки веко́в. Ами́нь.
Богородичен: Мари́е Богора́дованная, злата́я кади́льнице, Ма́ти Безневе́стная,/ ро́ждшая нам Пресла́дкаго Иису́са,/ Его́же любо́вию распаля́емь, при́сный уго́дник Твой преподо́бный Пафну́тий/ прече́стен храм Тебе́, Богоро́дице, воздви́же.
Песнь 3
Ирмос: Утвержде́й в нача́ле Небеса́ ра́зумом/ и зе́млю на вода́х основа́вый,/ на ка́мени мя, Христе́, за́поведей Твои́х утверди́,/ я́ко несть свят, па́че Тебе́, Еди́не Человеколю́бче.
Припев: Преподо́бне о́тче на́ш Пафну́тие, моли́ Бо́га о на́с.
В по́двизе учене́н быв послуша́ния,/ седмори́чное обхожде́ние време́н сверши́л еси́,/ смотря́я навы́кнути всяк доброде́тели о́браз.
Припев: Преподо́бне о́тче на́ш Пафну́тие, моли́ Бо́га о на́с.
Два́десят в по́двизе лет сверши́л еси́,/ па́стырь оби́тели поставля́ешися/ и до́блественне о ста́де пече́шеся,/ жела́я всех привести́ ко спасе́нию.
Сла́ва Отцу́ и Сы́ну и Свято́му Ду́ху.
Всеви́дяй Царь Госпо́дь, ви́дев твоя́ страда́ния с опасе́нием,/ не то́чию рассужде́ния да́ром тебе́ почте́,/ но и е́же от о́браза не́киих познава́ти стра́сти душе́вныя.
И ны́не и при́сно и во ве́ки веко́в. Ами́нь.
Богородичен: Ме́сто свяще́ния и мы́сленную, Чи́стая, трапе́зу,/ Хлеб – Христа́, Жизнь всех, прие́мшую, пое́м Тя.
Седален, глас 8
От ю́ности, блаже́нне, вся оста́вль жите́йская, кра́сная же и ле́потная,/ усе́рдно после́довал еси́ Христу́, зва́вшему тя, преподо́бне,/ посто́м, о́тче, те́ло изнури́л еси́, в моли́твах непреста́нно бдя./ Те́мже тя Всеве́дый Госпо́дь до́бре устроя́ет/ па́стыря Свои́м овца́м слове́сным, Пафну́тие Богоно́се,/ моли́ Христа́ Бо́га грехо́в оставле́ние пода́ти/ чту́щим любо́вию святу́ю па́мять твою́.
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.
Богородичен: Я́ко Де́ву и еди́ну в жена́х,/ Тя, без се́мене ро́ждшую Бо́га пло́тию, вси ублажа́ем, ро́ди челове́честии:/ Огнь бо всели́ся в Тя Божества́, и я́ко Младе́нца млеко́м пита́еши Зижди́теля и Го́спода./ Тем, а́нгельский и челове́ческий род, досто́йно сла́вим пресвято́е рождество́ Твое́/ и согла́сно вопие́м Ти:/ моли́ Христа́ Бо́га согреше́ний оставле́ние дарова́ти/ покланя́ющимся ве́рою пресвято́му рождеству́ Твоему́.
Песнь 4
Ирмос: Ты моя́ кре́пость, Го́споди,/ Ты моя́ и си́ла, Ты мой Бог, Ты мое́ ра́дование,/ не оста́вль не́дра О́тча/ и на́шу нищету́ посети́в./ Тем проро́ком Авваку́мом зову́ Ти:/ си́ле Твое́й Человеколю́бче.
Припев: Преподо́бне о́тче на́ш Пафну́тие, моли́ Бо́га о на́с.
Со́нным виде́нием объя́влено бысть тебе́ бра́тне прегреше́ние/ прекра́снаго дре́ва исторже́нием,/ твои́м же, преподо́бне, насажде́нием сподо́бися и́стиннаго покая́ния.
Припев: Преподо́бне о́тче на́ш Пафну́тие, моли́ Бо́га о на́с.
Дре́внюю оби́тель оставля́еши, и но́вое населя́еши,/ и храм, Пафну́тие, Бо́жия Ма́тере воздвиза́еши и благоле́пием украша́еши,/ в не́мже мно́жество учени́к благоче́стию научи́л еси́.
Сла́ва Отцу́ и Сы́ну и Свято́му Ду́ху.
Превысо́кая и близ ми́ра оста́вль,/ в гора́х пусты́нных жи́ти возлюби́л еси́/ и в них, Пафну́тие, па́че Бо́гови угоди́л еси́.
И ны́не и при́сно и во ве́ки веко́в. Ами́нь.
Богородичен: Несеко́мую го́ру Тя дре́вле Авваку́м прови́де Всенепоро́чная,/ из нея́же Бог яви́ся и нас, истле́вшия, обнови́л есть.
Песнь 5
Ирмос: Вску́ю мя отрин́ул еси/́ от лица́ Твоего́, Све́те Незаходи́мый,/ и покры́ла мя есть чужда́я тьма, окая́ннаго,/ но обрати́ мя и к све́ту за́поведей Твои́х/ пути́ моя́ напра́ви, молю́ся.
Припев: Преподо́бне о́тче на́ш Пафну́тие, моли́ Бо́га о на́с.
Князь, я́ростию распали́вся,/ оби́тель твою́ огне́м запали́ти повелева́ет,/ но в день я́рости гне́ва Бо́жия/ честна́го твоего́ и́мени призыва́нием от ва́рвар изба́влься,/ те́плую ве́ру последи́ показа́.
Припев: Преподо́бне о́тче на́ш Пафну́тие, моли́ Бо́га о на́с.
В день пра́здника Па́схи ры́бы моли́твою умно́жил еси́,/ ча́да своя́ возвесели́л еси́/ и на мно́ги дни преизоби́ловати, преподо́бне Пафну́тие, сотвори́л еси́.
Сла́ва Отцу́ и Сы́ну и Свято́му Ду́ху.
Иконопи́сцу, но́зе больны́ иму́щу/ и сих ра́ди твои́х повеле́ний отрица́ющу,/ ты же, преподо́бне, на де́ло дерза́ти повелева́еши/ и сему́ моли́твами свои́ми вско́ре исцеле́ние подава́еши.
И ны́не и при́сно и во ве́ки веко́в. Ами́нь.
Богородичен: Богоро́дице Пречи́стая,/ Твоего́ Сы́на и Бо́га ви́дети жела́я, Пафну́тий, уго́дник Твой,/ Сего́ живоно́сным и Боже́ственным стопа́м невозвра́тно после́дова.
Песнь 6
Ирмос: Очи́сти мя, Спа́се,/ мно́га бо беззако́ния моя́,/ и из глубины́ зол возведи́, молю́ся,/ к Тебе́ бо возопи́х, и услы́ши мя,/ Бо́же спасе́ния моего́.
Припев: Преподо́бне о́тче на́ш Пафну́тие, моли́ Бо́га о на́с.
Дерзну́вшаго уби́ти еди́наго от птиц,/ и́хже любе́зно пита́л еси́,/ глава́ зре́нием наза́д обрати́ся,/ и сему́, уми́льно моля́щу, вско́ре исцеле́ние подава́еши.
Припев: Преподо́бне о́тче на́ш Пафну́тие, моли́ Бо́га о на́с.
И́ноку ропта́вшу, в виде́нии зря́щу,/ я́ко тобо́ю, преподо́бне, измета́ему, и от му́рин восхища́ему,/ и от сих го́рце стра́ждущу,/ сего́ ми́лостивно наказу́еши и в чу́вство приво́диши.
Сла́ва Отцу́ и Сы́ну и Свято́му Ду́ху.
Жене́ боля́щей и от де́мон зело́ стра́ждущей,/ честное́ твое́ и́мя призыва́ющей,/ ты ми́лостивно, блаже́нне, явля́ешися,/ и, я́ко во́лки, от сия де́моны отгоня́еши, и здра́вие подава́еши.
И ны́не и при́сно и во ве́ки веко́в. Ами́нь.
Богородичен: Коренесека́тельным серпо́м Твоея́ моли́твы/ посецы́, Отрокови́це, лука́вая помышле́ния души́ моея́/ и плодоно́сну покажи́, молю́ся,/ всех бо Вседе́теля, Бо́га и Спа́са породила́ еси́.
Кондак, глас 8
Бо́жиим светоли́тием просвеще́н, о́тче,/ по́стническое стяжа́л еси́ жи́тельство, преподо́бне,/ и́ноком предо́брый наста́вниче и по́стником благо́е украше́ние./ Сего́ ра́ди Госпо́дь, труды́, твоя́ ви́дев,/ чуде́с да́ром обогати́ тя,/ источа́еши бо исцеле́ния./ Мы же, ра́дующеся, вопие́м ти:/ ра́дуйся, о́тче Пафну́тие.
Икос
Песнь от усте́н скве́рных к похвале́нию по́двиг твои́х, о́тче, прино́сится:/ не и́мам бо се́рдца моего́ чи́стаго,/ я́ко сие́ сра́мными дея́ньми оскверни́х/ и ду́шу лука́выми по́мыслы осмради́х./ Но ты пода́ждь ми сло́во, преподо́бне, чи́стое твое́ воспе́ти житие́,/ взыва́ющу тебе́ такова́я, преблаже́нне:/ ра́дуйся, преподо́бных всех похвало́;/ ра́дуйся, по́стников подража́телю и пусты́ни насади́телю;/ ра́дуйся, я́ко в ней прече́стен храм Богоро́дице воздви́гл еси́;/ ра́дуйся, я́ко в нем тобо́ю Бог сла́вится;/ ра́дуйся, до́бре пасы́й ста́до твое́ от наве́т вра́жиих;/ ра́дуйся, я́ко смири́л еси́ злонача́льнаго врага́;/ ра́дуйся, я́ко посрами́л еси́ бесо́в полки́;/ ра́дуйся, мона́шествующих свети́льниче пресве́тлый и столп терпе́ния;/ ра́дуйся, я́ко собра́л еси́ мона́хов мно́жество во спасе́ние;/ ра́дуйся, о не́мже хва́лимся вси;/ ра́дуйся, его́же ра́ди избавля́емся от бе́д;/ ра́дуйся, о́тче Пафну́тие.
Песнь 7
Ирмос: Бо́жия снизхожде́ния/ огнь устыде́ся в Вавило́не иногда́./ Сего́ ра́ди о́троцы в пещи́, ра́дованною ного́ю,/ я́ко во цве́тнице, лику́юще, поя́ху:/ благослове́н еси́, Бо́же оте́ц на́ших.
Припев: Преподо́бне о́тче на́ш Пафну́тие, моли́ Бо́га о на́с.
Челове́ка боля́ща, в оби́тель твою́ на одре́ принесе́нна,/ сего́, блаже́нне, ви́дев, оте́чески о сем умили́ся,/ здра́ва моли́твою сотвори́л еси́ и пе́ти научи́л еси́:/ оте́ц на́ших Бо́же, благослове́н еси́.
Припев: Преподо́бне о́тче на́ш Пафну́тие, моли́ Бо́га о на́с.
Прока́зою одержи́ма, и лю́те гно́ем растлева́ема, и к сме́рти приближа́ющася/ свяще́нною водо́ю помазу́еши/ и, я́ко, изря́ден врач, преподо́бне, ми́лостивно сего́ исцеля́еши и пе́ти науча́еши:/ оте́ц на́ших Бо́же, благослове́н еси́.
Сла́ва Отцу́ и Сы́ну и Свято́му Ду́ху.
Лю́те беся́щагося, и у́зы сокруша́юща, и зело́ реву́ща/ честны́м кресто́м огради́л еси́,/ и того́ уцелому́дрил еси́, и пе́ти научи́л еси́:/ оте́ц на́ших Бо́же, благослове́н еси́.
И ны́не и при́сно и во ве́ки веко́в. Ами́нь.
Богородичен: И́же пре́жде Безпло́тный воплоща́ется, Пречи́стая,/ за милосе́рдие безчи́сленное из ложе́сн Твои́х святы́х,/ Ему́же в си пое́м:/ Бо́же, благослове́н еси́.
Песнь 8
Ирмос: Седмери́цею пещь/ халде́йский мучи́тель/ Богочести́вым неи́стовно разжже́́,/ си́лою же лу́чшею спасе́ны, сия́ ви́дев,/ Творцу́ и Изба́вителю вопия́ше:/ о́троцы, благослови́те,/ свяще́нницы, воспо́йте,/ лю́дие, превозноси́те во вся ве́ки.
Припев: Преподо́бне о́тче на́ш Пафну́тие, моли́ Бо́га о на́с.
Ми́лование стяжа́л еси́ христоподража́тельно,/ вся неду́ги и стра́сти исцеля́еши и вся́ку скве́рну очища́еши,/ очи́сти, преподо́бне, и моя́ душе́вныя стру́пы,/ да моли́твами твои́ми изба́влюся ве́чнаго осужде́ния.
Припев: Преподо́бне о́тче на́ш Пафну́тие, моли́ Бо́га о на́с.
Ра́ка моще́й твои́х, преподо́бне, источа́ет бога́тно чуде́с дарова́ния:/ Госпо́день бо уго́дник показа́лся еси́ и Того́ за́поведем де́латель яви́ся непосты́ден,/ Его́же превозно́сим во вся ве́ки.
Сла́ва Отцу́ и Сы́ну и Свято́му Ду́ху.
День ве́рно пра́зднуем/ честна́го твоего́ от земли́ преставле́ния, Пафну́тие блаже́нне,/ в онь же испроси́ ста́ду твоему́ грехо́в разреше́ние и от лю́тых премене́ние,/ да тя прославля́ем, Христа́ воспева́юще во ве́ки.
И ны́не и при́сно и во ве́ки веко́в. Ами́нь.
Богородичен: Его́же родила́ еси́, Сло́во, па́че сло́ва, Богороди́тельнице Чи́стая,/ Того́ о нас моли́, ве́рно чту́щих Тя во ве́ки.
Песнь 9
Ирмос: Ужасе́ся о сем Не́бо,/и земли́ удиви́шася концы́,/ яко Бог яви́ся челове́ком пло́тски/ и чре́во Твое́ бысть простра́ннейшее Небе́с/ Тем Тя, Богоро́дицу,/ А́нгелов и челове́к чинонача́лия велича́ют.
Припев: Преподо́бне о́тче на́ш Пафну́тие, моли́ Бо́га о на́с.
Усе́рдно после́довал еси́ Зва́вшему тя, преподо́бне,/ те́мже и па́стыря тя Свои́м овца́м устроя́ет,/ и законополо́жник и́ноком был еси́, и пра́вило изве́стно,/ и вождь ко спасе́нию.
Припев: Преподо́бне о́тче на́ш Пафну́тие, моли́ Бо́га о на́с.
Свяще́нно и кра́сно жили́ще созда́л еси́,/ и́нок мно́гих наставля́я к послуша́нию и смире́нию/ сла́достию, Пафну́тие, слове́с твои́х,/ те́мже тя вси ублажа́ем.
Сла́ва Отцу́ и Сы́ну и Свято́му Ду́ху.
Весели́тся оте́чество твое́ и град тебе́ воспита́вый,/ и красу́ется пусты́ня, в не́йже по́двиги своя́ и труды́ сконча́л еси́/ и побе́ды венцы́ восприя́л еси́.
И ны́не и при́сно и во ве́ки веко́в. Ами́нь.
Богородичен: Но́сиши на руку́ Бо́га, нося́щаго вся́ческая,/ пита́еши Пита́теля, Чи́стая Богоро́дице,/ Его́же моли́ с блаже́нным Пафну́тием дарова́ти ста́ду Твоему́ бога́тно ве́лию ми́лость.
Светилен
Пусты́ню град сотвори́л еси́ прему́дрыми о́бразы,/ отце́м украше́ние, Пафну́тие богому́дре,/ и сию́ соверши́л еси́ я́ко мы́сленный рай,/ принося́щ цве́ты Боже́ственный, единообра́зных мно́жества,/ досто́йно творя́щих па́мять твою́.
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.
Богородичен: Я́ко иму́щи милосе́рдие и ми́лость ве́лию,/ при́зри, Препе́тая Богоро́дице Де́во, на мое́ смире́ние/ и страсте́й мглу, и собла́зны жития́ разори́, Отрокови́це,/ и огня́ гее́нскаго изба́ви моли́твами Твои́ми.
.......
Кондак 1
Избранный чудотворче, великий угодниче Христов, врачу благодатный, бесов прогонителю, всем любовию притекающим источаяй милости миро, восхваляем тя любовию, отче Пафнутие, ты же, яко имеяй дерзновение ко Господу, от всяких нас бед свободи, да зовем ти:
Радуйся, отче Пафнутие, Боровский чудотворче.
Икос 1
Ангелов Творец, провидя тя ангелом подражателя во плоти имуща быти, от юна возраста облече тя во ангельский чин. Ты же отшед от мира и облекся во иноческое одеяние, крест на рамо взем, вседушно потекл еси во след Распеншегося нас ради Господа: скорбь и труд возлюбив, прилепился еси Христу любовию и молитвами. Мы же, благодаряще о сем Бога, похвальная восписуем ти:
Радуйся, послушателю Господа зовуща: возьмите иго мое на себе; Радуйся подвижниче, подвигом добрым подвизавыйся;
Радуйся, избравый путь тесный, ведущий в живот;
Радуйся, смирением высоких достигший.
Радуйся, кротостью в землю кротких вселивыйся;
Радуйся, вечное радование на небеси обретший.
Радуйся, заступниче наш, и нас поминаяй пред Богом радующихся о тебе;
Радуйся, отче Пафнутие, Боровский чудотворче.
Кондак 2
Видяще ближнии и дальнии дивное о Бозе житие твое, дарование исцелений и сбытие проречений твоих, вельми удивляхуся и славяще Бога вопияху: Аллилуиа.
Икос 2
Разум твой в Божественная вперив и Божиим светом озарився, дары благодатныя являл еси в себе, яко угль горящий огнем Божественным в тебе, сущая возгревая к любви Божией, такожде и сущих с тобою просвещая. Молися убо о нас, покровителю наш, да ревнуя житию твоему спасем души наша и тебе благоприятно поем:
Радуйся, разумением воли Божией и тайн Его озаривыйся;
Радуйся, сотворивый вся повеленная Христом;
Радуйся, в послушаниях монастырских, яко раб неключимый послуживый;
Радуйся, образе Евангельского самоотвержения;
Радуйся, яко храм Божий сердце твое бысть;
Радуйся, яко обитель твою яко рай возделану имел еси;
Радуйся, яко велий во Царствии Божием, яко сотворивый и научивый нареклся еси;
Радуйся, отче Пафнутие, Боровский чудотворче.
Кондак 3
Силою свыше облекий апостолы Господь, облече тя, отче, в ризу спасения, украси тя красотою добродетелей и чудес даром, мы же благодаряще Бога Дивнаго во святых Своих, вопием: Аллилуиа.
Икос 3
Имуще обитель тебе, отче, почивающа зде святыми мощами, радостию исполняется и веселящися умильно тебе вопиет:
Радуйся, избранный сосуде Святаго Духа;
Радуйся, по Бозе и Богородице радосте наша и покрове;
Радуйся, тихое пристанище наше от молвы греховныя;
Радуйся, апостольских учений исполнителю;
Радуйся, святых отец подражателю;
Радуйся, яко ангел, безстрастием просиявый;
Радуйся, облаче, от зноя страстей укрываяй;
Радуйся, отче Пафнутие, Боровский чудотворче.
Кондак 4
Буря недоумения смущает мя, како воспою тя, святе, зане буря страстей и волны грехов потопляют мя; услыши убо вопль и слезы потопляемаго и бедствующему помози, спасай мя, прибежище мое, да воспою благодарно Богу: Аллилуиа.
Икос 4
Слышаще боровские людие, яко тобою грешнии спасаются, недужнии исцеляются, бесы прогоняются, гладнии питаются и скорбящии утешени бывают, потекоша к тебе и ближнии и дальнии, яко к реце, веселящей град Божий и люди. Паче же во время глада устремляхуся вси к тебе с верою в милосердие твое. Ты же и питал еси приходящия ежедневно яко тысящи и множае, дондеже глад преста. И тако прославися тобою Отец Небесный; мы же воспоминающе о сем восхваляем тя усердно сице:
Радуйся, милосердый отче наш;
Радуйся, благодатный врачу душ и телес наших,
Радуйся, отчаянных в милосердии Божием утвердителю;
Радуйся, смущенных умиротворение;
Радуйся, колеблемых утверждение и падших возстановление;
Радуйся, кормчий духовный ко спасению;
Радуйся, гладных питателю, нагих же одеяние и пристанище нищих;
Радуйся, страждущим утешение;
Радуйся, отче Пафнутие, Боровский чудотворче.
Кондак 5
Боготечную звезду уведевше тя, преподобне Пафнутие, ученицы твои: Иосиф Волоколамский, Иннокентий, Илия сродник твой и инии, яко мудрии волсви, ищуще Царя и Спаса миру и тобою испытующе путь, яко светильник держаще тя, достигоша того и радуются ныне с тобою, вопиюще: Аллилуиа.
Икос 5
От многих людей враг творяше пакости тебе и обители твоей, ты же, ученик сый Христов, любил еси враги твоя, добро творя ненавидящим и моляся о них, темже и побеждал еси благими злая. Сего ради Церковь Святая восхваляет тя:
Радуйся, боровская свеще, присногорящая пред Богом;
Радуйся, благодатная луче сияющая от солнца Христа Бога;
Радуйся, непоколебимый терпения столпе;
Радуйся, образе кротости и незлобия;
Радуйся, молитвенниче за враги твоя;
Радуйся, яко уста еси Божия, изводящая от недостойнаго достойное;
Радуйся, миротворче, томужде боголепно и нас научаяй.
Радуйся, отче Пафнутие, Боровский чудотворче.
Кондак 6
Проповедник веры и упования на Бога дивный явился еси, преподобне Пафнутие егда бо скорбяху братия, яко не имеяху рыб ко дню Светлаго Воскресения Христова, глаголал еси о уповании на Бога; в навечерии же Светлаго дне явишася на малом потоце рыбы мнози. Тако упование на Господа не посрами тя, и прославивше Бога, вси вопияху: Аллилуиа.
Икос 6
Возсиял еси, преподобне, свет ангельския чистоты: во плоти яко безплотен, преподобне, ревнителю целомудрия. Сего ради восхваляем тя:
Радуйся, похвале Творца всяческих и Приснодевы;
Радуйся, подражавши Иосифу целомудрием;
Радуйся, Моисею Угрину собрате;
Радуйся, Крестителю Господню поревновавый;
Радуйся, соблазны и искушения далече отринувый;
Радуйся, юным покрове и старцем светлосте;
Радуйся, недремлющий блюстителю монахов и постников украшение;
Радуйся, яко светило небесное земным бывый;
Радуйся, сожителю ангелом;
Радуйся, боровская похвало и заступниче наш пред Богом;
Радуйся, отче Пафнутие, Боровский чудотворче.
Кондак 7
Хотяй отгнати от святыя Церкве всякое богомерзкое злосмрадие, явился еси яко благовонное миро житием твоим и словом истины, апостольских же и соборных учений, отче, исполненный сосуд был еси, изгоня из обители глаголющих противная. Тем же святая Церковь ублажает тя и мы спасеннии вопием Богу: Аллилуиа.
Икос 7
Новаго тя Ноя спасенного ковчега обители твоей показа Бог хотящим спастися: наказуя потопом гнева своего преслушающих тя и паки милуя кающихся, мы же благоговейно молим тя: покрый немощи наша, отче, милосердием твоим и смиренною любовию, и сподоби пети: Радуйся ревностный учениче Христов;
Радуйся, притрепетный служителю Страшных Таин;
Радуйся, блюстителю Православия;
Радуйся, хранителю чудный обетов монашеских;
Радуйся, милостивый заступниче кающимся;
Радуйся, помогаяй и нам соблюдати обеты наши Богу;
Радуйся, отче Пафнутие, Боровский чудотворче.
Кондак 8
Странен и дивен был еси на земли, истый же подражатель небесным житием, словом и молчанием, яко умилитися видящим тя. Приидоша бо от князя слузи буйнии, во злобе хотяще сожещи обитель твою, егда же узреша тя, аки ангела тиха и светла, внезапу применишася на кротость и мнози тако уклонишася от зла и сотвориша благо от слышания и видения твоего, мы же прославляюще о сем Бога, умильно вопием ти: Аллилуиа.
Икос 8
Возведи окрест очи твои, отче, и виждь: се бо многая чада твоя, с разных стран приидоша к тебе дары носяще, паче же с верою и любовию к заступнику и утешителю своему в скорбех и нуждах и припадающе молят тя: простри руку помощи требующим, услыши нас из глубины души взывающих:
Радуйся, ходатаю наш у Бога временных и вечных благ;
Радуйся, сияние нам Божией милости;
Радуйся, дерзновение наше к Богу;
Радуйся, яко милостива его обретаем к нам;
Радуйся, яко тобою от гнева Божия избавляемся;
Радуйся, отче Пафнутие, Боровский чудотворче.
Кондак 9
Всякое естество человеческое удивися ангельскому житию твоему на земли: попрал бо еси бесов, яко прах под ногама, низложив их шатания, разогнав соблазнов тьму и вся стрелы лукаваго на главу его обратив: сораспялся еси Христу и научил еси многих со страхом пети Богу: Аллилуиа.
Икос 9
Витии многовещаннии не возмогут по долгу восхвалити тя, преподобне, точию ангели достойно восхваляют ангельскими пении, от нас же, яко из уст младенец приими хвалу сию:
Радуйся, похвало ангелов, монахов же и всея Святыя Церкве;
Радуйся, вшедый в радость Господа Бога Твоего;
Радуйся, Патриархом в угождении Богу поревновавый;
Радуйся, пророков дара сподобленный;
Радуйся, апостольская уста;
Радуйся, мучеником соучастниче в распятии плоти и в язвах Господних на теле твоем носимых;
Радуйся, миру умерый, Христу же Единому поживый;
Радуйся, не забываяй и нас заблуждших, призывающих тя;
Радуйся, отче, низпосылаяй нам с небесе милость твою;
Радуйся, далече провозгласивый: разумейте языцы, яко с нами Бог;
Радуйся, отче Пафнутие, Боровский чудотворче.
Кондак 10
Спастися хотящии притекаху к тебе, доброму пастырю, указателю путей Господних, сильному о Господе. Ты же яко имеяй дарование прозрения, всех любезно приимал еси, точию, иныя паки отсылая, обаче николиже глаголя о них злая, аще и ведый, мы же благодаряще Бога, дивнаго во святых своих, вопием: Аллилуиа.
Икос 10
Стену тя нерушиму имея и молитвенника тепла, из глубины души тебе, покровителю, глаголем:
Радуйся, промышления Божия о людех исполнителю;
Радуйся, сокровище сокровенное обретый и участники себе многи сотворивый;
Радуйся, Царствия Божия наследниче и иным молитвами твоими двери отверзаяй;
Радуйся, всю жизнь со Христом соображавый и в ничесомже от Него отставый;
Радуйся, делателю в винограде Христовом;
Радуйся, немощных сило о Господе;
Радуйся, искушаемых скорый о Господе покров и заступление;
Радуйся, унывающим ободрение и скорбящим радосте.
Радуйся, отче Пафнутие, Боровский чудотворче.
Кондак 11
Пение ангельское слышашеся во святем преставлении, отче, святыя и богоугодныя души твоея, в небесная селения преславно восходящия, горния бо силы радующеся сретаху тя, поюще Богу: Аллилуиа.
Икос 11
Божием светолитием просвещен быв, отче, яко молния грозная блистал еси, гоня и поражая демоны, якоже и от жены некия отгнал еси их: беси бо являющеся, устрашаху ю, чесо ради смущашеся умом и боляше; овогда видяше являющася старца: низка и согбенна, браду имуща седу и велику, худыми ризами одеянна, со властию отгоняюща демоны, и бываше здрава. Слыша и глас: Пафнутий, иже в Боровске, отгонит от тебе бесы. Нетерпит бо спадый денница и тайные клевреты его не точию присутствия, но и молитв смирения твоего. Мы же, ведуще сия, молим тя: сохраняй и нас от злоб их, да ходим во свете заповедей Божиих, вопиющия ти усердно:
Радуйся, идеже осеняет благодать твоя, отче, оттуду прогонится диаволя сила;
Радуйся, освобождаяй прибегающих под кров твой от злых духов;
Радуйся, неусыпный страже обители твоея;
Радуйся, душ и телес наших благий хранителю;
Радуйся, вторый наш общий ангеле;
Радуйся, в час смертный заступаяй любящих тя пред Богом;
Радуйся, изымаяй от мытарств души их;
Радуйся, недаяй впасти в руце бесом;
Радуйся, воздвизаяй верных к покаянию и с Богом соединяяй;
Радуйся, отче Пафнутие, Боровский чудотворче.
Кондак 12
Благодать велию приял еси от Бога, отче, яко меру потрясну и преливающуся, по множеству любви твоея к Богу и ближним, иже и яви тя реку, изливающу струи многи, благодати требующим, источаеши исцеления: мы же, радующеся, вопием Богу: Аллилуиа.
Икос 12
Поюще светлое о Бозе житие твое, хвалим добродетели твоя, яко Святаго Духа дарования, ублажаем святое успение твое, почитаем священную память твою, зовуще любовию:
Радуйся, в мире яко премирен бывый и мир верою победивый;
Радуйся, плоть твою Христу покоривый;
Радуйся, незлобия и кротости правило;
Радуйся, безстрастия светлый доме и смирения глубино;
Радуйся, Христово благоухание;
Радуйся, заступниче наш на небеси и на земли;
Радуйся, душ и телес наших благий хранителю;
Радуйся, отче Пафнутие, Боровский чудотворче.
Кондак 13
О пресвятый и предивный отче Пафнутие, утешителю скорбящих, приими сие наше малое моление, избави ж нас от всяких бед и вечныя изми муки, богоприятным твоим пред Богом ходатайством, да с тобою во веки воспеваем: Аллилуиа.
[Се́й конда́к глаго́лется три́жды.]
[Далее повторяем 1‑е икос и кондак:]
Икос 1
Ангелов Творец, провидя тя ангелом подражателя во плоти имуща быти, от юна возраста облече тя во ангельский чин. Ты же отшед от мира и облекся во иноческое одеяние, крест на рамо взем, вседушно потекл еси во след Распеншегося нас ради Господа: скорбь и труд возлюбив, прилепился еси Христу любовию и молитвами. Мы же, благодаряще о сем Бога, похвальная восписуем ти:
Радуйся, послушателю Господа зовуща: возьмите иго мое на себе; Радуйся подвижниче, подвигом добрым подвизавыйся;
Радуйся, избравый путь тесный, ведущий в живот;
Радуйся, смирением высоких достигший.
Радуйся, кротостью в землю кротких вселивыйся;
Радуйся, вечное радование на небеси обретший.
Радуйся, заступниче наш, и нас поминаяй пред Богом радующихся о тебе;
Радуйся, отче Пафнутие, Боровский чудотворче.
Кондак 1
Избранный чудотворче, великий угодниче Христов, врачу благодатный, бесов прогонителю, всем любовию притекающим источаяй милости миро, восхваляем тя любовию, отче Пафнутие, ты же, яко имеяй дерзновение ко Господу, от всяких нас бед свободи, да зовем ти:
Радуйся, отче Пафнутие, Боровский чудотворче.
Молитва преподобному Пафнутию Боровскому чудотворцу
О священная главо, земный ангеле, небесный человече, великий чудотворче, преподобне отче наш Пафнутие! К тебе с верою и любовию усердно прибегаем и умиленно просим: яви нам смиренным и грешным святое и многомощное твое заступление. Не дерзаем, грех ради наших, с свободою чад Божиих, просити Господа и Владыку нашего о помиловании и прощении. Но тебе, молитвенника к нему благоприятна, предлагаем и молим, испроси нам у благости его дары благопотребныя и спасительныя душам нашим: веру праву, благочестие крепкое, покаяние истинное, прощение грехов, житие совершенное, исправление решительное, да обратившеся от злых дел к Богоугождению, прочее непрогневляем Господа нарушением святых его заповедей. Умоли, святче Божий, Всевышняго Творца даровати мир и благочестие стране нашей православной. Сохрани, угодниче Христов, святую обитель твою, созданную тобою, и вся живущия и подвизающияся в ней от всякаго зла ненаветны. Призри милостивно на люди, к тебе прибегающия, и вся прошения их во благое исполни. Всем же нам здравие душевное и телесное, земли плодоносие, тихое и благоугодное житие, благую, христианскую кончину и добрый ответ на Страшном Суде у Всемилостиваго Бога исходатайствуй, яко воистину имеяй велие к нему дерзновение. Ей, отче, вемы, яко много может молитва твоя пред лицем Вседержителя Господа и ничтоже невозможно есть ходатайству твоему, аще токмо восхощеши: сего ради крепко на тя уповаем и на твои святыя молитвы вельми надеемся, яко ты приведеши нас предстательством твоим в тихое пристанище спасения и наследники явиши ны светлаго Царствия Христова. Не посрами же упования нашего, чудотворче святый. И сподоби нас вкупе с тобою блаженства райскаго наслаждатися, да славим, хвалим и величаем великую милость к нам Человеколюбца Бога, Отца и Сына и Святаго Духа и твое благое, отеческое заступление во веки веков. Аминь.
Присоединяйтесь к ОК, чтобы подписаться на группу и комментировать публикации.
Нет комментариев