Ղարաբաղ կոմիտեի անդամ Աշոտ Մանուչարյանը այսօր լրագրողների հետ հանդիպմանը նշեց՝ «սիմվոլիկ է, որ տարին Հայաստանի համար նման ողբերգությամբ է սկսվում» և զգուշացրեց՝ «նման գլոբալ պատերազմի պայմաններում պետք է բացարձակ զգոն լինել, քանի որ հնարավոր է հաջորդ վայրկյանից սկսեն ողբերգությունն օգտագործել այլ նպատակներով»: «Գյումրիում կատարվածը սարսափելի բան է, մանավանդ մեր ժողովրդի համար, սպանդը խորքային շերտերի հետ է խոսում: Այն, որ երեք սերունդների ներկայացուցիչներ են ընտանիքում սպանվել, խոսում է շատ բաների մասին և բնական էր նման խորը, համընդհանուր արձագանքը, բայց ուրիշ հարց է, որ զուգահեռ միանգամից սկսում են գործել ուժեղ խմբեր՝ թե՛ դրսից և թե՛ ներսից, այսինքն՝ շահարկումը միանգամից սկսվում է և այս տեսակետից պետք է բացարձակ զգոն լինենք»,- ասաց նա: Աշոտ Մանուչարյանը նկատեց, թե կարևոր է եկեղեցու հանգստություն կոչը, բայց քիչ է, իրավիճակի հաղթահարման համար. «Տեսա եկեղեցին է փորձում ինչ-ինչ դեր խաղալ, դա շատ ողջունելի է, շատ կարևոր է, բայց Հայաստանը անկախության օրերից սկսած միշտ ունեցել է ներսում համակարգեր նման դեպքերում լուծումներ տալու համար, իհարկե իդեալական է, որ պետությունն այդ դերը կատարի իր ճյուղերով, բայց, ըստ էության, գրեթե չի կատարում, և պետք է անհապաղ ձևավորվի հայության համադրող օղակ»,- ասաց նա և նկատեց. «տեղի ներուժը չի բավարարում, շատ թույլ է, դրսում տարբեր խորը գործիչներ ունենք, որոնք հսկայական ազդեցության մարդիկ են, ովքեր պատրաստ են ծառայել հայրենիքին»: Մանուչարյանի խոսքով՝ գլոբալ պատերազմի այս շրջանում զինանոցում ոչինչ արգելված չէ, թերևս բացի միջուկային պատերազմից: Ըստ նրա՝ Գյումրու ոճրագործությունը երկու հնարավոր սրում կարող է ունենալ, մեկը, որ եղածը պատահականություն է և ոճրագործը հոգեկան խանգարում ուներ, և երկրորդը, որ նպատակային գործողություն է: «Եթե ուրիշ խաղաղ ժամանակներում կարող ենք սպասել, թե ոնց կավարտվի, ինչպիսի եզրակացությունների կարող ենք գնալ, այսօր գլոբալ պատերազմում, եթե դիտարկում ենք վատթարագույնը, որ դա պատահական չէ, որ նպատակային կազմակերպված է, երկրորդ իսկ վայրկյանից սկսում է օգտագործվել այլ նպատակներով: Մենք պետք է պատրաստ լինենք դիմակայելուն, ճշգրիտ գործելուն, որպեսզի դրանք չօգտագործվեն մեր ներսում բախումների ու ցնցումների համար»,- ասաց նա: Ըստ նրա՝ այս պահին կողմերի մեջ վստահության պակասի հարց կա. «Յուրաքանչյուր կողմ վախենում է, որ շահարկվելու է: Վստահության հարցը կարևոր է, և այնպես, ինչպես մենք ենք իրենց վստահում, թե՝ ոնց եղավ, որ նման տիպի մարդ է ծառայում այդ բազայում, վերջացված ավելի բարդ հարցերով, այնպես էլ՝ նրանք մեզ»,- ասաց նա: