«Հայաստանի պետական հետաքրքրությունների հիմանդրամ» ՓԲԸ-ի՝ ԱՆԻՖ-ի նախկին տնօրեն Դավիթ Փափազյանի նկատմամբ միջազգային հետախուզում կհայտարարվի: Այսպիսի հանձնարարություն է տվել Քննչական կոմիտեն: Նրա նկատմամբ որպես խափանման միջոց է ընտրվել կալանքը։ Այս մասին «Հետքի»–ի գրավոր հարցմանն ի պատասխան՝ հայտնել են Քննչական կոմիտեից։ Հիշեցնենք, որ օգոստոսի 15-ին Գլխավոր դատախազությունը հանրային քրեական հետապնդում էր հարուցել «Հայաստանի պետական հետաքրքրությունների հիմնադրամ» ՓԲԸ-ի (ԱՆԻՖ) նախկին տնօրեն Դավիթ Փափազյանի, «Ձեռնարկատեր+պետություն հակաճգնաժամային ներդրումների հիմնադրամ» ՓԲԸ-ի նախկին տնօրեն Բելլա Մանուկյանի և «Սի Էֆ Դաբլյու» ՓԲԸ–ի տնօրեն Կարինե Անդրեասյանի նկատմամբ։ Դավիթ Փափազյանի նկատմամբ քրեական հետապնդում հարուցվել էր ՀՀ քրեական օրենսգրքի միանգամից երեք հոդվածի հատկանիշներով՝ փաստաթղթերի կեղծման (457-րդ հոդված), առանձնապես խոշոր չափերով փողերի լվացման (296-րդ հոդվածի 3-րդ մասի 2-րդ և 3-րդ կետեր) և մասնավոր ոլորտում ծառայողական լիազորությունները չարաշահելու (277-րդ հոդվածի 2-րդ մասի 2-րդ կետ)։ Դատելով սոցիալական ցանցերում նրա հրապարակած լուսանկարներից՝ պարզ է դառնում, որ Փափազյանը Լոնդոնում է։ Առանձնապես խոշոր չափերով փողերի լվացման հոդվածի հատկանիշներով քրեական հետապնդում էր հարուցվել նաև Կարինե Անդրեասյանի նկատմամբ։ Նրա նկատմամբ որպես խափանման միջոց է ընտրվել երկրից բացակայելու արգելքը։ Իսկ Բելլա Մանուկյանի նկատմամբ կիրառվել է գրավ։ Նա մեղադրվում է երկու՝ փաստաթղթերի կեղծման և ծառայողական լիազորությունները չարաշահելու հոդվածներով։ Քննչական կոմիտեն չի հայտնել՝ արդյոք այս գործով հարցաքննվել է 2019-2023 թվականներին ԱՆԻՖ-ի տնօրենների խորհրդի նախագահի պաշտոնը զբաղեցրած Տիգրան Ավինյանը։ «Մինչդատական վարույթի բնականոն ընթացքն ապահովելու նպատակով վարույթն իրականացնող մարմինը, նախաքննության տվյալ փուլում, նպատակահարմար չի համարում այլ նախաքննական տվյալների հրաարակումը»,- ասված է Քննչական կոմիտեի պատասխանում։ 5.09.2025