Муус устар 27 күнүгэр Бөтүҥ нэһилиэгэр улуус нэһилиэктэриттэн уустар түмсэн аны сайын Нерюнгри куоракка ыытыллыахтаах Олоҥхо ыһыаҕар бэлэмнэнэн болгуо уһаардылар.

Амма эбэ кытыллыттан 30 киилэ курдук таас хомуллунна.
“Биһиги нэһилиэкпитигэр ааспыт сайын тутуллубут Уус түһүлгэтигэр Амма уустарын түмсүүтүн салайааччыта Роман Александрович Алексеев көҕүлээһининэн Бөтүҥтэн, Амматтан, Чапчылҕантан, Болугуртан, Сулҕаччыттан, Сэргэ Бэстэн уонна Соморсунтан, уопсайа сэттэ 30-ча уус уонна тимиринэн уһаныыны интэриэһиргиир эр бэртэрэ кэлэн Өрөспүүбүлүкэ күнүгэр болгуо уһаардылар.
Үс күн инниттэн култуурабыт киинин уолаттара тимир уһаарар оһоҕу бэлэмнээбиттэрэ. Хататынан уматан оттубуттара. Бу күн устата уустар 5 киилэ 420 грамм болгуону уһаардылар.
Маннык болгуоттан аны сайын оҥоһук оҥостон Нерюнгригэ буолар Олоҥхо ыһыаҕар илдьэ барыахтара. Онон улуус уус уолаттара Өрөспүүбүлүкэ күнүн үлэ үөһүгэр көрүстүлэр. Уолаттары култуура киинин кэрэ аҥардара алаадьы астаан, минньигэс остуол тардан аһаттылар”, — диэн Бөтүҥ нэһилиэгин баһылыгын солбуйааччы Алексей Стручков сырдатта.
“Амма олоҕо” хаһыаттан ылылынна: https://clck.ru/3LszM3