«Кэнчээри» уһуйааҥҥа кэрэни кэрэхсииллэр

Бастакы Президеммыт Михаил Николаев үүнэр көлүөнэ бары өттүнэн сайдыылаах буоларын туһугар араас бырайыактары төрүттээбитэ. Ол иһигэр, оҕо айар дьоҕурун сайыннарар сыаллаах «Рисуем все» бырайыак буолар. Быйыл биллэриллибит «Рисуем все» бырайыак акцията былааннаахтык ааста.
“Рисуем все” бырайыак чэрчитинэн иитиллээччилэр ортолоругар Оҕо саас сылыгар, төрөппүттэргэ Дьиэ кэргэн сылыгар анаммыт уруһуйга куонкурустар буолан аастылар. Бу күрэхтэри ойуулуур-дьүһүннүүр искусствоҕа сыһыаннаах иитээччилэрбит Анжела Жиркова, Мария Алексеева иилээн-саҕалаан ыыттылар. Маны таһынан, төрөппүт Александра Кокарева төрөппүттэргэ, иитээччилэргэ уонна оҕолорго анаан акварель кыраасканан уруһуйга маастар-кылаас ыытта уонна бэйэтин үлэлэрин быыстапкатын туруорда. Уһуйаан иитээччитэ, үлэһитэ туохха барытыгар дэгиттэр буолуохтаах диэн санаанан сиэттэрэн, уруһуй быыстапката тэриллибитэ. Манна иитээччилэр үлэлэрэ үрдүк сэҥээриини ыллылар. Учуутал-логопед Туйаара Романова, тьютор Юнона Васильева доруобуйаларыгар хааччахтаах оҕолор айбыт үлэлэринэн «Күнчээн» быыстапканы тэрийдилэр. А.А. Черемных аатынан Искусство оскуолатын преподавателэ Кыма Жиркованы кытта сыллата ыкса сибээстээхтик үлэлиибит. Быйыл кини уһуйааммытыгар «Кырыа кыһын» диэн темалаах быыстапканы туруорда.
Манна биһиги выпускниктарбыт үрдүк таһымнаах үлэлэрэ баалларыттан биһиги үөрэбит уонна киэн туттабыт. «Рисуем все» акция түмүктүүр үлэтинэн музыкальнай салайааччыбыт Мира Харитонова бырайыагынан «Олоҥхо дойдута» диэн коллаж буолла. Бу коллажка киирбит олоҥхо персонажтара уонна араас эттиктэрэ биһиги коллективпыт бары үлэһиттэрин күүһүнэн уруһуйданна. Бырайыак бэлиэтин «Хатыҥчаана» уһуйаантан үөрүүлээх быһыыга туттубут. Манна үлэһиттэр уруһуйдаабыт хартыыналарын олус сэргии көрдүбүт. Салгыы бэлиэни «Радуга» оҕону сайыннарар Киин коллективыгар туттарыы тэрээһинин ыыттыбыт, традиционнайа суох ньыманан коллективынан үлэлээн улахан дуоһуйууну ыллыбыт уонна уруһууйдаммыт бэлиэни коллегаларбытыгар бэлэх ууннубут.
Түмүктээн эттэххэ, «Рисуем все» бырайыак уһуйааннары, иитээччилэри, төрөппүттэри, оҕолору уруһуй аптаах-алыптаах эйгэтигэр барыларын түмэр. Маны таһынан, тулалыыр эйгэ кэрэтин кэрэхсии сылдьарга үөрэтэр, хас биирдии киһи айар дьоҕурун уһугуннарар. Бу бырайыак салгыы сайда, үүнэ-чэчирии туруохтун!
Анна КУЗНЕЦОВА, «Кэнчээри» оҕону сайыннарар Киин сэбиэдиссэйин иитэр-үөрэтэр үлэҕэсолбуйааччы
с. Амга