Анча ҳасратимдан куйди жонингиз,
Андуҳлар эгаллаб олди ёнингиз,
Агар сўрасангиз ўша онингиз,
Умримнинг борини бераман Она...
Дунёга интилмай сиз томон чопиб,
Қалбимга яхшилик чойшабин ёпиб,
Сиз менга айтмаган дардингиз топиб,
Дилингиздан бир-бир тераман Она...
Сизга гуллар тутиб хурсанд қилмадим,
Қадрингиз осмонлар қадар илмадим,
Нодонман шекилли яна билмадим,
Не учун кўксимни кераман Она...
Ҳамма Онасини эъзозлаган он,
Менга керак бўлди мартабаю шон,
Ўйласам эзилиб оғриб кетар жон,
Ер чизиб жимгина тураман Она...
Кўнглимни мехрга бурмоқлик учун,
Турфа ғамларингиз қувмоқлик учун,
Барча хатоларим ювмоқлик учун,
Бошимда кўтариб юраман Она...
Қаранг сочларингиз эгаллабди қор,
Бу оқлар мени кўп кутганингиз зор,
Айтолмай юрганим битта гапим бор,
Сизни жуда яхши кўраман Она...
Айтолмай юрганим битта гапим бор,
Сизни жуда яхши кўраман Она...
📝Муаллиф: Зоҳид Зиё...
Присоединяйтесь к ОК, чтобы подписаться на группу и комментировать публикации.
Нет комментариев