РАЪНО УМИДБАХШ:

ҚИСМАТ ЙЎЛЛАРИДА
119.
ЯНГИ ТОПШИРИҚ.
"Қудратбой, эртага янги топшириқ бор деди. Яна қанақа топшириқ экан. Агар яна бировнинг ёстиғини қуритиш зарур бўлса, топшириғини бажармайман.
-Ўлгинг келяптими? Ўлимдан қўрққанинг учунгина Аширвойни бесабаб ўлдирдинг. Энди нимадан қўрқасан. Хужжатларда сен ўлиб бўлдинг. Қудратнинг қулига айландинг, энди қанақа топшириқ буюррса шуни бажаришингга тўғри келади.
-Ўлмадим мен. Ўлмайман, узоқ яшайман. Қамоқдан чиқсам, менга озор берганлардан ўчимни олиш учун ҳам яшашим керак. Мени ўлдиришга буюрганларни жазолаш учун ҳам яшашим керак..."
Ўзи билан ўзи тортишгани тортишган. Ўзи билан ўзи гаплашгани гаплашган. Яхшиям барча ғалаён ичида, ташига чиқармайди.
Биров эшитиб қолса борми.. Аниқ, уни жиннига чиқариб қўйиши тайин...
Эртаси кун бўйи ҳам Қудратбойнинг янги топшириқ ҳақидаги гапи тарк этмади унинг хаёлини. Қизиқиши, ахборот йиғишданам ошиб кетди.
-Янги топшириқ дегандингиз?- шомликдан сўнг
Қудратнинг ҳузурига борганда, ўзи айтмасидан сўрашининг, гап бошлашининг сабабиям шу.
-Бу жойда, қамоқхонада бизнес қилишни истайсанми?
Ҳошимжоннинг саволига савол билан жавоб берди Қудратбой.
-Истайман.
-Мана сенга қоғоз. Хонангда ўйлаб, ҳар хил расмлар чизасан. Кейин, бу чизгиларни одамларнинг баданига ўтказамиз.Чизгилар қанчалик қўрқинчли бўлса, шунча яхши...
-Тату қиламизми?
-Ҳа, шу... Татуировка.Ҳозир қамоқхонада мўда-ку бу нарса. Сен татучиларга чизги берасан. Мана бунга ўхшаган.
Қудратбой унинг олдига ўнтача чизги ташлади. Бир нечтаси араб тилидаги сўзлар эди.Аллоҳ, Бисмиллаҳга ўхшаш. Бу расмлар орасида шайтон тасвири ҳам, гуллар тасвири ҳам бор эди.
-Бу топшириқ чалғишинг учун. Ҳар битта расм учун пул оласан.
-Мен ўзим шуғуллансам бўлмайдими бу иш билан.
-Бу иш билан шуғулланадиганлар бор. Сенинг қайғуряпман деганингга таклиф қилдим.Бу ерда ўйлаш мумкинмас.Жинни қилиб қўяди акс ҳолда хаёлларинг.Бу ерда фақат ҳаракат қилиш зарур. Ишлаш зарур.Шундагина вақт ўтганини сезмай қоласан.
"Ҳайрият, бировни ўлдириш ҳақида гапирмади. Расм чизиш мениям кўнглимдаги орзу. Бўпти.Чизганим бўлсин. Хонадаги дафтаргаям чизаман. Расм билан иш битадиган бўлса, яхши экан..."
-Яна бир гап. Ҳеч ким билан тортишма, ҳеч ким билан уришма, бор-йўқлигинг билинмасин. Бирор ҳафта-ўн кун шундай кезишингга тўғри келади.Бошқа янгиликлар чиққунча.
Хўп бўлади.
Хонасига қайтгач, хонадоши, рус йигити Аликнинг қўлидаги расмга қизиқди.
-Бу расмни қачон чиздиргансан, қаерда?
-Бир йил бўлиб қолди, шу ерда чиздирганман.
-Қанча тўлагансан?
-Юз минг...
-Ўххўўў. Қимматмасми? Мен сенга текинга чизиб берсам-чи?
-Зўр бўларди...
-Бўпти, бугун мен чизган расмларни танлайсан.Энг ёққанини чизиб бераман.
**
Шундан сўнгра ишга киришди.
Ярим тунгача ўндан ортиқ қоралама яратди. Худди Қудрат кўрсатган расмларга ўхшаш.
"Болалигимда, болалар билан бу ишга қизиққандим..Ҳатто чап билагимда ўша пайтда чизилган, ибтидоийларча тайёрланган расм ҳам бор. Лекин ҳар игна санчганда, баданинг жиз этиб кетиши ёмон-да. Ҳозир шунақа осон чизадиган асбоблар пайдо бўлган, ҳмтто оғриқни сезмайсан"
"Қудрат бало. Хонасидан чиқмай, бойваччалик қилишининг сабаби шу экан-да...
Йўғее, бу бир чалғиш учундир.Қудратнинг қудрати бошқа жойда бўлиши керак.Билиб оламан ҳали..."
Эртаси эрталаб ишга кетишдан аввал Аликка расмларни кўрсатди,
-Бирини танла, қолганини бировга оборишим керак.
Йигит танлаган расмни ғаладонга солиб, қолганини Қудрат учун ажратиб қўйди.
Кечқурун Қудратнинг ёнига боргач расмларни кўрсатганди, унга ёқди.
-Ҳар битта расм учун беш мингдан оласан.
-Ким тайёрлайди.Менам бу ишни ўрганмоқчийдим...
- Сенга бошқа топшириқлар бўлади.Бу расмлар хотиржам бўлишинг учун. Айтганча, Додангга сенинг ўлган хабарингни юбордим.Чол бир хурсанд бўлсин... Беш кунлиги борми, тўрт кунлиги борми.
-Раҳмат.Бу яхшилигиззи унутмайман.
-Нега бундай қилганимни айтайми, сен менга ёқиб қолдинг. Ҳали сен билан кўўп ишлар қиламиз.Менинг йигитим бўласан...
-Хўп бўлади.
Ҳошимжон Қудратбойнинг ёнидан елкасидан тоғ ағдарилгандек бўлиб қайтди. "Мендан фойдаланмоқчи.Кўрамиз, ким-кимдан фойдаланар экан."
Тунда эса, Аликнинг елкасига расм ўйди.
-Расм кичкина бўлиши керак, худди сигарет қутиси каби. Аммо дўстлигимиз ҳурмати, сенга каттароқ қилиб чизиб бераман.
Ҳар игна санчганида иҳрамаслиги учун, оғзига дастрўмолча тиқиб қўйди...
Иш битгач, ҳали оғриқлари кетмаган бўлса-да, йигитнинг қувонганини кўрсангиз...
-Дўстларингга кўрсатасан. Менга клент топиб берасан. Бошқалар юз минг олса, мен йигирма минг билан чизиб бераман.
Албатта, бир ҳафта-ўн кунгача ғайрат билан ишлади, беш-олти сўм пул топди.Аммо унинг фаолияти Қудратнинг қулоғига етгач...
-Нега ўзбошимчалик қиляпсан? Ким сенга рухсат берди?
-Эплай олармикинман деб эрмакка уриниб кўрдим.
-Тугат. Сенга бошқа топшириқлар бор.
Албатта, Ҳошимжоннинг бу қилмиши Қудратга ёқмагани тайин. Ўз ризқига кесак отаётган бири кимгаям ёқарди...
-Хўп бўлади.
Ҳошимжонни танимаганлар, хўп бўладига ишонишлари мумкин. Таниганлар эса, унинг ҳеч қайси ёмонликдан қайтмаслигини билганлар эса Қудратнинг буйруғи ерда қолишини англаган бўлишлари керак.
**
Ўша куни Севарадан мактуб олди. "Сизни кутаман. Ўзингизни эҳтиёт қилинг, ёмонларга қўшилманг. Яхши ишласангиз, вақтидан аввал жавоб беришаркан. Амнистияга тушиб келасиз Худо хоҳласа. Бунга ишонаман"...
Йиғлагиси келди...
"Бу биринчи ва охирги мактуби Севарнинг. Менинг ўлди хабарим борган бўлса, аҳволи қанақайкин? Ҳарҳолда яхши бўлмаса керак... Сабр қилишим керак, сабр."
Давоми бор.
Раъно Умарқулова.
17.11.2021