«Յուվենտուսի» գլխավոր մարզիչ Մասիմիլիանո Ալեգրին Չեմպիոնների լիգայի 1/4 եզրափակիչ փուլի՝ «Այաքսի» հետ պատասխան հանդիպումից առաջ խոսել է թուրինյան թիմի համար Կրիշտիանու Ռոնալդուի կարևորության մասին: ծ «Բարեբախտաբար, մենք ունենք Կրիշտիանու: Նա գոլային անհավանական զգացողություն ունի և մեկնարկային սուլիչից հետո, կարծես, կերպարանափոխվում է: Դա նկատելի է անգամ նրա դեմքի արտահայտությունից: Այժմ նա ավելի լավ մարզավիճակում է, քան նախորդ շաբաթ: Տարօրինակ կլինի Չեմպիոնների լիգայից դուրս մնալ այն դեպքում, երբ գոլեր է խփում Ռոնալդուն: Նա 3 անգամ աչքի ընկավ «Աթլետիկոյի» դեմ խաղում, մեկ անգամ էլ՝ «Այաքսի»: Մենք չենք կարող թերագնահատել նրա կարևորությունը»,- Ալեգրիի խոսքը մեջբերել է ՈւԵՖԱ-ի մամուլի ծառայությունը: Հիշեցնենք, որ «Այաքս»-«Յուվենտուս» առաջին հանդիպումն ավարտվել է 1-1 հաշվով, իսկ պատասխան խաղը կայանալու է ապրիլի 16-ին և մեկնարկելու է Երևանի ժամանակով 22:00-ին: