Түн кирди.Эрнис кой кайтарып жүрүп чарчаганга катуу уйкуга кетти. Гүлзар ары - бери оодарылып,уктай албай көпкө жатты. Койлор менен уйлардын бышылдап кепшегени , кээде гана жылкылардын бышкырганы угулуп жатты. Бир маалда боз үйдүн эшигинин алдында жаткан үч ит ажылдап үрүп, карагайлуу черди карап үрө башташты. Үч ит чуркаган бойдон бир жакка чуркап кетти. Эмнегедир Гүлзарга боз үйдүн сыртынан бирөө ,акырын айланып жүргөндөй болуп туюлуп кетти. - Эрнис , Эрнис ойгончу,эшикте бирөө жүргөндөй болуп жатат - деп шыбырады. - Оу эмне болду,эмне уктабай жатасыңбы? - Ооба ,уйкум келбей жатат.Мага бирөө боз үйдүн сыртында жүргөндөй болуп жатат.Иттер да бир жакка чуркап кетишти. - Иий жаным койчу,ит деген ошентип чуркай берет. Бирөө жүргөн жок ,тигине уй- койлор,жылкылардын эле бышылдаганы угулуп жатат.Болду ,уктайлы эртең эрте турабыз- бурулуп бекем Гүлзарды кучактап кайра бат эле уктап калды. Ар кайсы шырт эткен үндөрдү,тыңшап жатып уктап кетти. Түшүнө таятасы кирип, өзүнүн мергенчилик кылган мылтыгын берип жатыптыр. Ойгонуп кетсе , таң сүрүлүп калыптыр. " Кой ,акырын тура берейин,мешке от жагып,чай коёюн.Кечээ ырас эле,камыр жууруп коюптурмун,таятам түшүмө кирди, мылтыгын берип жатыптыр.Май токоч жасап, таятамдын арбагына багыштап жыт чыгарып,куран окуп коёлу"- деп ойлонуп кийине баштады. Акырын туруп ,чачтарын тарап ,таенеси айткандай , түшкөн чачтарын чогултуп бир желим баштыкка салып,керегеге кыстарып койду. Меши ысып ,жайып койгон жети май токочун бышыра баштады. - Айий жаным,качан туруп алдың,мммм май токочтун жыты буркурайт,кой мен да турайын! -Жуунуп кел ,чай ичели ,каймак тарткан машинка жакшы айланбай жатат,карап бересиңби? - Макул жаным,кайнатамдын кыйын кызысын да! - Таятама куран окуп койчу ! Экөө кобурашып, ысык май токоч менен бышкан сүттүн үстүнөн калпып алган каймакка малып жей башташты. - Түндө түшүмө таятам кириптир,мага мылтыгын берип жатыптыр,бул эмнеси? - Анда түшүндү мен жоруп берем,түштө мылтык,бычак ж.б эркектерге тиешелүү буюмдар кирсе, курсакта жаткан бала эркек болот.Буюрса биринчи балабыз уул болот. Сонун түш экен! -Анда чындап эле сонун түш экен! - Мага жегенге бир нерсе салып бересиңби? - Ооба,салып койдум,жанагы койлорду баштаган эркечке тиги жез коңгуроону тагып койчу ээ? - Аны такпай койсо болбойбу? - Таенем айтып жаткан,тагып койчу,улуу кишилер бекер айтпаган чыгар. - Макул ,алып кел анда . Экөөлөп барып ,Эрнис кармап Гүлзар эркечтин мойнуна тагып коюшту. - Мына эми, айтканыңды кылдым,эми сарсанаа болбо,сен айткан азыткылар бизди азгырбайт- деп каткырып күлүп койду. Эрнисти узатып коюп Гүлзар бүгүн эмне кылсам деп,ойлоно баштады. Кой,тиги уйларды саайын,анан айдап жиберейин,оттой беришсин!Анан сүт бышырып,каймак тартайын,айран уютуп, сүзмө куюп коюш керек. Түшкө жакын болгон жумуштарын бүтүрө салып,Гүлзар булакка суу алганы кетти. - Арыбаңыз Булак- Ата,мен сизден суу алганы келдим- ийилип учурашып койду. Өзүн бирөө көрсө,акылынан айнып калган окшойт деп ойломок да деп ,жылмайып койду. Булактан арыраак жерде ,сонун тоо гүлдөрү өсүп туруптур ,Эрнис келгенде дасторконго кичине кооздоп коюп койсомбу деп терип кирди.Уламдан улам кызыгып ,алыстап кетип бара жатты. Бир маалда башын көтөрүп караса,бир топ эле алыстап кетиптир.Ар кайсы жерде бышып калган кожогаттарды да көрдү,эмки келгенде терип кетсем болот экен деп ойлонуп койду. Терген гүлдөрүн бооруна кыса кармап,жылмайып жыттап баратты. Карагайдын боорунда болчу карагайдын чайырын,бала кезде сагыз кылып чайнаганын эстеп,бир барып терип келсемби деп ойлоп койду. " Тырс- тырс" - карагайлардын арасынан чыккан үндү уккан Гулзар басышын тездетти. Кандайдыр бир ички сезими , жүрөгүн дүкүлдөтуп , түшүнүксүз коркунуч баса баштады. Ичинен келмесин келтирип,бат баттан басып боз үйгө кирип кетти. Гүлдөрүн коё коюп,сыртка чыгып эки жакты карады,эч ким деле көрүнбөйт,бардыгы тынч. - Жолборс, кайдасың күчү , күчү!!!! Ары жактан Жолборс чуркап келгенде эс ала түштү. - Жүрү Жолборс булактын жанында чакаларым калды,мени менен барып кел , уктуңбу?Менден алыстаба,макулбу- дөбөт аны түшүнгөндөй сүйлөй берди. Боз үйгө кирип белине күмүш курду ,мойнуна бой тумарды тагынып алды. Күмүштөрду тагынып алып ,кайра күлкүсү келди, булакка барса да, ушундай бараарын бирөө көрсө шылдыңдап күлмөк да деп итин ээрчитип булакты көздөй жөнөдү. - Жолборс калба менден... Барып эки чакасын алайын десе ,чакалардагы суулары төгүлүп калыптыр. - Оо, Кудайым буларды ким төккөн? Же мен төгүп алганымды байкабай калдымбы? Чөмүчүн таппай ,айланасын карай баштады,чөмүч шилбинин арасында жатыптыр.Коркконунан жүрөгү опкоолжуй ,акырын басып чөмүчүн алды да,эки чакага суу толтура баштады. Эки чака сууну көтөрүп кичине жылаар замат ,дөбөт бир нерсени карап ырылдай баштады... Гүлзар артын карабай,бат - баттан басып боз үйгө чуркап кирди. УЛАНДЫСЫ БАР.... НУРИДА КАРАБАЛТИНСКАЯ.