Ո´չ հրեշտակ և ո´չ էլ սուրբ,
Ո´չ դատավոր, ո´չ էլ անմեղ...
Ընդհամենը մարդ եմ ձեզ պես
Ու մեղավոր` դարձյալ ձեզ պես...
Ծնված օրից մեղանչեցի.
Գիտե՞ք ինչու`
Արյան գնով ես ծնվեցի
Ու "կյանքի շուկա" ոտք դրեցի...
Եվ ի՞նչ տեսա.
(Բայց նախ ասեմ, որ ինչ տեսա`
Ակամայից ես կուչ եկա,
Տեսածիցս էլ ` շատ վախեցա).
__Կաթսաներ են շարված հերթով
Ու եփվում են դառը ճաշեր...
...Մի կաթսայում
Բերնեբերան սուտ է լցված,
Իսկ էն մյուսում `թույն ու կեղծիք,
Մեկում բախտ է, իսկ էն մյուսում`
Օձն է բազմած ոսկու վրա...
Դե իսկ մարդիկ շտապու~մ են,
Շերեփն առած` համտեսու~մ են,
Հրմշտու~մ են,
Գոռգոռում ու սակարկու~մ են...
Շիվար -մոլոր թափառեցի...
Ում հարցրի, թե ի՞նչ եմ ուզում`
Խեթ հայացքով նախատեցին
Ու մի ճամփա ցույց տվեցին,
Ասին." Գնա´, բայց փշոտ է `
Ո´չ ոսկի կա, ո´չ էլ արծաթ ,
Ընդհամենը մի վառ լույս է..."
Ես էլ տխուր ճամփա ընկա...
Այդ ճամփեզրում `տրտում նստած,
Մի ծերունու հանկարծ տեսա,
Մոտ գնացի ու հարցրի.
Թե ո՞նց գտնեմ իմ ուզածը։
Իսկ փնտրածս համեմունք էր`
Հույս էր, հավատ,
Սեր ու զղջում,
Արդարություն,
Նաև ներում....
Խեղճ ծերունին դեմքիս նայեց
Ու մոլորված այսպես ասեց.
__Համեմունքն են դրանք կյանքի
Եվ դրանք են համը ճաշի,
Բայց քանի- որ գինը թանկ է
Ու սակարկել անհնար է`
Էստեղ չկա, չեն վաճառում ։
Սակայն այնտեղ` հեռու~__հեռվու~մ,
Մի ջերմատու շող է փայլում
Եվ Աստծո լույս այն անվանվում...
Այնտե´ղ է հենց քո փնտրածը։
Որոշել ես գնա՞լ ,գնա´,
Սակայն հիշիր.
Հազարներից մեկն է փրկվում
Ու ջերմաշող լույսին հասնում...
Նարե Մար (12. 10. 2018թ)
Присоединяйтесь к ОК, чтобы подписаться на группу и комментировать публикации.
Нет комментариев