ЭТЕКЛЕРИНДЕ ДЖАЙ БОЛГЪАН" ПОЭЗИЯ
Любаны назмуларын окъугъаным сайын, Минги Джырчыны сёзлери эсиме тюшедиле: «Башы къыш болуб, бели джаз болуб, этеклеринде джай болгъан.» Ма алай сейирликди Любаны поэзиясы.
Зумакъулланы Танзиля бир интервьюсунда «бизни тёлюде Бабаланы Ибрахимден фахмулу джокъ эди» дегенине бек къууаннган эдим. Манга сорсала уа, «Къарачай-Малкъар тиширыу поэзияда Ахматланы Любадан фахмулу поэт джокъду» дерик эдим.
Хар бир назмусуну аллындан аягъына дери джюрюшю бузулмай баргъаны, суратлау дараджасы мийкде болгъаны, кафиелерини-рифмаларыны кючлюлюклери, сезимини кертилиги – бары да юлгюге тутарча этедиле.
Малкъар джазыучула биригиб, Любаны назмуларын орус тилге да ол джазгъан дараджада кёчюртюб, Эресейни кърал саугъасына теджеселе - ол ёчню алаллыкъ болур эди деб кёлюме келеди. Алай этерге да керекди. Сау болса эди Къайсын...
Сени кёзлерингде излейме башханы,
Алай а, табалмам аны ауанасын да.
Къайда болур наным, джолдан аджашханым,
Джюрегиме тюйреб дуния ауарасын да ?..
Джибек джауумладан тикгенме гыранча,
Окъа чалыуладан салгъанма атынгы да.
Джалан джюрегими къайгъыларын чачар,
О, кетме туурамдан, унутма антынгы да !
Кюйген сезимлени сууумайды кюлю,
Арабызда – черек, баргъан джолу узакъды.
Кечеча къарангы сенсиз болгъан кюнюм,
Сенсиз болгъан тюнюм бир къарангы тузакъды.
Кёгет юзюп мен джангызлыкъ терегинден,
Чыкълы кырдыклада джалан аякъ барама.
Тансыкълыгъым джылай мыдах джюрегимде,
Сенсиз этген - джазыу, анга соруу салама...
Бир окъугъаным бла, эсимде къалгъаныча, хазна джангылмай джаздым. Сейир, аламат. Аз назму къалыучанды мени къарыусуз эсимде былай.
Бу назмуну титиб, тинтиб къарасанг да бир кемлигин табхан къыйынды. «джангызлыкъны терегинден» эсе, «джангызлыкъ терегинден» деб, айтылыб къалса, табмы болур эди деб да келеди кёлюме. Башха илинир зат табмагъандан айтама аны да.
Аллах адамны насыбын бир затда азыракъ этсе, башха затда кёбюрек этеди. Любаны несинден алыб къошханын билмейме, алай а Любаны поэтлик фахмусу барыбызгъа да джетерча алай уллуду, мийикди, акъды. Тауча. «Башы къыш болуб, бели джаз болуб, этеклеринде джай болгъан».
Сейир фахму. Сейирлик поэзия. Окъу да, адам джюрегини ариулугъуна, Ана тилибизни байлыгъына сейирсин да тур. Джаша, таулу эгечим, замандашым, къаламдашым Ахматланы Люба.
Орус кесини Ахматова Аннасына къаллай сый бере эсе, биз да Ахматланы Любагъа аллай сый берирге борчлубуз. Тыйыншлыды ол сыйгъа Люба. Ёхтемленирге, къууаныргъа керекбиз быллай поэзиябыз болгъанына. Не джаны бла да болушургъа, ёрге тутаргъа, уллу къралда белгили этерге тыйыншлыды Ахматланы Люба.
Ол кеси эм уллу, эм къыйын ишни этеди – Ана тилибизни берекетли, къууатлы, сюйюмлю этген назмула. джазады.
Аланы дуниягъа билдириу, джайыу а – культурабызгъа, литературабызгъа къайгъыргъан къуллукъчуланы, адамланы борчларыды.
Лайпанланы Билал
Норвегия, август 2018
Присоединяйтесь к ОК, чтобы подписаться на группу и комментировать публикации.
Комментарии 1