Предыдущая публикация
«КЪАРАМ: БИР ДЖАНЫНДАН ЭМДА УЗАКЪДАН»
Любаны — бюгюнлюкде Беш Тау Ауузунда назму джазгъан эгечлерибизни бирине да тенг этмейме. Алай не ючюн санагъанымы айта тургъанма. Назмусуну джюрюшю бузулмай баргъаны, суратлау дараджасы мийикде болгъаны, кафиелерини игиликлери — барысы да лира сезимни Акъ сёзге бурадыла, Поэзи хазнасы этедиле.
.
Люба шийирлерин джаза, тизгинледе джикле тенгмидиле, басым тюз тюшемиди деб, тергей да болмаз. Эсине да келе болмаз къайсы назму джорукъ бла джазгъанын. Назму тизгинле — джауа тургъан джауумча, кетиб баргъан сууча, табигъатны кесича кёрюнюб къаладыла. Керти, таза джюрек сезимни — сёз бла билдирир ючюн, керти ариу назмугъа бурур ючюн — уллу фахму да, усталыкъ да керек болгъанларына не сёз.
.
«Стихи – совершеннейший из способов пользоваться человеческим словом, и разменивать его на мелочи, пользоваться им для пустяков — грешно и стыдно»,- деб, В.Я.Брюсов айтханлай, Любаны назмуларында кёзбау сёз, назму оюн джокъду. ЁЗю — сЁЗю. Андан сора да, Любаны назмулары халкъ ийнарлагъа дженгиб кетмейдиле — ала не ариу, не субай кёрюнселе да.
«...Подлинность, чистота и сила Ваших оригиналов доходила через все подстрочные воспроизведения и передачи, значит, она лежала не в привычной, повседневной прелести и документации народно-речевого оборота, а перерастала их и коренилась в образном содержании сказанного...»,- деб, Пастернакны Къайсыннга джазгъаны белгилиди. Любаны анзмуларын окъуй, ол сёзле да эсибизге тюшмей къалмайдыла.
.
Бу шийири да Любаны накъут-налмаз назмуларындан бириди.
.
О, КЕТМЕ ТУУРАМДАН...
Сени кёзлерингде излейме башханы,
Алай а табалмам аны ауанасын да.
Къайда болур наным, жолдан ажашханым,
Жюрегиме тюйреп дуния ауарасын да ?..
.
Жибек жауунладан тикгенме гыранча,
Окъа чалыуладан салгъанма атынгы да.
Жалан жюрегими къайгъыларын чачар,
О, кетме туурамдан, унутма антынгы да !
.
Кюйген сезимлени сууумайды кюлю,
Арабызда — черек, баргъан жолу узакъды.
Кечеча къарангы сенсиз болгъан кюнюм,
Сенсиз болгъан тюнюм бир къарангы тузакъды.
.
Кёгет юзюп жангызлыкъны терегинден,
Чыкълы кырдыклада жалан аякъ барама.
Тансыкълыгъым жиляй мудах жюрегимде,
Сенсиз этген жазыуума соруу салама...
ЛАЙПАНЛАНЫ БИЛАЛ,
Норвегия,
11.02.2023 https://www.instagram.com/p/CoiRFLltz0umle1pkQJdT7NIOQ7hot4IdJ9G4Y0/?igshid=MDJmNzVkMjY=
Следующая публикация
Нет комментариев