Эс те кăвакарчăнччĕ,

Эп те кăвакарчăнччĕ.
Çума тăрсассăн иккĕн
Ларса калаçаканччĕ.
Çÿлте çутă çăлтăрсем,
Çĕрте ешĕл курăксем.
Санпа туслă пулнисем
Юлаç асăнма вĕсем.
Улма йывăç илемĕ
Улми пиçнĕ вăхăтра.
Кашни çыннăн илемĕ
Çав тер çамрăк вăхăтра.
Садри сантал çеçкене
Татма кăмăлу пур-и?
Эп хывнă такмаксене
Асра тытма май пур-и?
Юркан -и, одеял -и?
Çĕрле выртсан ăшăнма.
Ялта хĕр тата пур - и?
Пĕрле çемье çавăрма.
Ютти çине пăхан пулсан,
Çума лартмăп эп сана.
Савни тесе каламасан,
Качча каймăп эп сана.
"Çеçке,"- тесе эп сана
Куçран пăхса каларăм.
Çумна тытсан эс мана
Хамăн тесе шутларăм.
Асту çав эс каçхине,
Çурхи каç вăраннине.
Эп сана тĕл пулнине,
Эс мана юратнине.
Улма йывăç пахчинче
Килсе лартнă йывăç пур.
Кунта Кекен ялĕнче.
Юратнă савни ман пур.
Сана пурте сатур теççĕ,
Сухал пулмасассăн та.
Ялта сана ăслă теççĕ,
Буква палламасан та.
Хĕвел те пур, уйăх та пур
Çĕре çутатаканни.
Çакă ялăн пĕр ачи пур
Чĕре çунтараканни.
Эпĕ кайрăм Питĕре,
Илсе килтĕм çут витре.
Çутă витре - йĕс калай,
Манăн савни Николай.
Шурă акăш пулмасан,
Алла ухă тытас çук.
Сана савни курмасан,
Нимле канăç пулас çук.
Хĕвел ăшши пулсассăн,
Хĕлле те юр ирĕлет.
Сана савни курсассăн,
Чĕрен çăвĕ ирĕлет.
Хĕвел çути сĕм çĕрле
Çĕре вăл çутатас çук.
Эпир халь кăна пĕрле
Кайран пĕрле пулас çук.
Çÿлле эп хăпарăттăм
Чулсем çине чул хурса.
Санпа эп калаçăттăм
Чĕрÿ çине пуç хурса.
Кекен ялĕ, Мелания Никифорова.