ОНА

Ёрни дедим онамни қўйиб,
Қоши қалам санамни суйиб,
Мана бугун кўксимни ўйиб,
Онамни мен излаб юрибман,
Элга дардим сўзлаб юрибман.
Онам тож-у давлатим экан,
Ош, қатиқ беминнатим экан,
Қиёматлик улфатим экан,
Онамни мен излаб юрибман,
Элга дардим сўзлаб юрибман.
Тушларимда бир кўрсам эди,
Юзларига термулсам эди,
Дийдорига бир тўйсам эди,
Онамни мен излаб юрибман,
Элга дардим сўзлаб юрибман.
Сочимга оқ оралаганда,
Йиллар умрим саралаганда,
Юракни дард яралаганда,
Мен онамни излаб юрибман,
Элга дардим сўзлаб юрибман.
Онамдайин меҳрибон зот йўқ,
Онамдайин қадрдон зот йўқ,
Гапларида шубҳа гумон йўқ,
Мен онамни излаб юрибман,
Элга дардим сўзлаб юрибман.
Аслихон Ризо.