Тўйкўчада тонг отгунча гулхан ёнди,
Борай десам тополмадим кўйлагимни.
Гулхан ичра гулхан бўлиб бир жон ёнди,
Куя-куя кулга кўмдим тилагимни.
Чимилдиқда ёлғон йиғлар ёлғончи қиз,
Кулиб кимни эрмак қилар ўланчи қиз?
Бағрим ёнар, онажоним сиз билмайсиз,
Ҳижрон отли ханжар тилар юрагимни!
Йигит бўлиб не кўрибман мен дунёда,
Ёрим яшнаб турар тилло тақинчоқда.
Қўллариммас, энди ўша шода-шода
Марваридлар бўйнин силар малагимнинг.
Бу ҳовлига энди мен бир бўйламасман,
Кетаверсин кетса, уни ўйламасман,
Ёлғончининг ёнига ҳам йўламасман,
Йўлатмам ҳам яқинига йўлагимнинг...
Тўйкўчада туни билан гулхан ёнди,
Борай десам тополмадим кўйлагимни.
Гулхан ичра гулхан бўлиб бир жон ёнди,
Куя-куя кулга кўмдим юрагимни.
Присоединяйтесь к ОК, чтобы подписаться на группу и комментировать публикации.
Нет комментариев