АЙТОЛМАСДАН ҚОЛГАН ГИНАМ БОР!

Ўтмоқдадир умр, албатта,
Ўтаётган ахир мен ҳам бор.
Бу ўткинчи дунёда битта,
Айтолмасдан қолган гинам бор!
Қолмай дедим шундан бенасиб,
Балки шудир охирги изҳор,
Юзларимни юзингга босиб,
Айтолмасдан қолган гинам бор!
Юрагимнинг ҳар ҳавасида,
Сўроқладим, тиландим абгор,
Юрагимнинг ҳар нафасида,
Айтолмасдан қолган гинам бор!
Боқдим яқин, йироқларингга,
Термулганман минг бора зор-зор,
Йиғлаб-йиғлаб қулоқларингга,
Айтолмасдан қолган гинам бор!
Ҳар саҳарда, ҳар кун эрталаб,
Сўз берганман минг марта бекор,
Энг сўнгги бор сени эркалаб,
Айтолмасдан қолган гинам бор!
Ўтмоқдадир умр, албатта,
Ўтаётган ахир сен ҳам бор.
Бу ўткинчи дунёда битта,
Айтолмасдан қолган гинам бор!
АЙТОЛМАСДАН ҚОЛГАН ГИНАМ БОР!