Ստորագրահավաք՝ Միհրան Հարությունյանի ոսկե մեդալը վերականգնելու պահանջով

change.org կայքում ստորագրահավաք է սկսվել օգոստոսի 16-ին Ռիո դե Ժանեյրոյում անցկացվող 31-րդ ամառային Օլիմպիական խաղերի հունահռոմեական ոճի ըմբշամարտի եզրափակչում սերբ ըմբիշ Դավոր Շտեֆանեկի հետ մենամարտում պատված հայ ըմբիշ Միհրան Հարությունյանի ոսկե մեդալը վերականգնելու պահանջով:

Խնդրագիրը ստորագրածների թիվը 8 հազարից ավել է:
Ստորագրահավաքի նախաձեռնողները կոչ են անում միջազգային ֆեդերացիաներին, ըմբշամարտի միավորված ոճերի միջազգային ֆեդերացիային վերականգնել արդարությունը:
"Սպորտում գրանցված ցանկացած անարդարություն ստվեր է նետում Օլիմպիական խաղերի վրա: Ռիո դե Ժանեյրոյի Օլիմպիական խաղերի կազմակերպիչները պետք է միանան այս խնդրագրին և միջոցներ ձեռնարկեն արդարությունը վերականգնելու ուղղությամբ:
Օգոստոսի 16-ին Ռիո դե Ժանեյրոյում անցկացվող 31-րդ Օլիմպիական խաղերի հունահռոմեական ոճի ըմբշամարտի եզրափակիչում` սերբ ըմբիշ Դավոր Շտեֆանեկի հետ մենամարտի ժամանակ, հայ ըմբիշ Միհրան Հարությունյանը զրկվեց ոսկե մեդալից կանխակալ մրցավարության պատճառով: Դա խայտառակություն է հունահռոմեական ըմբշամարտի համար։ Ողջ աշխարհը դարձավ այն փաստի վկան, թե, իրականում, ով է չեմպիոնը", - նշվում է խնդրագրում: