Загортваюць «Рэд Скарлет»

320 гектараў адведзена пад «другі хлеб» у гаспадарках раёна. Звыш трэці плошчы ўжо засаджана бульбай.
У ліку першых да загортвання клубняў прыступілі працаўнікі сельскагаспадарчага вытворчага кааператыва «Таліца-агра». Ужо чацвёрты сезон звенавым па вырошчванні «другога хлеба» ў гаспадарцы з’яўляецца Андрэй Вяроўка. Механізатар увесну садзіць бульбу, улетку апрацоўвае, а ўвосень убірае вырашчаны ўраджай. Памочнікі яго – паляводы Мікалай Мафіеня і Галіна Багалюбава.
Звяно загарнула клубні гатунку «Рэд Скарлет» больш як на 10 гектарах. Дарэчы, пасадачны матэрыял, як расказала галоўны аграном СВК Галіна Касцюкавец, набылі летась. Выбралі названы сорт нездарма, ён вызначаецца высокай ураджайнасцю і таварнасцю, добрымі смакавымі якасцямі, а таксама, што немалаважна, устойлівы да засухі і розных хвароб.