Не цураецца ніякай працы

З 2004 года шчыруе механізатарам у адкрытым акцыянерным таварыстве «Любанскі льнозавод» Аляксандр ЦЫЦЕНЯ.
Атрымаў спецыяльнасць трактарыста ў Любанскім сельскагаспадарчым прафесійным ліцэі, куды прыйшоў вучыцца пасля заканчэння трэцяй гарадской адзінаццацігодкі.
Старанны і адказны, ён паступова павышаў прафесійнае майстэрства, авалодаў навыкамі работы са шматлікімі прычапнымі агрэгатамі. А гэта так важна для прадпрыемства, на якім выконваюцца розныя віды дзейнасці. Каб сабраць добры ўраджай ільну, трэба падняць зябліва, заправіць глебу ўдабрэннямі, засеяць якасным насеннем, правесці хімпраполкі і г.д. І з усім гэтым Аляксандр паспяхова спраўляецца. Падчас прыезду карэспандэнтаў ён на МТЗ-82 развозіў па палях ільнозавода комплексныя ўдабрэнні.
Добрыя словы ў адрас руплівага працаўніка выказаў механік па аўтатранспарце таварыства Дзмітрый Дашкевіч:
– Аляксандра Аляксандравіча вызначаюць станоўчыя адносіны да працы. Наша работа часта залежыць ад надвор’я. Здараецца, што з раніцы выконваем нешта адно, а пасля абеду – зусім іншае. Ён добра разумее абставіны, яго не трэба ўгаворваць ці доўга яму тлумачыць. Ахвотна дзеліцца сакрэтамі прафесіі з маладым папаўненнем, дапамагае іншым. Наогул, ніколі не сядзіць склаўшы рукі. Мае пасведчанне аператара кацельнай і зімой займаецца ацяпленнем.
Па словах Аляксандра Цыцені, яго працавітасць звязана ў першую чаргу з клопатам пра сваю сям’ю, у якой падрастаюць дзве дзяўчынкі – Саша і Паліна. Вось і стараецца Аляксандр разам з жонкай Алінай, якая працуе ў санаторыі «Рассвет-Любань», пабудаваць уласнае жыллё, каб жыць у ім годна і шчасліва.