У сярэдзіне XVI стагоддзя ў Гродне, па загадзе каралевы Боны, пабудавалі Каралеўскі двор на Гарадніцы — загарадную рэзідэнцыю для адпачынку.

Згодна з інвентаром XVII стагоддзя, будынак быў драўляным, у форме квадрата, і меў закрыты двор.
Падчас вайны з Расіяй яго спалілі, але потым аднавілі. Інвентар 1735 года дазваляе дэталёва апісаць адбудаваны двор. У галоўным будынку было некалькі жылых пакояў, кухня, камора, ганак і мансарда. Пад ім — два мураваныя падвалы, адзін з якіх быў “завалены”. Побач размяшчаліся гаспадарчыя пабудовы: пякарня, стайня, гумно, а таксама карчма і млын.
Дакладнае месцазнаходжанне двара застаецца загадкай. Ёсць некалькі версій, і кожная мае свае аргументы:
Версія 1: Двор быў у канцы сучаснай вуліцы Ажэшкі, якая раней называлася "вуліца да двара Яго Каралеўскай Міласці".
Версія 2: Ён знаходзіўся на месцы цяперашняга Архіерэйскага падворка.
Версія 3: Двор быў у канцы вуліцы Ажэшкі, а на месцы Архіерэйскага падворка размяшчаліся толькі стайні.