“Ливерпуль” етакчиларидан бири Лига кубоги ярим финалини ўтказиб юборади

“Ливерпуль” етакчиларидан бири “Тоттенхэм”га қарши Англия Лига кубоги ярим финалининг жавоб ўйинини ўтказиб юборади. Бу ҳақда жамоа бош мураббийи Арне Слот ўйин арафасида ўтказилган матбуот анжуманида маълум қилди.
"Ҳа, Трент Александр-Арнольд эртанги ўйинни ўтказиб юборади. У якшанба куни ўйнай оладими ёки йўқми, кўришимиз керак. Лекин биз билганимиз шуки, у эртага майдонга тушмайди. У ўтган ўйинда оёғида озгина оғриқ билан майдонни тарк этди. У индивидуал тарзда шуғулланган, аммо жамоа билан эмас, шунинг учун кўрамиз.
Жамоанинг қолган барча ўйинчилари тўлиқ тайёр ва улар ўйинда иштирок этишлари мумкин", — дея қўшимча қилди Слот.
Лига кубоги ярим финали доирасидаги "Ливерпуль" ва "Тоттенхэм" ўртасидаги жавоб учрашуви 6 февраль, пайшанба куни бўлиб ўтади.