🌙ИСЛОМ🌙:

ТУР, ДЎСТ, ТАҲАЖЖУДГА !
Бизларни яратмиш ибодат учун,
Айшу ишрат эмас, бил,тоат учун,
Тириклик бир ондир, беғамлик нечун?
Етар, ғафлат ичра ўтган қишу ёз,
Тур, дўст, таҳажжудга жойнамозни ёз!
Ризосига етмоқ, эй дўст, осонмас,
Хаёл ила ҳеч ким жаннат қозонмас,
Ҳар дам ғаниматдур, ётар замонмас,
Ётма, ғафлат ичра қилгин чин ихлос,
Тур, дўст, таҳажжудга жойнамозни ёз!
Сен тинч тўшагингда ётган шу чоғда,
Кимдир дард зўридан инграр қийноқда,
Кимдир зулм илкида дағ-дағ титроқда,
Ёлвор, ғам, андуҳдан бўлсинлар халос,
Тур, дўст, таҳажжудга жойнамозни ёз!
Қара, сочда оқлар ортар кун сайин,
Қанча гуноҳ қилдинг билиб-билмайин,
Қилмишларга жавоб бермоқлик тайин,
Зарарга босмасдан, дўстим, тош-тароз,
Тур, дўст, таҳажжудга жойнамозни ёз!
Ҳалқим тинчлигига ҳеч кўз тегмасин,
Урушлар кўрмасин, фарёд урмасин.
Аёллар тул қолиб,гўдак ўлмасин,
Дея сен Холиққа билдир тилак,роз,
Тур, дўст, таҳажжудга жойнамозни ёз!
Ким боамал бўлса, топгайдир камол,
Муносиб тақдирлар у Кун Зул Жалол,
Дўстим, бу суннатни олиб сен малол,
Дема: қойиллатдим беш вақтлик намоз...
Тур, дўст, таҳажжудга жойнамозни ёз!..