“Vallah, məəttəl qalıram insandakı “abır”a!!! Dünən Qənirə xanımın comərdliyini gördüm. Türkiyədə Rasim Balayevi ziyarətə getmişdi, bunun sıradan ziyarət olmadığını hamımız yaxşı bilirik! Ürəyim dağa döndü. Kişilik budur, “direktiva” gözləmədən, heç kimin əlinə, ağzına baxmadan iki daşın arasında əlindən gələni eləmək! Xalq artistini də diqqətdə saxlamaq, zorlanan qız uşağını da, əsgər anasını da, şəhid qəbirini də, ölkənin adını da, bayrağımı da!!! Budur layiqli övlad olmaq, layiqli vəzifəsini yerinə yetirmək və öhdəsindən gəlmək!” Xəbərçi.az məlumat verir ki, bu sözləri Xalq artisti Flora Kərimova millət vəkili Qənirə Paşayevanın bu günlərdə Xalq artisti Rasim Balayevi ziyarət etməsinə münasibət bildirərkən deyib. F.Kərimova Xalq artisti, millət vəkili Zeynəb Xanlarovanın Milli Məclisdə Rasim Balayev haqqında danışmasını isə birmənalı qarşılamadığını qeyd edib: "Bu xəbəri gördükdə, keçən həftənin icmalını silkələyən, 40 ilə yaxın deputat kürsüsünu zəbt edən, xalq artisti Zeynəb Xanlarovanın Rasim Balayev və Azərbaycan müəllimi barəsində dediklərinə göz yuma bilmədim. Susa bildiyim qədər susdum ki, yenə deməsinlər, Flora Kərimova polemika axtarır, qaşınmayan yerdən qan çıxardır və ya kiminsə bostanına daş atır! Bildiyim qədəri ilə insanın həyatı boyu xasiyyəti dəyişmir, hədəfləri dəyişir. İldə-fəsildə bir fikrə, bir düşüncəyə xidmət eləmək...?! İllah da səksəndən sonra! Birinci gələk şabalıd satan müəllim mövzusuna… Deyən gərək qocalaydın ki, ürəyin "yumşalaydı"!? Pensiya vaxtını azaltdığın, uşaq pulunu kəsdirdiyin, maaşının artırılmasına etiraz etdiyin müəllimlər illər sonra Türkiyədə acınacaqlı görüb halına acıyaydın!? Müəllimə bu rəzaləti layiq bilib sonra başını sığallamaq... Kimə gərəkdir? Ağbirçək olasan, 25 ilə yaxın müharibə şəraitində yaşayan dövlətə birbaşa "xidmət” edəsən və bütün titulları alasan, müharibə astanasında müharibədən dönəsən, yüzə yaxın şəhidin ola… Sən gedib ermənilərlə sülhə qoşulasan? Nə qədər özünü mənasız və cılız, yaxşı göstərib silahdaşlarıni küçümsəmək olar!? Ayıbdır, amma dahası olmamalıdır! Bəs sən niyə elə orda, dediyin qədər ürəyin yanırdısa o "qanın qaynadığı”, acıdığın İstanbulda şabalıd satan müəlliminə cüzi də olsa bir yardım etmədin, ya da xalq artistinə. Vicdanın varsa, sus və heç yaxşılıq eləmə! 40 ildə eləmədinsə bundan bele də cəhd etmə bil ki, ziyanın dəyir”.