Бөтен дөнья татарлары (татары Мира)

БИШЕНЧЕ ГАМӘЛ

Кеше Пәйгамбәребез (Аллаһның аңа сәламе һәм рәхмәте булсын) алып килгән нәрсәләргә нәфрәтле булса, хәтта алар нигезендә гамәл кылса да, имансыз була.
Әлеге гамәлнең Ислам диненнән чыгаруы хакындагы дәлил: Аллаһ Тәгалә әйтте:
ذَلِكَ بِأَنَّهُمْ كَرِهُوا مَا أَنزَلَ اللَّهُ فَأَحْبَطَ أَعْمَالَهُمْ
«Бу хөкем аларга Аллаһ иңдергән Коръәнне мәкъруһ күргәннәре өчендер гамәлләрен батыл кылды» (47:9),
Ул шулай ук әйтте:
فَلَا وَرَبِّكَ لَا يُؤْمِنُونَ حَتَّى يُحَكِّمُوكَ فِيمَا شَجَرَ بَيْنَهُمْ ثُمَّ لَا يَجِدُوا فِي أَنفُسِهِمْ حَرَجًا مِّمَّا قَضَيْتَ وَيُسَلِّمُوا تَسْلِيمًا
«Раббың исеме белән ант итеп әйтәм, мөселманнар үзара бәхәсләшкән эшләре турысында: «Ий, Мөхәммәд! Синнән хөкем иттермичә чын иманлы була алмаслар, алар синең хөкемеңә күңелләрендә шик калдырмаслар һәм синең хөкемеңә чын күңелдән риза булып мөселман булырлар, әнә шул эшне эшләгәнгә чаклы камил мөэмин булмаслар».(4:65),
һәм шулай ук:
فَمَن يُرِدِ اللَّهُ أَن يَهْدِيَهُ يَشْرَحْ صَدْرَهُ لِلْإِسْلَامِ وَمَن يُرِدْ أَن يُضِلَّهُ يَجْعَلْ صَدْرَهُ ضَيِّقًا حَرَجًا كَأَنَّمَا يَصَّعَّدُ فِي السَّمَاءِ كَذَلِكَ يَجْعَلُ اللَّهُ الرِّجْسَ عَلَى الَّذِينَ لَا يُؤْمِنُونَ
«Аллаһ Тәгалә, бер кешене һидәяткә — диндә туры юлга күндерергә теләсә, ислам дине өчен аның күкрәген ачып куяр, янә Аллаһ, бер кешене хак диннән адаштырырга теләсә, ул кешенең күкрәген тар, күңелен хактан шикләнүче кылыр, шуннан соң бу кеше, күкрәге тар булу сәбәпле, хаклыктан тыгызланып — Аллаһ хөкемнәрен яратмыйча, гүя күккә чыгардай булыр. Әнә шулай Аллаһ Тәгалә Коръән аятьләренә ышанмаган яки ышанып та аның белән гамәл кылмаган кешеләрнең күңелләренә көферлек, мөшриклек яки монафикълык нәҗесен салыр» (6:125), - диде.

АЛЛАҺТАН БАШКА БЕРКЕМНӘН ДӘ КУРЫКМА!

Белегез: файда һәм зарар бары тик Аллаһ кулында гына.
Һәр кеше Аллаһныкы! Һәр шайтан Аллаһ хакимлегендә! Һәрбер авыру һәм бәла-каза Аллаһның карарына бәйле! Зирәк һәм Кодрәтле Раббыбыз теләмәсә, бер генә җан иясе селкенә дә алмый!
Бәхет, шатлык, сәламәтлек һәм байлык — болар барысы да Аллаһ кулында, һәм боларның барысын да Ул гына бирә ала. Бәхетсезлек, бәла-каза, фәкыйрьлек һәм авырулар - болар барысы да Аллаһ Тәгаләдән тора, һәм боларның барысын да Ул гына җибәрә ала!
Аллаһ Тәгалә әйтте:
وَإِن يَمْسَسْكَ اللَّهُ بِضُرٍّ فَلَا كَاشِفَ لَهُ إِلَّا هُوَ وَإِن يُرِدْكَ بِخَيْرٍ فَلَا رَادَّ لِفَضْلِهِ يُصِيبُ بِهِ مَن يَشَاءُ مِنْ عِبَادِهِ وَهُوَ الْغَفُورُ الرَّحِيمُ
«Әгәр сиңа Аллаһ Тәгалә зарар (бәла-каза, авыру, фәкыйрьлек,...) китерсә , ул зарардан сине Аннан башка һичкем коткара алмас. Әгәр Аллаһ сиңа игелек (сәламәтлек, байлык, иминлек,...) күрсәтергә теләсә, ул чакта сине беркем дә Аның рәхим-шәфкатеннән мәхрүм итмәс. Бу нигъмәтләрне Аллаһ Үзе теләгән бәндәсенә бирер. Ул - Гафу Итүче, Рәхимле» (Коръән: 10 сүрә, 107 аять)
Аллаһ безгә кайбер кешеләрнең сихерчелеккә кешеләргә зыян китерү өчен өйрәнгәннәрен сөйләгәч, болай өстәп куйды:
وَمَا هُم بِضَارِّينَ بِهِ مِنْ أَحَدٍ إِلَّا بِإِذْنِ اللَّهِ
«Ләкин алар (сихерчеләр) моның белән Аллаһ рөхсәтеннән башка беркемгә дә зыян китерә алмаслар» (Коръән: 2 сүрә, 102 аять)
Икенче бер аятьтә Аллаһ безгә Һуд пәйгамбәрнең үз халкына әйткән сүзләрен җиткерде:
فَكِيدُونِي جَمِيعًا ثُمَّ لَا تُنظِرُونِ
إِنِّي تَوَكَّلْتُ عَلَى اللَّهِ رَبِّي وَرَبِّكُم مَّا مِن دَابَّةٍ إِلَّا هُوَ آخِذٌ بِنَاصِيَتِهَا
«Бергәләп миңа каршы (миңа зыян китерер өчен) мәкер корыгыз, һәм миңа кичектерү бирмәгез! Тәхкыйк мин Раббыма һәм сезнең Раббыгызга Аллаһка тәвәккәл кыламын. Ул маңгай чәченнән тотмаган бер генә җан иясе дә юк (сезнең һәрберегез Аллаһ хөкеме астында, һәм бер генә җан иясе дә Аның рөхсәтеннән башка хәрәкәтләнә алмый)!» (Коръән: 11 сүрә, 55-56 аятьләр)
Шулай ук Аллаһ Тәгалә болай ди:
إِنْ أَرَادَنِيَ اللَّهُ بِضُرٍّ هَلْ هُنَّ كَاشِفَاتُ ضُرِّهِ أَوْ أَرَادَنِي بِرَحْمَةٍ هَلْ هُنَّ مُمْسِكَاتُ رَحْمَتِهِ قُلْ حَسْبِيَ اللَّهُ عَلَيْهِ يَتَوَكَّلُ الْمُتَوَكِّلُونَ
«Әгәр Аллаһ миңа зарар китерергә теләсә, алар (ялган иләһләрегез) Аның зарарын (миннән) ала алырлармы? Яисә Ул миңа мәрхәмәт күрсәтергә теләсә, алар Аның мәрхәмәтен миннән тыя алырлармы?». "Миңа Аллаһ җитәдер! Хак тәвәккәл итүчеләр Бары тик Аңа гына тәвәккәл итәләр", - дип әйт» (Коръән: 39 сүрә, 38 аять)
Башка аятьтә Аллаһ болай дип әйтте:
قُلِ اللَّهُمَّ مَالِكَ الْمُلْكِ تُؤْتِي الْمُلْكَ مَن تَشَاءُ وَتَنزِعُ الْمُلْكَ مِمَّن تَشَاءُ وَتُعِزُّ مَن تَشَاءُ وَتُذِلُّ مَن تَشَاءُ بِيَدِكَ الْخَيْرُ إِنَّكَ عَلَى كُلِّ شَيْءٍ قَدِيرٌ
«"Йә Аллаһ, Патшалык иясе! Син теләгән кешеңә хакимият бирәсең, теләгән кешеңнән хакимиятне тартып аласың. Теләгән кешеңне олылыйсың, теләгән кешеңне кимсетәсең. Бөтен яхшылык - (бары тик) Синең кулыңда! Чыннан да, Син һәрнәрсәгә сәләтле!" - дип әйт» (Коръән: 3 сүрә, 26 аять)
Шулай ук Раббыбыз болай диде:
أَلَمْ تَعْلَمْ أَنَّ اللَّهَ لَهُ مُلْكُ السَّمَاوَاتِ وَالْأَرْضِ وَمَا لَكُم مِّن دُونِ اللَّهِ مِن وَلِيٍّ وَلَا نَصِيرٍ
«Син күкләрнең һәм җирнең Аллаһ милке икәнен белмәдеңмени (һәммә нәрсә Аллаһ кулында, Аның хакимиятендә һәм Ул гына боларның барысы белән идарә итә)?! Аллаһтан башка сезне кайгыртучы һәм сезгә ярдәм итә алучы за юк» (Коръән: 2 сүрә, 107 аять)
Бары тик Аллаһ кына Үзе халык кылган мәхлукларның Хуҗасы, һәм Ул алар белән Үзе теләгәнчә идарә итә.
Бары тик Аллаһ кына теләгән кешесен бәхетле итәр, һәм теләгән кешесен бәхетсез итәр.
Бары тик Аллаһ кына теләгән кешесен савыктырыр, һәм теләгән кешесенә авыру җибәрер.
Бары тик Аллаһ кына теләгән кешесенә ярдәм итәр, һәм теләгән кешесен ярдәмсез калдырыр.
Бары тик Аллаһ кына коллары белән зирәклеге, гаделлеге һәм мәрхәмәте белән Үзе теләгәнчә идарә итә.
Шуңа күрә без йөрәгебезне бары тик Аллаһ белән генә бәйләргә, Аннан гына куркырга, бөтен эшләребездә Аңа гына өмет багларга һәм һәрвакыт Аның ризалыгына гына омтылырга тиешбез.
«Мөселманның ышанычлы саклануы» Умм Мәликә Камилла әр-Русия

Ислам – яшь динме?

Мөшрикләр һәм Китап әһелләре яраткан "дәлилләрнең" берсе ул имеш Ислам дине иң яшь дин дип әйтүләре. Алар Ислам диненең асылына төшенмичә, аның "яшенә" карап аны кабул итмиләр икән. Шуңа күрә кайберләре яһүд яки насара булып калуны сайлый, кайберләре әби-бабалары мөселман булганына карамастан Ислам диненнән баш тартып мәҗүсилеккә кайта, төрле шәркый (Һиндстан, Кытай) диннәр белән мавыга башлый, имеш алар Исламнан күпкә иртәрәк барлыкка килгән дип уйлыйлар. Ләкин бу чыннан да шулаймы соң әллә ялгыш фикерме?
Аллаһның дине Ислам өч нигездән тора:
1. Барлык гыйбадәтләрне дә бер Аллаһка гына багышлау;
2. Итәгатьлек кылып, Аллаһка буйсыну;
3. Ширектән һәм мөшрикләрдән ваз кичү.
Барлык пәйгамбәрләрнең дә дине «Ислам», дип аталды, шәригать кануннары төрле булса да, инанулары һәм өч нигезе бер төсле иде. Бу «гомум» Ислам.
«Хас» Ислам исә Мөхәммәд килгәннән соң башлана һәм Кыямәткәчә дәвам итәчәк.
Беренчедән: «Ислам», дигән сүзнең төп мәгънәсе буйсынуны аңлата. Мөслим, мөселман Аллаһка буйсынган кеше. Аллаһны Аның Раббылыгында, Исем Сыйфатларында һәм иләһлегендә берләп, бер ялгыз Аңарга гына барлык (йөрәк, тел, әгъзалар) гыйбадәтләрен башкаручы кеше. Мөселман - Аллаһның кушканнарын үтәп, тыйганнарыннан тыелып яши торган, Раббысының тугъры колы.
Аллаһ Тәгалә әйтә:
يَا أَيُّهَا الَّذِينَ آمَنُوا اتَّقُوا اللَّهَ حَقَّ تُقَاتِهِ وَلَا تَمُوتُنَّ إِلَّا . وَأَنتُم مُّسْلِمُونَ)
«Ий мөэминнәр! Аллаһтан куркыгыз (Аның кушканнарын үтәп, тыйганнарыннан тыелыгыз, Аны онытмагыз, зекер итегез, Бер Үзенә генә гыйбадәтләр кылыгыз, Аңарга көферлек, ширек кылмагыз) һәм мөселман булган хәлдә генә үлегез!». («Әлү Гыймран», 102.)
Икенчедән: барлык пәйгамбәрләр, расүлләр дә (нәби, әнбийә – кешеләргә Аллаһтан вәхи булып иңгән әмерләрен, Китапларын тапшырыр өчен, Аллаһ тарафыннан кешеләр арасыннан сайланып алынган иң хәерле, иң намуслы, иң ышанычлы кешеләр): Адам, Нух, Ибрахим, Исмаил, Якуб, Юсуф, Муса, Давыд, Сөләйман, Гайсә һәм соңгы пәйгамбәр һәм расүл - «пәйгамбәрләрнең мөһере» («хатиму-н-набийин») - Мөхәммәд тә ﷺ ИСЛАМ дине белән килделәр. Барысы да мөселман булдылар һәм халыкларын да Исламга, Тәүхидкә – бер Аллаһка гыйбадәт кылуга чакырдылар, Аллаһка тиңдәшлек кылудан ширектән катгый рәвештә тыйдылар. Моның хакында Аллаһ Тәгалә Үзе, соңгы Китабында, Коръәндә әйтә:
وَلَقَدْ بَعَثْنَا فِي كُلِّ أُمَّةٍ رَّسُولًا أَنِ اعْبُدُوا اللَّهَ وَاجْتَنِبُوا الطَّاغُوتَ .
«Без өммәтләрнең һәрберсенә расүлләр күндердек, фәкать бер Аллаһка гына гыйбадәт кылыгыз һәм Ал-лаһтан башкага гыйбадәт кылудан сакланыгыз, дип». ("Нәхел", 36)
Аллаһ Тәгалә барлык пәйгамбәрләрне Исламның төп нигезе булган «Лә иләһә илләллаһ» белән җибәргәнлеге хакында хәбәр итә:
وَمَا أَرْسَلْنَا مِن قَبْلِكَ مِن رَّسُولٍ إِلَّا نُوحِي إِلَيْهِ أَنَّهُ لَا إِلَهَ إِلَّا أَنَا فَاعْبُدُونِ
«Миннән башка гыйбадәткә лаеклы бер иләһ тә юк! Шуңа күрә Миңа гына гыйбадәт кылыгыз!», дип аңарга вәхий иңдермичә, Без сиңа кадәр (Иә, Мөхәммәд) бергенә пәйгамбәр дә җибәрмәдек», ди.
Әбү Һурайра Пәйгамбәрнең ﷺ хәдисен тапшыра:
وَالأَنْبِيَاءُ إِخْوَةٌ لِعَلَّاتٍ، أُمَّهَاتُهُمْ شَتَّى، وَدِينَهُمْ وَاحِدٌ
«Барлык пәйгамбәрләр дә әтиләре ягыннан карендәшләр, (урысча – «братья»), аларның аналары төрле, ә диннәре бер». (Әл-Бохари, 3443)
Ягъни, диннәре бер, ул – Тәүхидкә, «Лә иләһә илләллаһ»ка нигезләнгән дин - «Ислам», дип атала, ә «аналары төрле» - шәригатьләре төрле дигәнне аңлата.
Димәк, барлык пәйгамбәрләрнең дә дине «Ислам», дип аталды, шәригать кануннары төрле булса да, инанулары бер төсле иде. Әмма, пәйгамбәрләрләр үлгәннән соң, кешеләр иблис коткысына ияреп, үзләренең нәфес-шәһвәтләренә бирелеп, пәйгамбәрләр алып килгән дингә төрле бидгатьләр кертеп, ширеккә чумып, төрле башка исемнәр биреп, Аллаһның динен үзгәртеп бетерделәр.
Шуңа күрә, әгәр дә иң беренче кешенең - Адәмнең (галәйһиссәлләм) - дине Ислам булган икән, димәк калган барлык ялган диннәр аннан соң гына барлыкка килгән, чөнки аларга нигез салучылар Адәмнән соң гына дөньяга киләләр. Монда Сократ, Пифагор, Аристотель, Конфуций, Лао-цзы кебек фәлсәфәчеләр күздә тотыла. Өстәвенә, боларның кайберләре пәйгамбәрләрнең үзләреннән яки аларның укучыларыннан белем алганнары турында хәбәрләр дә бар. Ләкин бу фәлсәфәчеләр Ислам динен тулысынча кабул итмиләр һәм үзләренең чикләнгән акыллары белән бер дәлиле дә булмаган төрле ялган уйдырмалар чыгара башлыйлар (йога, медитация, феншуй һ.б.). Пәйгамбәрләргә Аллаһ Тәгалә китаплар җибәргән булса, боларның Аллаһтан дигән бернинди китаплары да юк, аларның фикерләре бернәрсәгә дә нигезләнмәгән, берсе бер сүз сөйләсә, икенчесе бөтенләй башкача сөйләгән. Пәйгамбәрләр исә барысы да бер сүз сөйли булганнар - ул да булса "лә иләһә илләллаһ" - Аллаһтан башка гыйбадәткә лаеклы иләһ юк. Ә фәлсәфәчеләрнең уйдырма диннәре щирк һәм көферлек белән тулган. Моның турында алдагы язмаларда сөйләп китәрбез, ин шәә Аллаһ.
Язманы әзерләгәндә Әбү Муса Сәйфеддинның "ХАК ДИН" китабы кулланылды

«КАЛЕБЕҢНЕ ЧИСТАРТ!»

Таштай каткан йөрәгеңне ни генә эретер?
Бәгыреңне, күзләреңне ни генә җебетер?
Раббың биргән күңелеңне чистарт пәрәвездән!
Үлем фәрештәсе юлга чыгып, килеп җитәр тиздән!
Көне-төне ышкый-ышкый калебеңне агарт!
Нифак, ширек, көферлекне куптарып алып ат!
Төрле бидгать, хорафатлар тизрәк чыгып китсен!
Олы җыештыру, пакьлау, юу – гадәтеңә керсен!
Барлык теләк-ниятләрең дөньяга бәйләнгән
Тәкәбберлек күңелеңдә тирән тамыр җәйгән!
Фани дөнья бизәкләре күзләрне каплаган,
Рия, гөҗеплек, комсызлык җанны буып алган!
Көне-төне дөнья куып... Болай яшәп булмый!
Ә ахирәт янчыгыңда җил-давыллар уйный!
Бу дөньяда яшәгәндә, әйе, — һәммәсе дә кирәк,
Ләкин онытма, син: иң мөһиме, ул – сәламәт йөрәк!
Әбү Муса Сәйфеддин