► Если есть в кармане пачка сигарет, или как пагубная привычка довела до суда жителя Богушевска.

Тое, што шкодныя звычкі не толькі небяспечныя для здароўя, але і вельмі затратныя для сямейнага бюджэту пенсіянер, з г.п. Багушэўск зразумеў на ўласным вопыце. Скрадзеная пачка цыгарэт коштам у 1 рубль 55 капеек у
выніку абыйшлася мужчыну ў сотні рублёў штрафу.
У краму №72 райспажыўтаварыства 64-гадовага нецвярозага
багушэўца прывяло жаданне курыць. Аднак грошай пры сябе “гора-пакупнік” не меў. Пенсіянер запатрабаваў ад жанчыны-працаўца аддаць яму пачку цыгарэт задарма. Пачуўшы адказ, мужчына прыйшоў у лютасць. Стукам кулаком па стале і пагрозамі ў адрас прадаўца раз’юшаны зламыснік не абмежаваўся. На папярэджанне аб выкліку міліцыі мужчына ўчыніў у краме сапраўдны пагром: разбіў шкляную настольную вітрыну, кідаўся асколкамі
шкла, запусціў тэрмінал у стэлаж і разбіў некалькі бутэлек са спіртнымі
напоямі. Пасля ён схапіў з-за прылаўка пачку цыгарэт і моўчкі выйшаў з
памяшкання. Сведкамі “подзвігаў” сталага вандала сталі непаўналетнія
дзяўчынкі, якія забеглі ў краму за марожаным і толькі цудам не пацярпелі ад дзеянняў буйнага пакупніка.
Суд Сенненскага раёна прызнаў раней не судзімага мужчыну віноўным па ч. 1 арт. 206 Крымінальнага кодэкса (рабаванне) і прызначыў яму
пакаранне ў выглядзе штрафу ў памеры 50 базавых велічынь ці 1050 рублёў.
Акрамя таго, пенсіянеру давялося пакрыць шкоду, прычыненую ім
райспажыўтаварыству.
Вольга БАНДАРЭВІЧ.
Голас Сенненшчыны