КОНКУРС РАБОТ ТВОРЧЕСКОЙ МОЛОДЕЖИ «ЗОЛОТОЕ ПЕРО «БЕЛОЙ РУСИ» – 2024».

Паскуарыела Ганна, 04.05.2008 г.н., ДУА “Сярэдняя школа №21 г. Магілёва”, 11 клас.
Катыгорыя удзельніка: Вучань.
Назва конкурсной работы: "Быць беларусам".
Чалавеку па яго прыродзе важна адчуваць сябе часткай вялікага, усведамляць сябе часткай "мы". Гэта з'яўляецца адным са складальнікаў шчасця. Можна быць часткай кампаніі, сяброў, а можна адчуваць дачыненне да цэлага народа і яго шматвяковай гісторыі. Гэта дае адначасова пачуццё гонару, унутранай годнасці і адказнасці, якое не дазволіць чалавеку пасці духам, здацца перад цяжкасцямі.
Я-грамадзянка Беларусі па пашпарце і беларуска па нацыянальнасці. Усё жыццё пражыла ў гэтай краіне, якую вельмі люблю. Мая краіна зусім невялікая. Размясцілася яна ў цэнтры Еўропы, міралюбіва гледзячы на суседзяў, з радасцю прымаючы гасцей. І засяляюць гэтую цудоўную краіну людзі, якія адрозніваюцца сваім характарам, настроем, стаўленнем да свету, якія ўмеюць самааддана працаваць. Беларусы ведаюць і берагуць нацыянальныя традыцыі і звычаі, прымаюць актыўны ўдзел у жыцці краіны. Сапраўдны беларус заўсёды імкнуўся і імкнецца жыць у міры, бо за ўвесь час яго краіна не развязала ніводнай вайны. Мой народ заўсёды адмаўляў гвалт, але пры гэтым сам нярэдка станавіўся яго ахвярай. Гісторыя беларусаў напоўнена шматлікімі войнамі, якія ладзіліся без іх удзелу, але праходзілі на іх тэрыторыі.
Сапраўдны беларус не здольны забыць памяць пра гераічных продкаў, якія прайшлі страшнае выпрабаванне, выжылі і перамаглі фашызм. Як можа беларус не памятаць, што кожны трэці загінуў у гады Вялікай Айчыннай вайны на нашай зямлі? Сёння важна жыць і працаваць, захоўваючы не толькі памяць, але і чалавечыя каштоўнасці, культурныя традыцыі, якія павінны быць закладзены ў аснову беларускай сям'і з самага нараджэння.
Сапраўдны беларус не ўяўны без любові да сваёй мовы. Ён адкрывае для сябе шматвяковую мудрасць свайго народа, а яна зашыфравана ў мове і перадаецца толькі праз яе. У беларускай мове ўся яна – наша Радзіма. У ёй усе дары яе: і абсяг неабмежаваных магчымасцяў; і багацце гукаў, і слоў, і формаў; і стыхійнасць, і пяшчота, і прастата. Родная мова – гэта ключ да нашай культурнай спадчыны, і яе веданне дапамагае беларусам зразумець і захаваць традыцыі, звычаі, рэлігійныя і сацыяльныя каштоўнасці краіны.
І яшчэ адзін дар дала нам наша Беларусь: гэта наша дзівосная, наша чароўная прырода. Менавіта праз яе пахі, гукі чалавек адчувае любоў да Радзімы. Сапраўдны беларус павінен зрабіць так, каб і будучыя пакаленні ўбачылі прыгажосць блакітных азёр, бязмежных лясоў, таямнічых балот. Стаўленне да прыроды – паказчык духоўнасці і самы істотны крытэрый маральнай адзнакі чалавека.
Для мяне быць беларускай – значыць любіць сваю краіну, берагчы яе прыроду, памнажаць тую духоўную спадчыну, якую пакінулі нам папярэднія пакаленні. У Беларусі ёсць усё, каб добра жыць, вучыцца, працаваць і будаваць будучыню, пра якую марыш. І я шчаслівая, што нарадзілася менавіта тут!