КОНКУРС РАБОТ ТВОРЧЕСКОЙ МОЛОДЕЖИ «ЗОЛОТОЕ ПЕРО «БЕЛОЙ РУСИ» – 2024».

Карапецян Захар Гарыкавіч, 09.07.2006 г.н., ДУА “Сярэдняя школа №21 г. Магілёва”, 11 клас.
Катыгорыя удзельніка: Вучань.
Назва конкурсной работы: "Быць беларусам".
Хтосьці хутка і ўпэўнена адкажа, хтосьці будзе доўга сумнявацца і разважаць. Адназначнага адказу няма. Бессэнсоўна спрачацца. Адказ у кожнага будзе свой, бо мы ўсе вельмі розныя. Упэўнены, што быць беларусам — больш, чым мець запіс у нейкім дакуменце, больш, чым мець бацькоў-беларусаў па паходжанні. Быць беларусам для мяне азначае паважаць культуру, мову, звычаі, ведаць гiсторыю свайго народа. Гэта ўнутраны стан чалавека, які ўсведамляе сябе часткай беларускага народа са сваёй самабытнай гісторыяй, са сваім мінулым і будучыняй, со сваiмi традыцыямі і культурай, ведае і шануе нашу мову, нясе адказнасць за свае ўчынкі, за свае словы, за сваю Радзіму.
Для кожнага чалавека быць беларусам азначае штосьці сваё. Хтосьці назаве месца ў Беларусi, дзе нарадзіўся, сказаў першае слова, зрабіў першы крок. Іншы лічыць, што ўсе пачынаецца з сям'і бацькоў-беларусаў, родных і блізкіх, дзе цябе любяць, чакаюць, разумеюць, падтрымліваюць. Некаторыя скажуць, што толькi ў Беларусi такiя родныя бярозкі, пяшчотныя васількі, прыгожыя рэкi i азёры, непаўторны шолах лісця пад нагамі i кроплі дажджу на шкле восенню, зачаравальныя завірухi і танцуючыя сняжынкі ў святле ліхтара зімой… Не магу не пагадзіцца. Колькі людзей, столькі і меркаванняў. Быць беларусам – гэта заўсёды перажываць за нашу сінявокую краіну. Нельга не любіць яе, нельга ёю не ганарыцца. Упэўнены, што Радзіма – гэта месца, якое выбірае тваё сэрца. Мае сэрца выбiрае быць беларусам.
Мне здаецца, што усведамленне сябе беларусам пачынаецца ў дзяцінстве. З калыханкі мамы, з адказаў бацькоў на тысячы нашых “чаму?”, з цікавых расповедаў бабуль і дзядуль пра нашых продкаў і гістарычнае мінулае, з прыкладаў дабрыні і ўзаемадапамогі. Паступова мы даведваемся шмат новага пра гістарычныя падзеі, звычаi, культуру, традыцыі, поспехi i дасягненні, пераасэнсоўваем многае. На маю думку, “быць беларусам” пачынаецца з павагі, гонару за сваю мову, культуру і традыцыі, ведання гістарычнага мінулага, усведамлення дасягненняў і заслуг, з разумення няўдач і памылак, якія, на жаль, часам складана выправіць. З цягам часу ўсведамляеш, што трэба ўмець адрозніваць дабро і зло, праўду і хлусню, вернасць і здраду, умець жыць з годнасцю і павагай да сябе і навакольных. І беларусы, магчыма, як ніякі іншы народ, умеюць гэта.
Аб талерантнасці, гасціннасці, гатоўнасцi да ўзаемнай дапамогі, памяркоўнасці, ветлівасці беларусаў ведаюць і суседзі, і жыхары іншых краін. Чуюць пра яе далёка за межамі нашай краiны. Нас не зламалi ні войны, ні катаклізмы. Беларускі народ гераічна вынес усе выпрабаванні, каб жыць у мірнай і незалежнай краіне. Менавіта яны, героі свайго часу, сваім прыкладам навучылі нас, моладзь, берагчы мір і захоўваць сапраўдныя каштоўнасці і традыцыі беларускага народа.
Права быць беларусам трэба заслужыць!