Темәс педагогия училищеһы, халыҡ телендә “Темәс академияһы”, ете класты бөтөп, артабан уҡырға теләгәндәрҙе тыны менән тартып алып торҙо.

Һынауҙар ауыр ғына, уҡытыусылар талапсан булһа ла, эргә-тирәләге йәштәр күмәкләп ошо уҡыу йортона ағыла торғайны. Сират күперҙәрен үтеп, бәхетле йәштәр, тормош ауыр булһа ла, күңелләнеп уҡый башларҙар ине. Һынауҙар аша үтһәләр ҙә, барыһы ла белеме яғынан тиң түгелдәр, мәктәп фәненән тыш китап уҡырға әүәҫлектәре булмағандар ҙа бар. Әлбиттә, быны бигерәк тә русса хөрт белеүҙәре иҫбатлай ине.