Нияз Фазылов: "Ер аҫты байлыҡтарын файҙаланыусыларҙың күбеһе эшенә намыҫлы ҡарай"

Башҡортостандың тәбиғәттән файҙаланыу һәм экология министры Нияз Фазылов үҙенең Telegram каналында яңғыратҡан төп һығымта – төбәктәге компанияларының күпселеге лицензиялау шарттарын үтәүгә һәм экологик ҡануниәтте үтәүгә яуаплы ҡарай.
"Ер аҫты байлыҡтарын файҙаланыусылар эшмәкәрлеге буйынса ведомство-ара комиссия сиктәрендә коллегаларыбыҙ, көйләү һәм хоҡуҡ һаҡлау органдары вәкилдәре менән берлектә лицензия шарттарын һәм экологик ҡануниәтте үтәүгә контроль ойошторабыҙ.
Беҙҙә рөхсәтһеҙ ҡаҙылма байлыҡтар сығарыу, лицензия шарттарын һәм лицензия биләмәләренең сиктәрен боҙоу осраҡтары теркәлә, әммә ер аҫтын файҙаланыусыларҙың күпселеге үҙ бурыстарын намыҫлы башҡара һәм закон талаптарын үтәй.
Ер аҫты байлыҡтарын файҙаланыусының намыҫлы мөнәсәбәтенең ыңғай миҫалы, атап әйткәндә, Хәйбулла районында файҙалы ҡаҙылмалар сығарыу һөҙөмтәһендә боҙолған ерҙәрҙе мелиорациялау буйынса «Бүребай тау-байыҡтырыу комбинаты» акционерҙар йәмғиәтенең эше менән уртаҡлашҡым килә.
Компания сүп-сар өйөмдәрен һәм иҫке ҡалдыҡтарҙы мелиорациялау буйынса этаплы техник-биологик процесты башланы. Бөгөнгә 30 гектар самаһы боҙолған ер рекультивацияланған.
Мелиорация технологияһы бер нисә техник ҡатламды урынлаштырыуҙы үҙ эсенә ала. Беренсе ҡатлам – геотекстиль.
Киләһе ҡатлам — геомембрана, уның төп роле — һаҡлаусы фильтрацияға ҡаршы ҡатлам булдырыу.
Сүплек битләүҙәрендәге уңдырышлы үҫемлек ҡатламының тупрағын нығытыу һәм ер өҫтөнөң мелиорацияланған майҙандарында тәбиғи эрозия процестарын булдырмау өсөн геоклеткалы материал һалыу ҡаралған. Һуңғы этап – биологик мелиорация – тупраҡҡа ашлама өҫтәп, ҡоролоҡҡа сыҙамлы күп йыллыҡ үләндәр сәсеү. Компания үҙ эшендә мөмкин булған кире эҙемтәләрҙе кәметеүҙе һәм деградацияланған ерҙәрҙе тергеҙеүҙе маҡсат итеп ҡуя. Башҡа ер аҫтын файҙаланыусылар ҙа ошо өлгөгә эйәреүе мөһим", - тип яҙған ул үҙенең Telegram каналында.
Әйткәндәй, алдан хәбәр итеүебеҙсә, Башҡортостандың тәбиғәттән файҙаланыу һәм экология министры Нияз Фазылов Әбйәлил районында "Салауат" яуаплылығы сикләнгән йәмғиәте директоры Таһир Бәхтигәрәев менән берлектә халыҡ менән осрашыуҙарҙа ла был хаҡта әйтеп үткәйне.
Фото: "Башинформ".
Автор: