⚡ Конкурста республиканың ҡала һәм райондары ҡатнашты.

20 ғаризанан ҡала округтарында һәм ауыл биләмәләрендә иң яҡшы 15 муниципаль тәжрибә өлгөһө һайлап алынды. Улар Бөтә Рәсәй “Иң яҡшы муниципаль практика” конкурсында ҡатнашыу өсөн федераль конкурс комиссияһына ебәреләсәк.
“Ҡала төҙөлөшө сәйәсәте, төҙөкләндереү һәм Торлаҡ-коммуналь хужалыҡ” номинацияһында “Иҫтәлекле стела” практикаһы менән ҡала округтары һәм ҡала биләмәләре категорияһында беренсе урынды - Туймазы ҡалаһы, “Киләсәкте яҡтыртып” практикаһы менән ауыл биләмәләре араһында Иглин районы яуланы. “Аҡыллы ҡала” номинацияһында Дүртөйлө ҡалаһының “Ҡаланың үҙәк йылылыҡ пункттарында йылылыҡ менән тәьмин итеү һәм эҫе һыу менән тәьмин итеү системаһын идара итеүҙе модернизациялау” тәжрибәһе иң яҡшыһы булды.
Башҡортостандың торлаҡ-коммуналь хужалыҡ министры урынбаҫары Вилорий Угаров һәр эштең үҙенсәлекле булыуын билдәләне. Муниципалитеттар үҙҙәренең эшен нисек яҡшыртырға, уны һөҙөмтәлерәк итергә һәм халыҡҡа файҙа килтерергә мөмкинлеген күрһәтә. Федераль этапта иң ҡыҙыҡлы һәм оригиналь эштәр ҡатнаша ала.
Конкурс йомғаҡтары буйынса Рәсәйҙең 31 төбәгенән йәмғеһе 50 муниципаль берәмек билдәләнде. Улар муниципаль иҡтисади сәйәсәт, муниципаль финанстар менән идара итеү, торлаҡ-коммуналь хужалыҡ, урындағы демократияны һәм гражданлыҡ әүҙемлеген үҫтереү һәм башҡа йүнәлештәр өлкәһендә иң яҡшы ҡарарҙарын тәҡдим итте.
“Иң яҡшы муниципаль практика” конкурсына ғаризалар 2025 йылдың 1 авгусына тиклем ҡабул ителә. Проект ҡалалар төҙөлөшөнән һәм торлаҡ-коммуналь хужалыҡты модернизациялауҙан алып бәләкәй бизнес, социаль өлкә, транспорт инфраструктураһы һәм һанлаштырыу үҫешенә тиклем йүнәлештәрҙең киң спектрын үҙ эсенә ала. Иң яҡшы тәжрибәләр федераль кимәлдә танылып, бөтә ил буйынса үҙ ҡарарҙарын таратыу мөмкинлеге аласаҡ.
Рәсәй Хөкүмәте Рәйесе урынбаҫары Марат Хөснуллин 2017 йылдан Бөтә Рәсәй “Иң яҡшы муниципаль практика” конкурсы муниципаль идара итеүҙең иң яҡшы тәжрибәләрен асыҡлау һәм дәртләндереү өсөн мөһим майҙансыҡ булып хеҙмәт итә, тип белдерҙе – “Ҡала төҙөлөшө сәйәсәте һәм Торлаҡ-коммуналь хужалыҡты үҫтереү”, “Территориялар менән идара итеү”, “Территориялар бренды”, “Аҡыллы ҡала”, “Милләт-ара тыныслыҡты һәм татыулыҡты нығытыу" – ошо биш номинацияла биләмәләр тормошон яҡшы яҡҡа үҙгәртеүсе проекттарҙы һайлап алабыҙ.
– 2025 йылда 1 миллиард һумлыҡ приз фонды был башланғыстарҙы күләмләштерергә мөмкинлек бирәсәк. Был - илдең бөтә муниципалитеттары өсөн уңышлы тәжрибәне үҙләштереү һәм уны үҙ биләмәләренә индереү мөмкинлеге. Быйыл ҡатнашыусылар йәнә урындағы мәсьәләләрҙең нисек һөҙөмтәле хәл ителеүен, хеҙмәттәшлектең нығыныуын һәм территориялар иҡтисадының үҫешеүен күрһәтер, тип ышанам. Әлеге ваҡытта конкурста ҡатнашыу өсөн төбәктәрҙән заявкалар ҡабул ителә, – тип хәбәр итте Марат Хөснуллин.