Янып-көеп йөргән көннәрем бар,

Йокламыйча чыккан төннәрем бар;
Һәрнәрсәне күрер күзләрем бар,
Кешеләргә әйтер сүзләрем бар, –
Шуңа, ахры, сөям тормышны.
Алга ашкындырган юлларым бар,
Бер-берсеннән матур уйларым бар;
Күпме шатлык, күпме моңнарым бар,
Җырланачак күпме җырларым бар, –
Шуңа, ахры, сөям тормышны.
Бу дөньяда күпме дусларым бар,
Бәхет теләп әйтер тостларым бар;
Җир җылысын җыйган йөрәгем бар,
Кешеләргә минем кирәгем бар, –
Шуңа, ахры, сөям тормышны.
Зөләйха Закирова