Մշո Սուրբ Առաքելոց վանք- վանքային համալիր պատմական Մեծ Հայքի Տուրուբերան նահանգի Տարոն գավառում (Մուշ քաղաքից 5 կմ դեպի հարավ արևելք): Ըստ ավանդության վանքը հիմնադրվել է Գրիգոր Լուսավորչի կողմից, իր անունը ստացել է վանքում ամփոփված տասներկու առաքյալներից մի քանիսի մասունքների պատճառով։ Ի հիշատակ առաքյալների, կոչվել է նաև Տասներկու առաքելոց վանք։ Տարբեր ժամանակներում կոչվել է նաև Ղազարու կամ Եղիազարու վանք: Ըստ ավանդության վանքի առաջին վանահայրը եղել է Եղիազար անունով մի հոգևորական։ Վանքը Մեծ Եղեռնի արդյունքում լքվել է և աստիճանաբար ոչնչացվել: Ներկայումս պահպանվել են միայն ավերակները: Փայտի նրբաճաշակ փորագրման գլուխգործոց է Մշո Առաքելոց եկեղեցու դուռը:

Մինչև 1915 թվականը Առաքելոց վանքում էր պահվում “Մշո ճառընտիրը”` հայ գրչության արվեստի ամենախոշոր հուշարձաններից մեկը, որը աչքի է ընկնում իր հարուստ և ինքնատիպ մանրանկարչությամբ։ Այն հնարավոր է եղել փրկել, և այսօր պահվում է Մատենադարանում: