Сени излар оташларда куйиб кўнгил,

Юрак айтар, «Усизликка энди кўнгил.
Дилингдаги соғинчларни қалбга кўмгил,
Қўй йиғлама кўз ёшларинг садқаи сар ....
Суйган ёринг ишқ даргоҳин этмиш бозор,
Қанча диллар бу савдода чекмиш озор.
Нола қилиб соф ишқингни қилма безор,
Қўй йиғлама кўз ёшларинг садқаи сар.
Алам гули тикон санчар-санчар юрак,
Дил дардига даво топмай бу жон сарак.
Нимталанган бу мажруҳ қалб кимга керак?
Қўй йиғлама кўз ёшларинг садқаи сар...
Излаб юрар сарви қомат гўзал санам,
Кўздан қочмас шахло кўзли қоши қалам.
Сен улардан ортиқроқсан эмассан кам,
Қўй йиғлама кўз ёшларинг садқаи сар...
Унга булган мухаббатни қалбдан ўйгил.
Ишқ вафода ягонани топиб суйгил.
Ўйланмагил, ўртанмагил энди қўйгил,
"Қўй йиғлама кўз ёшларинг садқаи сар..."